Vraebus
Wat moet ons in gedagte hou wanneer ons in ʼn gevaarlike gebied werk?
1 0ns hoor al hoe meer verslae van geweld, straatroof en sosiale wanorde, veral in stadsgebiede. Hoewel ons daaroor bekommerd is, weet ons dat daar selfs in onrusgebiede opregte mense is wat gunstig op die Koninkryksboodskap sal reageer. Ons moet dus op die gepaste tyd vrymoedigheid bymekaarskraap om voort te gaan, vol vertroue in Jehovah se waaksame sorg.—Spr. 29:25; 1 Tess. 2:2.
2 Wanneer ons in ʼn potensieel gevaarlike gebied gaan, verwag Jehovah van ons om versigtig te wees en goeie oordeel aan die dag te tê. Wees wakker. “ʼn Skrander mens sien die onheil en verberg hom, maar die eenvoudiges gaan verder en word gestraf” (Spr. 22:3). Ervare verkondigers kan die wysheid daarvan insien om in pare of, indien nodig, selfs in groepe van etlike verkondigers saam te werk. Maar dit is verkieslik dat net twee verkondigers na die deur toe gaan en met die huisbewoner praat, aangesien net die twee wat die besoek doen die tyd kan rapporteer. Prediker 4:9, 12 sê: “Twee is beter as een ... As iemand die een aanval, kan altwee hom teëstand bied.” Misdadigers is dikwels op die uitkyk vir diegene wat alleen is en dus makliker slagoffers is.
3 Wees veral versigtig om in woonstelblokke met donker gange en verlate trappe te gaan. Moenie sommer net in ʼn huis of ʼn woonstel gaan wanneer jy ingenooi word nie. Moenie met diegene argumenteer wat dalk gevaarlik of uitdagend lyk nie. Identifiseer jou onmiddellik as een van Jehovah se Getuies. Party verkondigers hou altyd ʼn Bybel of ʼn Wagtoring of Ontwaak! in hulle hand om hulle te identifiseer.
4 Hou mense in die oog wat in die gebied rondslenter. Moenie sommer net in ʼn hyser klim saam met ander wat blykbaar nie in die gebou woon nie. Moenie duur juwele dra nie. As jy in die aand moet uitgaan, moet jy nie in donker strate loop waar daar min verkeer is nie. As jy ʼn slagoffer van straatrowers is, moet jy nie weerstand bied as dit net jou geld of besittings is wat hulle wil hê nie; jou lewe is meer werd as enige materiële besitting.—Mark. 8:36.
5 Broers wat die leiding neem, moet wakker wees en moet altyd weet waar in die gebied die verkondigers is. Dit is gewoonlik raadsaam om die groep in dieselfde gebied te laat werk sodat ander altyd naby is. Indien enige geweld of oproerigheid in die omgewing ontstaan, moet die groep die gebied onmiddellik verlaat.
6 As ons wakker en versigtig is, kan ons voortgaan om diegene in gebiede met ʼn hoë misdaadsyfer te bereik wat ‘sug en steun oor al die gruwels wat gedoen wordʼ.—Eseg. 9:4.