‘Soek wie verdienstelik is’
DAMASKUS was ’n florerende stad in die eerste eeu van ons Gewone Jaartelling. Aangesien dit deur boorde omring was, was dit soos ’n oase vir karavane wat van lande uit die ooste daar aangekom het. Nie lank ná Jesus Christus se dood nie, was daar ’n Christengemeente in Damaskus. Onder die lede daarvan was Jode wat moontlik in 33 G.J. gedurende die Pinksterfees in Jerusalem Jesus se volgelinge geword het (Handelinge 2:5, 41). Party dissipels uit Judea het dalk na Damaskus getrek toe daar vervolging uitgebreek het nadat Stefanus gestenig is.—Handelinge 8:1.
Dit was waarskynlik gedurende 34 G.J. dat ’n Christen uit Damaskus genaamd Ananias ’n buitengewone toewysing ontvang het. Die Here het vir hom gesê: “Staan op, gaan na die straat wat Reguit genoem word en soek by die huis van Judas ’n man met die naam Saulus, van Tarsus. Want kyk! hy is besig om te bid.”—Handelinge 9:11.
Die straat wat Reguit genoem word, was ongeveer een en ’n half kilometer lank en het deur die middel van Damaskus geloop. Die bygaande 19de-eeuse gravering gee ons ’n idee van hoe die straat destyds gelyk het. Met die oog op hoe die straat ontwerp is, sou Ananias dalk ’n tyd lank moes soek om Judas se huis te vind. Maar Ananias het dit gevind, en sy besoek het daartoe gelei dat Saulus die apostel Paulus, ’n ywerige verkondiger van die goeie nuus, geword het.—Handelinge 9:12-19.
Jesus het sy dissipels uitgestuur en vir hulle gesê om te ‘soek wie verdienstelik is’ om die goeie nuus te hoor (Matteus 10:11). Ananias het blykbaar letterlik na Saulus gesoek. Soos Ananias soek Jehovah se Getuies gretig na verdienstelikes en is hulle verheug wanneer mense die goeie nuus van die Koninkryk aanneem. Wanneer sulke mense gevind word, maak dit al die inspanning die moeite werd.—1 Korintiërs 15:58.
[Prent op bladsy 32]
Die hedendaagse “straat wat Reguit genoem word”
[Foto-erkenning op bladsy 32]
From the book La Tierra Santa, Volume II, 1830