’n Profesie van die allergrootste belang
“Hierdie goeie nuus van die koninkryk sal in die hele bewoonde aarde verkondig word as ’n getuienis vir al die nasies; en dan sal die einde kom.”—MATTEUS 24:14.
GELEERDES is dit eens dat hierdie vers baie belangrik is. Dit is belangrik weens die wêreldwye omvang van die werk wat dit beskryf. En dit is belangrik omdat dit wys op wat Christene veronderstel is om te doen—’n predikingswerk wat die betekenisvolle en verreikende gebeurtenis wat Jesus “die einde” genoem het, sou voorafgaan en aankondig.
Daardie profetiese vers word vandag vervul. Jy is hierby betrokke, aangesien die goeie nuus ’n uitnodiging sowel as ’n waarskuwing behels. Dit bied jou ’n keuse: Aanvaar God se Koninkryk of staan dit teë. Jou lewe hang af van die keuse wat jy maak.
Kyk na die konteks. Etlike dae voordat Jesus aan die paal gehang is, het die dissipels na hom toe gekom en hom oor die toekoms gevra. Hulle wou graag weet van die oprigting van God se Koninkryk, waarvan Jesus so dikwels gepraat het. Hulle wou ook weet van “die voleinding van die stelsel van dinge”, of soos party vertalings hierdie uitdrukking weergee, “die einde van hierdie wêreld”.—Matteus 24:3, Nuwe Afrikaanse Bybelvertaling.
In antwoord hierop het Jesus voorspel dat daar oorloë, hongersnode en pessiektes op groot skaal sou wees, asook hewige aardbewings. Hy het ook gesê dat wetteloosheid sou toeneem, dat valse godsdiensonderrigters baie sou mislei en dat ware Christene gehaat en vervolg sou word. Dit alles was slegte nuus.—Matteus 24:4-13; Lukas 21:11.
Maar daar was ook goeie nuus. Jesus het vervolgens die woorde aan die begin van hierdie artikel gesê, woorde wat eeue lank mense se denke geprikkel het en hulle geïnspireer het. Hoewel mense saamstem oor die belangrikheid van Jesus se woorde, verskil hulle oor die betekenis daarvan. Presies wat is hierdie goeie nuus? Wat is die Koninkryk? Wanneer sal hierdie profesie vervul word, en deur wie? En wat is “die einde”? Kom ons kyk.
[Prent op bladsye 2, 3]
Replika van die Washington-manuskrip van die vier Evangelies. Die donkerder gedeelte is Matteus 24:14
[Erkenning]
Uit die boek Facsimile of the Washington Manuscript of the Four Gospels in the Freer Collection 1912