Opsieners wat die leiding neem—die Teokratiese Bedieningskoolopsiener
1 Die Teokratiese Bedieningskoolopsiener is ’n geestelike ouer persoon wat hom toelê op sy spraak- en onderrigtingsvermoë en wat ons respek en samewerking verdien (1 Tim. 5:17). Wat is sy verantwoordelikhede?
2 Hy sien om na die Teokratiese Bedieningskoolbiblioteek by die Koninkryksaal. Dit is sy opregte begeerte om almal wat kwalifiseer aan te spoor om by die skool aan te sluit. Hy sien toe dat ’n akkurate verslag gehou word sodat toewysings ten minste drie weke voor elke skoolsessie op ’n ordelike manier gedoen word. Hy moet die gemeente goed ken en elke student en sy vermoëns in gedagte hou. Hoewel ’n ander broer hom kan help om die skoolrooster voor te berei, is dit sy verantwoordelikheid om seker te maak dat die dele reg toegewys word.
3 Om die skool op bekwame wyse te lei, moet die opsiener elke week goed voorberei en ’n deeglike studie van die toegewese materiaal maak. Dit stel hom in staat om die gemeente geesdriftig te hou oor die leerplan, om vas te stel of die toegewese materiaal akkuraat oorgedra word en om die belangrike punte in die skriftelike hersiening te beklemtoon.
4 Ná elke studentetoespraak sal die opsiener die student bedank en verduidelik waarom ’n sekere spraakhoedanigheid goed was of verbeter moet word. Wanneer enigiemand bykomende hulp nodig het om sy skooltoewysing voor te berei, kan die opsiener of iemand wat hy toewys persoonlike hulp verleen.
5 As ons ten volle baat wil vind by die harde werk van die Teokratiese Bedieningskoolopsiener en enige ander raadgewers wat onder sy leiding dien, moet ons die skool gereeld bywoon. Ons moet ook al ons toewysings nakom en die raad wat ons ontvang sowel as wat aan ander studente gegee word, toepas. Sodoende sal ons ons vermoë om die Koninkryksboodskap in die openbaar en van huis tot huis te verkondig geleidelik verbeter.—Hand. 20:20; 1 Tim. 4:13, 15.