Hou progressiewe tuisbybelstudies
1 Wat het ’n verpleegster in Tanzanië, ’n jong persoon in Argentinië en ’n moeder in Letland met mekaar in gemeen? Die 1997 Yearbook (bl. 8, 46 en 56) berig dat al drie vinnig vooruitgang gemaak het in hulle tuisbybelstudie, danksy hulle gewilligheid om meer as een sessie per week in die Kennis-boek te hê. Verkondigers is aangemoedig om waar moontlik een hoofstuk van die boek gedurende elke studiesessie te probeer bespreek. Dit is egter vir sommige ’n uitdaging. Hoewel baie afhang van die omstandighede en die vermoë van elke student, het ervare onderrigters welslae behaal deur die volgende wenke toe te pas.
2 Soos in die byvoegsel tot Ons Koninkryksbediening vir Junie 1996 be-spreek is, is dit nodig om jou studente te leer hoe om vir die studie voor te berei. Dit sal goed wees om reg aan die begin te verduidelik en te demonstreer hoe dit gedoen word. Wys hulle jou persoonlike studie-eksemplaar van die Kennis-boek. Berei die eerste les saam voor. Help die student om die sleutelwoorde of -frases te vind wat die gedrukte vraag direk beantwoord, en onderstreep of merk dit dan. Sommige verkondigers het selfs vir hulle studente ’n pen gegee om mee voor te berei. Spoor hulle aan om al die tekste na te slaan wanneer hulle vir die studie voorberei. Sodoende sal jy hulle ook leer om voor te berei vir wanneer hulle die Gemeentelike Boekstudie en die Wagtoring-studie bywoon.—Luk. 6:40.
3 ’n Goeie onderrigter sal die student laat praat en nie self te veel praat nie. Hy laat nie toe dat minder belangrike punte hom van die onderwerp laat afdwaal nie. Slegs by uitsondering sal hy ekstra materiaal inbring. Hy beklemtoon eerder die les se hoofpunte. Party het aanvullende lektuur vir studente gegee wat hulle help om antwoorde op vrae te vind. Verder sal belangstellendes ook breedvoerige inligting ontvang deur gemeentelike vergaderinge by te woon.
4 Dit is dalk nie nodig om al die teksverwysings in die les na te slaan nie. Sommige hoofpunte kan deur middel van die aangehaalde tekste in die paragraaf verduidelik word. Beklemtoon gedurende die hersiening die sleuteltekste wat bespreek is en moedig die student aan om hulle te onthou.
5 Hoe lank moet elke sessie duur?: Die studie hoef nie tot ’n uur beperk te word nie. Sommige huisbewoners het tyd tot hulle beskikking en wil dalk langer studeer. Of die student wil dalk meer as een keer per week studeer. Dit sal voordelig wees vir diegene wat dit kan doen.
6 Soos daar in Jesaja 60:8 uitgebeeld word, kom honderdduisende nuwe lowers van Jehovah “aangevlieg . . . soos ’n wolk en soos duiwe na hulle vensters” in die gemeentes van sy volk in. Laat ons almal in noue samewerking met Jehovah ons deel doen terwyl hy die insameling van skaapgeaardes bespoedig.—Jes. 60:22, NW.