Tereggestelde Getuies van Jehovah word onthou
OP 7 Maart 2002 is ’n gedenkplaat in die dorp Körmend in die weste van Hongarye onthul. Dit het die dood herdenk van drie van Jehovah se Getuies wat in 1945 deur die Nazi’s vermoor is.
Die gedenkplaat is aangebring teen die muur van die hedendaagse hoofkantoor van die brandweerstasie in Hunyadi-straat, waar die openbare teregstellings plaasgevind het. Die gedenkplaat is aangebring ter herinnering aan ‘Christene wat in Maart 1945 as gewetensbeswaardes tereggestel is. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, Jehovah se Getuies.’
Die teregstellings is net twee maande voor die einde van die Tweede Wêreldoorlog uitgevoer. Waarom is hierdie Christene doodgemaak? Die Hongaarse koerant Vas Népe verduidelik: “Nadat Hitler in Duitsland aan bewind gekom het, is nie net die Jode nie, maar ook getroue Jehovah se Getuies onderwerp aan vervolging en marteling, konsentrasiekampe en die dood as hulle nie hulle godsdiensoortuiging wou verloën nie. . . . In Maart 1945 was daar ’n algehele skrikbewind in die weste van Hongarye. . . . Deel van hierdie skrikbewind was om lede van Jehovah se Getuies te deporteer en dood te maak.”
Die program waartydens die gedenkplaat onthul is, het uit twee dele bestaan. Die eerste deel is by die teater van die Batthyány-kasteel gehou, waar die sprekers persone ingesluit het soos professor Szabolcs Szita, die hoof van die Slagting se Dokumentasiesentrum in Boedapest; László Donáth, ’n lid van die Parlement se Komitee vir Menseregte, Minderheidsbelange en Godsdienssake, en Kálmán Komjáthy, ’n ooggetuie van die teregstellings en nou die dorp se geskiedkundige. Die meer as 500 wat teenwoordig was, het na die ander kant van die dorp gestap vir die tweede deel van die program—die onthulling van die gedenkplaat deur die burgemeester van Körmend, József Honfi.
In sy laaste brief het Ján Žondor (János Zsondor) sy Christenbroers en -susters aangespoor om nie te treur nie. Hy het geskryf: “Ek onthou steeds die woorde van Johannes in Openbaring 2:10: ‘Wees selfs tot in die dood getrou.‘ . . . Sê vir dié by die huis om nie te treur nie, want ek sterf vir die waarheid en nie as ’n misdadiger nie.”
[Prent op bladsy 32]
Bertalan Szabó
[Prent op bladsy 32]
Antal Hőnisch
[Prent op bladsy 32]
Ján Žondor