Vergaderinge strek jongmense tot voordeel
1 ’n Tienermeisie het gesê: “Soms dink ek dat jongmense dit die moeilikste in die lewe het. Ons is tussen mense wat onsedelik lewe en dwelms en alkohol misbruik.” Voel jy ook so? Indien wel, wat dink jy sal jou help om teen hierdie slegte invloede te stry? Jy het geloof nodig, sterk geloof dat Jehovah se weë reg is, want daarsonder “is dit onmoontlik om vir hom welbehaaglik te wees” (Heb. 11:6). Vergaderingbywoning sal help om jou in jou Christelike oortuigings te versterk en jou meer vasbeslote maak om wat sleg is te vermy.
2 Vergaderinge hou vir jou groot voordele in: Wat maak ’n lekker maaltyd saam met goeie vriende aangenaam? Is dit nie die kombinasie van smaaklike kos en aangename geselskap in ’n ontspanne atmosfeer nie? Wel, ons vergaderinge bied dieselfde aangename ervaring, maar in geestelike sin.
3 Die gedagtes wat by die vergaderinge bespreek word, is opbouend en handel oor ’n wye reeks onderwerpe, van alledaagse lewensprobleme tot die studie van boeiende Bybelprofesieë. Praktiese onderrigting word gegee wat jou leer hoe om jou lewe op die beste manier te lei en die uitdagings waarvoor jy te staan kom die hoof te bied. Ons vind die heel beste metgeselle by die vergaderinge, en die geestelike atmosfeer is aangenaam en veilig (Ps. 133:1). Dit is geen wonder nie dat een jong persoon gesê het: “Ek is die hele dag by die skool, en dit breek my af. Maar die vergaderinge is soos ’n oase in die woestyn waar ek verkwik word sodat ek by die skool deur die volgende dag kan kom.” ’n Ander een het gesê: “Ek het gevind dat noue omgang met ander mense wat vir Jehovah lief is my help om na aan hom te bly.”
4 As jy vir die Teokratiese Bedieningskool ingeskryf is, leer jy om inligting uit die Bybel te versamel, dit tot ’n toespraak te ontwikkel en dit dan op geselstrant vir ’n gehoor by die Koninkryksaal aan te bied. Dink net hoe nuttig dit is om opgelei te word om die lewensreddende waarhede in God se Woord op bekwame wyse aan ander te leer! Waar anders kan jongmense sulke waardevolle opleiding ontvang?
5 Hoe om die grootste nut uit vergaderinge te trek: Daar is drie noodsaaklike dinge wat ons moet doen om die grootste voordeel uit vergaderinge te trek. Dit is voorbereiding, deelname en toepassing.
6 Berei voor: Sit tyd opsy om gereeld vir die vergaderinge voor te berei. Moenie toelaat dat huiswerk, ’n deeltydse werk of ontspanning jou van die tyd beroof wat jy nodig het om vooraf deur die materiaal te gaan wat by elke vergadering bespreek gaan word nie. Dit help om ’n goeie roetine te hê. Die heel belangrikste is dat jy bybly by die weeklikse Bybelleesrooster vir die Teokratiese Bedieningskool. Dit neem net ’n paar minute elke dag om die toegewese hoofstukke te lees en daaroor te peins. Sit tyd opsy om vir die Gemeentelike Boekstudie en die Wagtoring-studie voor te berei. Party doen dit ten minste ’n dag of twee voor hierdie vergaderinge. Doen sover moontlik dieselfde vir die dele wat elke week in die Diensvergadering bespreek gaan word.
7 Neem daaraan deel: Die Bybel sê dat Jesus op 12-jarige ouderdom in die tempel gevind is waar hy geluister het, vrae gevra en antwoorde gegee het (Luk. 2:46, 47). Met ander woorde, hy was heeltemal betrokke. Jy sal meer by die vergaderinge baat vind as jy ’n poging aanwend om daaraan deel te neem.—Spr. 15:23.
8 Jy moet noukeurig aandag skenk aan wat by die vergaderinge geleer word. Soms is dit moeiliker om na ’n toespraak te luister as om die toespraak te hou. Waarom? Jou gedagtes dwaal dalk wanneer iemand anders praat. Hoe kan jy hierteen stry? Deur aantekeninge te maak. Skryf belangrike punte neer waarna jy later wil verwys. As jy aantekeninge maak, sal dit jou help om op die program te konsentreer. Slaan ook die tekste na en volg saam in jou Bybel wanneer die spreker dit lees.
9 Daarbenewens moet jy dit jou doelwit maak om aan elke vraag-en-antwoord-bespreking by die vergaderinge deel te neem. Jy sal selfs meer daarby baat vind as jy goed nadink oor wat jy wil sê. Spreuke 15:28 sê: “Die hart van die regverdige dink na om te antwoord.”
10 Pas toe wat jy leer: Die laaste stap is om seker te maak dat die dinge wat jy leer ‘in jou aan die werk is’ (1 Tess. 2:13). Namate jy die goeie punte toepas wat jy by elke vergadering leer, sal jy nader aan Jehovah God kom. Hy sal vir jou ’n werklike persoon wees, en jy sal groot vreugde en bevrediging daaruit put as jy “voortgaan om in die waarheid te wandel” en dit jou eie te maak.—3 Joh. 4.
11 Jong broers en susters, as julle gereeld vir die vergaderinge voorberei, daaraan deelneem en toepas wat julle leer, sal julle die vergaderinge terdeë geniet. Terselfdertyd sal julle die groots moontlike voordeel daaruit kry. Julle geloof sal versterk word, asook julle voorneme om getrou te bly aan julle hemelse Vader, Jehovah.—Ps. 145:18.