Jesus Christus—Die krag van sy boodskap

“Die blywendste getuienis dat die wysgeer van Kapernaum bestaan het, is sekerlik dat hy steeds harte en verstande in sy sagte greep hou.”a—DIE SKRYWER GREGG EASTERBROOK.

WOORDE het krag. Goed gekose woorde van wysheid kan harte raak, hoop inboesem en lewens verander. Geen mens se woorde het al soveel krag gehad as dié van Jesus Christus nie. Iemand wat Jesus se welbekende Bergpredikasie gehoor het, het later geskryf: “Toe Jesus klaar was met hierdie woorde, was die uitwerking dat die skare verstom was oor die manier waarop hy geleer het.”—Matteus 7:28.

Tot vandag toe is baie van Jesus se woorde bekend aan mense regoor die wêreld. Beskou ’n paar voorbeelde wat ryk is aan betekenis.

“Julle kan nie God én Rykdom as slawe dien nie.”—Matteus 6:24.

“Alles wat julle dan wil hê dat die mense aan julle moet doen, moet julle ook net so aan hulle doen.”—Matteus 7:12.

“Betaal . . . aan die keiser terug wat aan die keiser behoort, maar aan God wat aan God behoort.”—Matteus 22:21.

“Dit verskaf groter geluk om te gee as om te ontvang.”—Handelinge 20:35.

Maar Jesus het meer gedoen as om net onvergeetlike woorde te spreek. Die boodskap wat hy verkondig het, was kragtig omdat dit die waarheid omtrent God oorgedra het, mense geleer het hoe om ware betekenis in die lewe te vind en duidelik gewys het op die oplossing vir alle menselyding—God se Koninkryk. Wanneer ons hierdie boodskap op die volgende bladsye ondersoek, sal ons sien waarom Jesus steeds miljoene “harte en verstande in sy sagte greep” hou.

[Voetnoot]