Gebed

6 Sal dit help?

HELP dit ons enigsins om te bid? Die Bybel toon dat die gebede van getroue knegte van God hulle werklik tot voordeel strek (Lukas 22:40; Jakobus 5:13). Trouens, gebed kan ons geestelik, emosioneel en selfs fisies die wêreld se goed doen. Hoe so?

Wel, gestel jy het ’n kind wat ’n geskenk ontvang. Sal jy hom leer dat dit genoeg is om dankbaar te voel? Of sal jy hom leer dat hy sy dankbaarheid moet uitspreek? Wanneer ons belangrike gevoelens verwoord, kristalliseer ons dit en versterk ons dit selfs. Geld dit ook wanneer ons met God praat? Beslis! Kyk na ’n paar voorbeelde.

Gebede van danksegging. Wanneer ons ons Vader bedank vir die goeie dinge wat met ons gebeur, fokus ons op ons seëninge. Gevolglik voel ons dankbaarder, gelukkiger, positiewer.—Filippense 4:6.

Voorbeeld: Jesus het sy dank uitgespreek vir die manier waarop sy Vader na sy gebede geluister en dit verhoor het.—Johannes 11:41.

Gebede om vergifnis. Wanneer ons God om vergifnis vra, versterk ons ons gewete, verdiep ons ons berou en verskerp ons ons bewustheid van die erns van sonde. Ons kry ook verligting van die skuldlas.

Voorbeeld: Dawid het gebid om sy berou en innige spyt uit te spreek.—Psalm 51.

Gebede vir leiding en wysheid. As ons Jehovah vra om ons te lei of om ons die nodige wysheid te gee om goeie besluite te neem, kan dit ons help om opreg nederig te wees. Dit kan ons herinner aan ons beperkings en ons help om vertroue in ons hemelse Vader op te bou.—Spreuke 3:5, 6.

Voorbeeld: Salomo het nederig om leiding en wysheid gevra om oor Israel te heers.—1 Konings 3:5-12.

Gebede in tye van benoudheid. As ons ons hart voor God uitstort wanneer ons ontsteld is, sal dit ons ’n kalm hart gee en sal ons op Jehovah eerder as op onsself steun.—Psalm 62:8.

Voorbeeld: Koning Asa het gebid toe hy voor ’n gedugte vyand te staan gekom het.—2 Kronieke 14:11.

Gebede vir die welsyn van ander wat hulp nodig het. Hierdie gebede help ons om selfsug te bestry en om groter medelye en empatie te hê.

Voorbeeld: Jesus het vir sy volgelinge gebid.—Johannes 17:9-17.

Lofgebede. Wanneer ons Jehovah vir sy wonderlike werke en eienskappe loof, sal ons respek en waardering vir hom toeneem. Hierdie gebede kan ons ook nader aan ons God en Vader laat kom.

Voorbeeld: Dawid het God hartlik vir sy skepping geloof.—Psalm 8.

Nog ’n seën wat met gebed verband hou, is “die vrede van God wat alle denke te bowe gaan” (Filippense 4:7). Om innerlike kalmte in hierdie wêreld vol probleme te vind, is inderdaad ’n seldsame seën. Dit hou selfs fisiese voordele in (Spreuke 14:30). Maar is dit slegs die gevolg van ons eie pogings? Of is iets belangrikers daarby betrokke?

[Lokteks op bladsy 10]

Gebed hou baie voordele in—fisies, emosioneel en bowenal geestelik