Berei voor vir die skriftelike hersiening
1 Ons Koninkryksbediening vir Desember 1988 het melding gemaak van die nuwe reëling vir skriftelike hersienings in die Teokratiese Bedieningskool. Hierdie hersienings sal drie keer per jaar plaasvind—aan die end van April, Augustus en Desember. Hoewel dit ’n bietjie meer moeite van elkeen sal verg, sal diegene wat daaraan deelneem groter voordele geniet. Soos die vorige artikel gemeld het, sal ’n gedrukte hersieningsvel met ruimte om die antwoorde in te vul nie meer vir skriftelike hersienings voorsien word nie. Maar gedrukte vrae sal by Ons Koninkryksbediening vir April, Augustus en Desember ingesluit word. Omdat die broers die vraestelle lank voor die tyd sal hê, sal dit elkeen die geleentheid bied om spesifieke informasie na te slaan sodat hulle deeglik voorberei is.
2 Moenie op die vraestel aantekeninge maak of skryf wanneer jy informasie naslaan waarop die gedrukte vrae gebaseer is nie, omdat jy hierdie vel met vrae sal gebruik om aan die skriftelike hersiening deel te neem. Onthou dat slegs die Bybel gedurende die skriftelike hersiening gebruik mag word. Jou persoonlike aantekeninge of ander naslaanwerke moet nie in daardie tyd gebruik word nie.
3 Jy sal gedurende die toegewese tyd vir die skriftelike hersiening ’n ander vel papier nodig hê om jou antwoorde neer te skryf op die vrae wat ’n verduideliking in jou eie woorde verg. Probeer spesifieke informasie gee en wees bondig. Aangesien jy vooraf sou voorberei het, behoort dit nie te moeilik te wees nie. Wanneer die skoolopsiener die antwoorde gee, sal jy weet of die informasie wat jy neergeskryf het korrek is.
4 Almal moet elke week goed voorberei vir die Teokratiese Bedieningskool. Luister aandagtig gedurende die vergadering en probeer om die sleutelgedagtes te onderskei wanneer informasie op die verhoog aangebied word. Die skoolopsiener sal seker maak dat alle gedagtes wat in die volgende skriftelike hersiening bespreek gaan word, duidelik gemeld word.
5 Hierdie nuwe reëling behoort ’n groter aansporing te wees vir elkeen om teenwoordig te wees en aan hierdie aspek van die Teokratiese Bedieningskool deel te neem. Die ekstra navorsing wat dit verg, behoort te help om sleutelgedagtes duidelik in ons gedagtes in te prent. Die oogmerk van die Teokratiese Bedieningskool sal met hierdie nuwe reëling in groter mate bereik word. Dit behoort weerspieël te word in die feit dat ons beter toegerus sal wees vir die werk in die bediening.