Voer jy jou bediening deeglik uit?
1 In die boek Handelinge word daar vir ons gesê dat Jesus se dissipels hulle bediening uitgevoer het deur “deeglik [te] getuig” vir die mense (Hand. 2:40; 8:25; 28:23). Dit was beslis die apostel Paulus se doelwit (Hand. 20:24). Is dit nie ook jou doelwit as ’n bedienaar van die goeie nuus nie? Hoe kan jy dit bereik?
2 Berei jou aanbieding voor: Voorbereiding is belangrik om te verseker dat jy ’n goeie getuienis in die bediening gee. Dit is veral die geval wanneer ons die tydskrifte aanbied, aangesien die onderwerpe voortdurend verander. Om ons te help om beter toegerus te wees, sal daar van nou af iets nuuts in Ons Koninkryksbediening verskyn—die kolom aan die linkerkant wat aanbiedings vir die huidige nommers van Die Wagtoring en Ontwaak! bevat. Dit sal die aandag vestig op ’n tydige onderwerp wat by baie mense byval sal vind in elke nommer. Hoe kan jy hierdie kort aanbiedings verder ontwikkel?
3 Kies een wat jy meen die doeltreffendste in julle gebied sal wees. Lees noukeurig deur die artikel wat gebruik word, en let op spesifieke punte wat waarskynlik belangstelling sal wek. Soek ’n teksverwysing in die tydskrif wat by die bespreking pas en wat jy vir die huisbewoner kan lees. Ten slotte kan jy jou luisteraar aanspoor om die tydskrif te lees en, indien gepas, kortliks verduidelik dat die huisbewoner tot die wêreldwye werk van Jehovah se Getuies kan bydra. Oefen nou jou aanbieding.
4 Beplan om die Bybel te gebruik: Met goeie beplanning kan ’n teks dikwels in jou aanbieding ingesluit word. Byvoorbeeld, ervare verkondigers op baie plekke behaal sukses deur met hulle Bybel in die hand na die deur te gaan, die huisbewoner te groet en te sê:
◼ “Ons vra mense of hulle dít glo . . . ” Lees Genesis 1:1 en vra dan: “Stem jy saam met hierdie woorde?” As die persoon saamstem, kan jy sê: “Ek glo dit ook. Maar as God alles geskep het, dink jy dat hy dan ook vir goddeloosheid verantwoordelik is?” Nadat jy waardering vir die persoon se antwoord uitgespreek het, kan jy Prediker 7:29 lees. Blaai in die Kennis-boek na bladsy 71 en lees paragraaf 2. Moedig die persoon aan om die boek te lees. As die huisbewoner nie met die woorde in Genesis 1:1 saamstem nie, kan jy hom aanspoor om die Skepping-boek te ondersoek.
5 Gaan terug na alle belangstellendes: Jy kan nie jou bediening ten volle uitvoer as jy nie teruggaan na belangstellendes nie. Wanneer jy ’n goeie bespreking gehad het, moet jy ’n aantekening maak van die persoon se naam en adres, ongeag of jy tydskrifte of ander lektuur daar gelaat het. Doen alles in jou vermoë om die persoon se belangstelling lewendig te hou deur gou terug te gaan. En bied gerus ’n Bybelstudie aan.
6 Die eerste-eeuse dissipels het geweet dat Jesus hulle beveel het om “’n deeglike getuienis te gee” (Hand. 10:42). Daardie selfde opdrag is op ons van toepassing, want dit is die enigste manier waarop ons dissipels sal kan maak (Matt. 28:19, 20). Laat ons ons uiterste bes doen om ons bediening deeglik uit te voer.—2 Tim. 4:5.