Daaglikse geestelike voedsel—noodsaaklik vir ’n Christengesin
1 “Die mens sal nie van brood alleen lewe nie, maar van elke woord wat deur die mond van God uitgaan” (Matt. 4:4). Hoe waar is daardie woorde tog! Net soos ons elke dag fisiese voedsel nodig het, moet ons daagliks geestelike voedsel inneem. Om ons te help om ons gereeld uit God se Woord te voed, publiseer die Genootskap die boekie Ondersoek die Skrif elke dag. Sit julle as ’n Christengesin daagliks tyd opsy om die dagteks te bespreek?
2 Ouers moet die voorbeeld stel: Aangesien die lewe so besig is, is dit maklik om die bespreking van die dagteks uit te stel en te dink dat dit later gedoen kan word. Maar as ouers van hulle gesin se geestelike behoefte bewus is, sal hulle elke dag tyd vind, ja, tyd uitkoop, om die teks te bespreek wanneer die gesin saam is (Matt. 5:3, NW). Hulle sal die inisiatief neem deur nie net die dagteks saam met hulle kinders te lees nie, maar deur ook punte in die kommentaar uit Die Wagtoring te beklemtoon en te bespreek hoe hulle die informasie en raad prakties kan toepas. Dit sal weliswaar inspanning en oefening verg om in die gewoonte te kom, maar die voordele maak dit die moeite werd. (Vergelyk Handelinge 17:11, 12.) Ouers, lê julle dus daarop toe om ’n goeie voorbeeld te stel!
3 Vind ’n geskikte tyd: Wanneer is die beste tyd vir die hele gesin om bymekaar te kom om die dagteks te bespreek sodat dit nie net nou en dan gedoen word nie? Dit is voordelig as ’n mens die dag met ’n bespreking van ’n Bybelteks begin. In Bethel- en sendinghuise oor die hele wêreld word die dag met oggendgodsdiens begin, wat ’n kort bespreking van die dagteks insluit. Dit help die broers om hulle dag goed te begin deur daagliks oor Jehovah se vermanings na te dink.—Ps. 1:1, 2; Filip. 4:8.
4 Christengesinne kan eweneens daarby baat vind om oggendbesprekings uit die Bybel te hou. Kinders kan gehelp word om bedreigings vir hulle geestelikheid wat hulle by die skool teëkom die hoof te bied. As dit ’n tyd lank nie moontlik is vir die hele gesin om vir ’n bespreking van die dagteks bymekaar te kom nie, kan ouers aan alternatiewe reëlings dink sodat hierdie belangrike geestelike voeding nie oorgeslaan word nie. Wanneer ’n pa byvoorbeeld moet gaan werk voordat die kinders in die oggend opstaan, kan die ma miskien tyd afstaan om die teks met die kinders te bespreek. Aan die ander kant reël sommige gesinne om die teks in die aand te bespreek omdat hulle dan saam is. Elke gesin kan ’n rooster uitwerk wat die beste by hulle omstandighede pas.
5 Daaglikse geestelike voedsel is noodsaaklik vir ’n Christengesin. Gee voorkeur aan die bespreking van die dagteks (Filip. 1:10, NW). As ons elke dag ’n Bybelteks bespreek, sal dit ons help om aan Jehovah se regverdige beginsels en wette getrou te bly. As elke gesinslid sy samewerking gee, sal almal die grootste voordeel uit hierdie reëling kan trek.