“Vervolg weens sy geloof”

DIE dorp Cernobbio in Noord-Italië het ’n gebied in ’n plaaslike park afgesonder ter nagedagtenis aan slagoffers van menseregteskendings. Een van die gedenkplate wat daar onthul is, is aan Narciso Riet gewy. Riet is vir Italiaanse ouers in Duitsland gebore en het in die 1930’s een van Jehovah se Getuies geword. Gedurende die bewind van Hitler is Jehovah se Getuies vervolg omdat hulle geweier het om Hitler bo die ware God, Jehovah, te stel.

Toe die Gestapo uitvind dat Riet gehelp het om eksemplare van Die Wagtoring in die konsentrasiekampe in te bring, het hy na Cernobbio gevlug. Daar is hy gevra om Die Wagtoring in Italiaans te vertaal en dit onder sy medegelowiges daar naby te versprei. Sy ywerige bedrywighede het nie onopgemerk gebly nie. ’n SS-offisier en sy manne het Riet se huis binnegestorm, hom in hegtenis geneem en beslag gelê op die “misdadige” getuienis—twee Bybels en ’n paar briewe! Riet is na Duitsland gedeporteer, in die Dachau-konsentrasiekamp gestop en kort voor die einde van die Tweede Wêreldoorlog tereggestel. Hy is “vervolg weens sy geloof”, sê die gedenkplaat in Cernobbio.

Die geloof van Narciso Riet en honderde ander Getuies wat slagoffers van Nazi-vervolging was, is ’n aansporing vir hedendaagse Christene om getrou te bly aan Jehovah, die enigste Persoon in die heelal wat hulle aanbidding waardig is (Openbaring 4:11). Jesus het gesê: “Gelukkig is dié wat ter wille van regverdigheid vervolg is.” God sal hulle dade onthou en hulle vir hulle moedige handelswyse seën.—Matteus 5:10; Hebreërs 6:10.