Het jy geweet?
Wat was die grootte van die gegote see by Salomo se tempel?
Die verslag in 1 Konings 7:26 sê dat die see “tweeduisend bat” water gehou het wat die priesters gebruik het, terwyl die parallelle verslag in 2 Kronieke 4:5 sê dat dit “drieduisend bat” gehou het. Dit het aanleiding gegee tot die bewering dat daar ’n verskil is omdat ’n kopiïs ’n fout in die verslag in Kronieke gemaak het.
Die Nuwe Wêreld-vertaling help ons egter om te verstaan hoe hierdie twee tekste met mekaar versoen kan word. Eerste Konings 7:26 sê: “Dit het tweeduisend bat gehou.” Let op dat 2 Kronieke 4:5 sê: “As ’n houer kon dit drieduisend bat hou.” Tweede Kronieke 4:5 verwys dus na die maksimum volume van die kom by die tempel, wat dit kon hou, terwyl 1 Konings 7:26 die hoeveelheid water meld wat gewoonlik in die kom by die tempel gehou is. Met ander woorde, dit is nooit tot die maksimum volume gevul nie. Dit wil voorkom of dit gewoonlik net twee derdes vol gemaak is.
Waarom het Jesus en Petrus die tempelbelasting met net een muntstuk betaal?
In Jesus se dag moes elke Joodse man ouer as 20 jaar ’n jaarlikse tempelbelasting van twee dragmas, of ’n didragma, betaal. Dit was gelykstaande aan omtrent twee dae se loon. Toe ’n vraag oor die betaling van hierdie belasting ontstaan het, het Jesus vir Petrus gesê: “Gaan na die see toe, gooi ’n vishoek in en neem die eerste vis wat opkom, en wanneer jy sy bek oopmaak, sal jy ’n statermunt vind. Neem dit en gee dit aan hulle vir my en vir jou.”—Matteus 17:24-27.
Talle geleerdes glo dat die statermunt wat hier genoem word, in werklikheid die tetradragma was. Hierdie munt was vier dragmas werd, of gelykstaande aan die tempelbelasting vir twee persone. Die tetradragma was baie algemener en makliker verkrygbaar as die didragma. The New Bible Dictionary sê dus: “Dit wil voorkom of Jode dikwels die Tempelbelasting twee-twee betaal het.”
Daarbenewens moes enigiemand wat die belasting vir slegs een persoon wou betaal, ook ’n agio, ’n fooi vir geldwisseling, betaal. Hierdie fooi kon tot 8 persent beloop. Maar diegene wat twee-twee betaal het, het dus nie die fooi betaal nie. Selfs in hierdie geringe besonderheid stem Matteus se verslag dus ooreen met wat bekend is oor algemene gebruike in Jesus se tyd.
[Prent op bladsy 15]
’n tetradragma (vergroot)