’n Vindingryke oplossing

DRIE jong mans in Sentraal-Afrika wou ’n streekbyeenkoms in hulle omgewing bywoon. Hoe sou hulle daar kom? Hulle moes byna 90 kilometer op slegte grondpaaie aflê, en hulle het geen vervoer gehad nie. Hulle het besluit om drie fietse te leen, maar kon nie eens een kry wat geskik was nie.

’n Ouer man in die plaaslike gemeente het hulle probleem opgemerk en sý fiets vir hulle aangebied—dit was oud maar nog rybaar. Hy het verduidelik hoe hy en ander in die verlede dit reggekry het om by ’n streekbyeenkoms uit te kom. Die ouer man het voorgestel dat hulle al drie die een fiets gebruik. ’n Eenvoudige oplossing, maar nie so maklik nie. Hoe kon drie mense een fiets gebruik?

Om die hitte van die son te vermy, het die jong broers vroeg die oggend bymekaargekom en hulle bagasie op die fiets gelaai. Die eerste een het op die fiets vooruit gery, en die ander twee het vinnig agterna geloop. Ná omtrent ’n halwe kilometer het die fietsryer afgeklim en die gelaaide fiets teen ’n boom laat leun. Hy het natuurlik seker gemaak dat die ander die fiets nog kan sien sodat ’n vreemdeling dit nie dalk “leen” nie. Die eerste fietsryer het dan verder geloop.

Wanneer die ander twee die fiets bereik het, het een van hulle daarop gery terwyl die ander een nog ’n halwe kilometer of so gestap het voordat dit sy beurt was. Met goeie beplanning en vasbeslotenheid kon die drie dus die loopafstand van 90 kilometer tot omtrent 60 kilometer verkort. Dit was die moeite werd. Hulle het saam met hulle Christenbroers en -susters by die byeenkoms vergader en die geestelike feesmaal geniet (Deut. 31:12). Sal jy vanjaar alles in jou vermoë doen om die streekbyeenkoms in jou omgewing by te woon?