Innerlike skoonheid het blywende waarde

“’N JONG MAN STEL SKOONHEID GELYK AAN DEUG”, HET ’N GETROUE BEJAARDE CHRISTEN GESÊ.

Ja, die mens is lankal geneig om te veel klem op uiterlike skoonheid te plaas, wat dikwels daartoe lei dat innerlike waardes verkeerd beoordeel word. Maar ons Skepper kyk na wat ons van binne is, sonder om op ons uiterlike voorkoms te let. Sodoende stel hy die beste voorbeeld van iemand wat met insig oordeel. Volgens die Bybel het God self gesê: “Nie wat die méns sien, sien God nie; want die mens sien aan wat voor oë is, maar die HERE sien die hart aan.”—1 Samuel 16:7.

God is die Bron van die mens se ware skoonheid, en sy Woord toon dat geestelike eienskappe die meeste tel wanneer ’n persoon se werklike waarde bepaal word. Die Bybel sê: “Die bevalligheid is bedrog, en die skoonheid is nietigheid; ’n vrou wat die HERE vrees, sy moet geprys word” (Spreuke 31:30). Trouens, ’n mooi uiterlike kan ’n lelike innerlike verberg (Ester 1:10-12; Spreuke 11:22). Hoewel fisiese skoonheid mettertyd kan vergaan, kan innerlike skoonheid—die eienskappe van die hart—toeneem en bly bestaan.

Hoe verstandig is dit dan tog om eienskappe soos liefde, vreugde, vrede, lankmoedigheid, goedhartigheid, goedheid, geloof, sagmoedigheid en selfbeheersing aan te kweek! (Galasiërs 5:22, 23). Ons kan sodoende innerlike skoonheid verkry, wat beslis blywende waarde het.—1 Petrus 3:3, 4.