Volg Jehovah se geregtigheid na
1 “Jehovah het geregtigheid lief” (Ps. 37:28). Daarom het hy, hoewel hy bepaal het dat hierdie onregverdige wêreld vernietig moet word, gereël dat ’n waarskuwing eers gegee word (Mark. 13:10). Dit bied mense die geleentheid om berou te toon en gered te word (2 Pet. 3:9). Streef ons daarna om Jehovah se geregtigheid na te volg? Beweeg die ellende en lyding van die mensdom ons om ander van die Koninkrykshoop te vertel? (Spr. 3:27). Liefde vir geregtigheid sal ons aanspoor om ywerig aan die predikingswerk deel te neem.
2 Getuig onbevooroordeeld: Deur God se voorneme onbevooroordeeld aan almal bekend te maak, ‘beoefen ons geregtigheid’ (Miga 6:8). Ons moet die onvolmaakte neiging weerstaan om ander op grond van hulle voorkoms te beoordeel (Jak. 2:1-4, 9). Jehovah se “wil . . . is dat alle soorte mense gered moet word en tot juiste kennis van die waarheid moet kom” (1 Tim. 2:4). God se woord van waarheid kan merkwaardige veranderinge in die lewe van mense meebring (Heb. 4:12). As ons dit besef, kan dit ons beweeg om mense met vertroue te nader, selfs diegene wat in die verlede dalk nie na ons wou luister nie.
3 ’n Suster wat in ’n winkel werk, is ietwat afgeskrik deur die voorkoms van ’n gereelde klant. Maar toe die gepaste geleentheid hom voordoen, het sy vir hom probeer getuig oor God se beloofde Paradys. Hy het kortaf geantwoord dat hy nie in sprokiesverhale glo nie en dat hy ’n hippie en dwelmslaaf is. Maar sy het nie moed opgegee nie. Eendag het hy haar gevra wat sy van sy lang hare dink, en sy het taktvol verduidelik wat die Bybel daaroor sê (1 Kor. 11:14). Sy was aangenaam verras toe hy die volgende dag gladgeskeer was en kort hare gehad het! Hy het ’n Bybelstudie gevra, wat ’n broer met graagte gehou het, en hy het tot toewyding en doop gevorder. Soos hierdie man is baie wat Jehovah vandag dien, dankbaar vir die onbevooroordeelde, volgehoue pogings van diegene wat die Koninkryksboodskap aan hulle verkondig het.
4 Jehovah sal onregverdigheid binnekort van die aarde af uitwis (2 Pet. 3:10, 13). Mag ons, in die min tyd wat oor is, Jehovah se geregtigheid navolg deur almal die geleentheid te gee om aan die komende vernietiging van Satan se onregverdige wêreld te ontkom.—1 Joh. 2:17.