Vraebus

◼ Hoe moet ons na gemeentelike toewysings omsien?

Die ordelike werking van ’n gemeente van Jehovah se volk is die gevolg van verenigde pogings (1 Kor. 14:33, 40). Dink aan alles wat by net een gemeentelike vergadering betrokke is. Behalwe die werk wat in verband met die program self gedoen word, word baie ander dinge voor en ná die vergadering gedoen terwyl broers en susters na verskillende toewysings omsien. Ander take wat verrig word sonder dat mense dit raaksien, is ook belangrik. Hoe kan elkeen van ons hierdie reëling ondersteun?

Stel jou beskikbaar. Diegene wat ’n gewillige gees het, sal baie vind om te doen (Ps. 110:3). Toon besorgdheid oor die siekes en bejaardes. Help om die Koninkryksaal skoon te maak. Ons kan talle nuttige dinge doen sonder dat ons gevra word. Ons moet net die begeerte hê om te help.

Dien met beskeidenheid. Mense wat beskeie is, dien ander met graagte (Luk. 9:48). Beskeidenheid sal verhoed dat ons meer aanpak as wat ons werklik kan behartig. Beskeidenheid sal ook voorkom dat ons die perke van ons gesag oorskry.—Spr. 11:2.

Wees betroubaar. Moses is aangespoor om “betroubare manne” te kies om in verantwoordelike posisies in eertydse Israel te dien (Eks. 18:21). Hierdie selfde eienskap is vandag nodig. Jy moet elke toewysing wat jy ontvang, pligsgetrou uitvoer (Luk. 16:10). As jy nie ’n toewysing kan uitvoer nie, moet jy seker maak dat gepaste reëlings getref word sodat iemand anders in jou afwesigheid daarna kan omsien.

Gee jou beste. Christene word aangespoor om met hulle hele siel te werk, selfs wanneer dit by sekulêre aangeleenthede kom (Kol. 3:22-24). Daar is selfs meer rede om dit te doen wanneer ’n mens ter bevordering van ware aanbidding werk. Al lyk dit na ’n nederige of onbelangrike taak wat verrig moet word, is dit vir die gemeente ’n seën wanneer dit goed gedoen word.

Elke toewysing gee ons die geleentheid om ons liefde vir Jehovah en ons broers te toon (Matt. 22:37-39). Mag ons al die take wat aan ons toevertrou word, getrou uitvoer.