Herinneringe oor die vereenvoudigde reëling vir lektuurverspreiding
1 Ons opdrag is om die goeie nuus van die Koninkryk te verkondig en dissipels te maak (Matt. 24:14; 28:19, 20). Ons is baie bly om die ontsaglike toename in lektuur- en tydskrifverspreiding te sien sedert ons met die vereenvoudigde reëling vir lektuurverspreiding begin het. Baie meer mense word sodoende met die goeie nuus bereik. Hoe werk die vereenvoudigde reëling vir lektuurverspreiding in julle gemeente? Baie het hulle waardering hiervoor uitgespreek. Die grootste voordeel is dat elkeen in die gemeente nou ’n eksemplaar van Die Wagtoring en die Daniël-boek kan hê vir hulle gemeentelike vergaderinge, of hulle nou genoeg kan bydra om die koste van hierdie publikasies te dek of nie. Dit stel almal in die gemeente in staat om goeie geestelike vooruitgang te maak.
2 Baie wonder hoe dit met die bydraes gaan noudat ons die lektuur en tydskrifte kosteloos versprei? Talle gemeentes doen baie goed en stuur meer bydraes as voorheen. Maar noudat byna twee keer soveel lektuur na die gemeentes gestuur word, kan ons verwag dat daar meer bydraes vir die wêreldwye werk sal inkom. Maar in Suid-Afrika gebeur dit nie op die oomblik nie.
3 Dit laat die vraag ontstaan: “Wie se verantwoordelikheid is dit om die koste te dek van die lektuur en tydskrifte wat ons versprei? Toe die vereenvoudigde reëling vir lektuurverspreiding ingestel is, het die Bestuursliggaam gesê: “Jehovah se toegewyde knegte is die hoofbron van hierdie ondersteuning.” Hulle het voorts gesê: “Ons almal moet verantwoordelik voel vir wat ons neem.” Wanneer ons dus lektuur of tydskrifte neem, moet ons persoonlik verantwoordelik voel om ’n bydrae in te gooi in die bussies wat gemerk is “Bydraes vir die Genootskap se wêreldwye werk—Matt. 24:14”. Moet ons dan nie, as ons nie die koste van die lektuur en tydskrifte wat ons ontvang ten volle kan dek nie, ten minste soveel as wat ons kan daarvoor bydra nie? As ons nie seker is wat ’n item kos nie, het ons die geleentheid om ons voorbeeld, Jesus Christus, na te volg deur meer te gee as wat nodig is.—Vergelyk Matteus 14:14-21; 1 Petrus 2:21.
4 Daarbenewens, wanneer ons ons Bybelpublikasies in die veld aanbied en mense ons vra hoeveel dit kos, sê ons vir hulle dat ons dit kosteloos versprei. Ons voeg egter by dat ons wêreldwye werk deur vrywillige bydraes ondersteun word en dat hulle ’n klein bydrae vir ons wêreldwye predikingswerk kan gee as hulle wil, wat hulle dan in ons koevert kan gooi. Ons moet altyd ’n koevert vir hierdie doel by ons hê. Al hierdie geld moet dan ook in die bydraebussies gegooi word wat gemerk is “Bydraes vir die Genootskap se wêreldwye werk—Matt. 24:14”. Ons eie bydrae sowel as dié uit die veld behoort die Genootskap in staat te stel om voort te gaan om lektuur en tydskrifte te druk en na die wêreldwye predikingswerk om te sien. Twee toegewyde broers moet hierdie bussies oopmaak, saam die geld tel, ’n kwitansie daarvoor uitmaak en ’n afskrif daarvan saam met die geld aan die rekeningkneg oorhandig.
5 Watter beskouing moet ons hê wanneer ons ’n luukse uitgawe van die Bybel, Insight-bundels, Wagtoring- en Ontwaak!-bundels en ander duur items wil hê? Wel, vra jou af: ‘Sou ek hierdie duur items gekoop het voor die vereenvoudigde reëling vir lektuurverspreiding in werking getree het? Is ek nou in staat om ’n gepaste bydrae te maak om die koste van hierdie publikasies te dek?’ Byvoorbeeld, in plaas van ’n luukse uitgawe van die Bybel te neem, waarom nie tevrede wees met die gewone uitgawe nie? As gesinne Engels kan lees en werklik by die Insight-bundels baat kan vind, kan hulle een stel vir die gesin neem. Dit geld ook vir ander duur items soos kassette en video’s. Ons moet almal versigtig wees dat ons nie sulke items neem net omdat daar nie van ons verwag word om oor die toonbank daarvoor te betaal nie. Ons moet nog steeds verantwoordelik voel om die koste van sulke items na die beste van ons vermoë te dek.
6 Kan ons van die geld in die bydraebussies gemerk “Bydraes vir die Genootskap se wêreldwye werk—Matt. 24:14” gebruik om die Koninkryksaallening of ander gemeentelike uitgawes te betaal? Nee, dit sal nie reg wees nie. Die geld in hierdie bussies behoort nie aan die gemeente nie, maar aan die Genootskap vir die wêreldwye predikingswerk en moet aan die einde van die maand aan die Genootskap gestuur word. Dit mag nie vir enige ander doel gebruik word nie. Koninkryksaaluitgawes moet gedek word deur bydraes in die bussie gemerk “Bydraes vir gemeente”.
7 Ons is baie bly oor die vereenvoudigde reëling vir lektuurverspreiding. Laat ons almal ons waardering daarvoor toon deur by te dra vir die lektuur en tydskrifte wat ons vir ons eie gebruik en vir velddiens neem.