Gebruik brosjures om die verstand sowel as die hart te bereik
1 Bybelwaarhede moet só aangebied word dat dit die verstand sowel as die hart bereik. Toe Jesus die waarheid aan sy hoorders verduidelik het, het hy onderwerpe gekies wat hulle geïnteresseer en gemotiveer het (Luk. 24:17, 27, 32, 45). Die sukses van ons bediening hang grootliks af van die moeite wat ons doen om die geestelike behoeftes van ons hoorders te identifiseer.
2 Brosjures kan doeltreffende instrumente wees om die verstand en hart van diegene te bereik wat ons in die bediening ontmoet. Dink vooraf aan wie dalk gunstig sal reageer op die boodskap in elk van die brosjures wat in Augustus aangebied word:
—Gee God werklik vir ons om? Mense wat sukkel om ’n bestaan te voer of wat ’n tragedie beleef het, sal hierdie vertroostende boodskap oor ’n toekoms sonder lyding waardeer.
—Wat is die doel van die lewe?—Hoe kan jy dit vind? Jongmense wat ernstig oor hulle toekoms dink, sal by die Bybelse antwoorde in hierdie brosjure baat vind.
—Jy kan vir ewig op die aarde lewe! Die talle prente en teksverwysings sal jong kinders en diegene met beperkte leesvermoëns help om God se voornemens te verstaan.
—Die regering wat die Paradys gaan bring. Enigiemand wat aan die regering verbonde is, sal dalk gunstig reageer op hierdie boodskap oor hoe God se Koninkryk die mensdom se moeilike probleme gaan oplos.
—Wanneer ’n geliefde sterf. Baie begrafnisondernemers hou graag eksemplare van hierdie brosjure byderhand vir bedroefde families. Verkondigers wat in begraafplase getuig, gebruik hierdie brosjure om treurendes te vertroos. Twee susters het ’n gesin van sewe genader wat by ’n graf gebid het. Omdat die verkondigers vir hulle die vertroostende boodskap in die brosjure gewys het, is ’n Bybelstudie die volgende dag met die moeder begin!
—Moet jy aan die Drie-eenheid glo? ’n Baie godsdienstige persoon sal dalk gunstig reageer op die waarheid in hierdie goed gedokumenteerde brosjure wat die Christendom se grondleerstelling aan die kaak stel.
3 Raak goed vertroud met elke brosjure en bepaal hoe om dit ten beste in julle gebied te gebruik. Sien die agterblad van Ons Koninkryksbediening vir Julie 1998 vir aanbiedings wat jy kan gebruik. Mag Jehovah jou pogings seën om die verstand sowel as die hart van mense te bereik.—Mark. 6:34.