’n Geleentheid om te onthou

WATTER geleentheid is dit? Dit is die dood van ’n man wat bykans 2 000 jaar gelede gesterf het. “Ek [doen afstand] van my siel . . . , sodat ek dit weer kan ontvang”, het hy gesê. “Geen mens het dit van my weggeneem nie, maar ek doen op eie inisiatief afstand daarvan” (Johannes 10:17, 18). Daardie man was Jesus Christus.

Jesus het sy volgelinge beveel om sy offerdood te herdenk. Die geleentheid word ook “die Here se aandmaal”, of “die nagmaal van die Here”, genoem (1 Korintiërs 11:20; Die Bybel, 1953). Die Gedenkmaal wat Jesus ingestel het om sy dood te herdenk, sal op Donderdag 24 Maart 2005 ná sononder deur Jehovah se Getuies en hulle vriende gevier word.

’n Bybeltoespraak sal verduidelik wat die ongesuurde brood en die rooiwyn beteken wat vir die geleentheid gebruik word (Matteus 26:26-28). Die toespraak sal ook vrae soos die volgende beantwoord: Hoe dikwels moet Christene hierdie geleentheid herdenk? Wie moet tereg van die embleme, die brood en die wyn, gebruik? Wie vind baat by Jesus se dood? Hierdie belangrike viering sal almal help om die doel van Jesus se lewe en dood te verstaan.

Jy sal hartlik verwelkom word by die Herdenking van Jesus se dood. Vra gerus vir Jehovah se Getuies in jou omgewing presies hoe laat en waar die vergadering gehou sal word.