Kritieke tye—nou
DIE Bybel het voorspel dat die mensdom “kritieke tye . . . wat moeilik is om deur te kom”, sou ondervind. Dit beskryf hierdie tydperk as “die laaste dae” (2 Timoteus 3:1-5; 2 Petrus 3:3-7). Jesus Christus het van dieselfde tydperk gepraat toe hy ’n vraag beantwoord het wat sy dissipels oor “die voleinding van die stelsel van dinge” gevra het (Matteus 24:3). Lewe ons nou in die laaste dae? Vergelyk wat die Bybel voorspel het met die onlangse verslae wat hieronder aangehaal word, en besluit dan self.
Wat die Bybel voorspel het: aardwye konflik—Lukas 21:10; Openbaring 6:4.
Wat onlangse verslae sê: “In die 20ste eeu was daar drie keer meer oorlogverwante sterftes as in alle vorige eeue tesame, vanaf die geboorte van Christus.”—Worldwatch-instituut.
Wat die Bybel voorspel het: voedseltekorte en siekte—Lukas 21:11; Openbaring 6:5-8.
Wat onlangse verslae sê: In 2004 was ongeveer 863 miljoen mense op aarde ondervoed, 7 miljoen meer as in 2003.—Verenigde Nasies se Voedsel- en Landbou-organisasie.
Ongeveer eenmiljard mense woon in krotbuurte; 2,6 miljard het nie basiese sanitasie nie; 1,1 miljard het nie veilige drinkwater nie.—Worldwatch-instituut.
Malaria teister 500 miljoen mense; 40 miljoen het MIV-vigs; tuberkulose het in 2005 die dood van 1,6 miljoen veroorsaak.—Wêreldgesondheidsorganisasie.
Wat die Bybel voorspel het: die verderwing van die aarde—Openbaring 11:18.
Wat onlangse verslae sê: “Menslike bedrywighede het die planeet tot op die randjie van ’n grootskaalse uitsterwing van spesies gebring.” “Bykans twee derdes van die dienste wat die natuur aan die mens verskaf, is wêreldwyd aan die afneem.”— Millennium Ecosystem Assessment.
“Mensgemaakte kweekhuisgasse het die aarde se klimaat byna kritieke keerpunte laat bereik, met potensieel gevaarlike gevolge vir die planeet.”—NASA, Goddard-instituut vir Ruimtestudies.
Wat die Bybel voorspel het: die wêreldwye verkondiging van die goeie nuus van God se Koninkryk—Matteus 24:14; Openbaring 14:6, 7.
Wat onlangse verslae sê: Gedurende 2007 het altesaam 6 957 854 Getuies van Jehovah in 236 lande meer as 1,4 miljard uur bestee aan die verkondiging van die goeie nuus oor God se Koninkryk.—Jaarboek van Jehovah se Getuies vir 2008.
Soos hierbo getoon word, het die Bybel voorspel dat daar rede vir optimisme sou wees ten spyte van al die slegte nuus. Jesus het gepraat van die “goeie nuus” van God se Koninkryk. Wat is God se Koninkryk? Hoe hou dit verband met die mensdom se hoop op ’n beter toekoms? En hoe sal God se Koninkryk jou raak?
[Lokteks op bladsy 5]
Die Bybel het die wêreldtoestande voorspel wat ons vandag sien