Leer ander om Jehovah lief te hê
1. Wat trek sommige mense tot Jehovah aan?
1 Onthou jy die eerste keer toe jy van Jehovah gehoor het? Wat het jou tot hom aangetrek? Talle opregtes van hart sal vir jou sê dat hulle nader aan ons Skepper gekom het toe hulle kennis ingeneem het van sy weergalose eienskappe, veral sy medelye en liefde.—1 Joh. 4:8.
2, 3. Hoe kan ons die Leer Bybel-boek gebruik om Bybelstudente te help om groter liefde vir Jehovah aan te kweek?
2 “Dit is ons God”: Die Leer Bybel-boek beklemtoon Jehovah se liefde, asook die feit dat ons ’n persoonlike verhouding met hom moet hê. Hoe kan ons hierdie publikasie gebruik om ander te leer om groter liefde vir God aan te kweek? Wanneer ons ’n nuwe punt bespreek, kan ons vrae vra wat opregte selfondersoek aanmoedig, soos: “Wat toon hierdie waarheid omtrent Jehovah?” of “Hoe bewys hierdie punt dat Jehovah die beste Vader is wat enigiemand kan hê?” As ons op hierdie manier onderrig, kan dit die student help om ’n lewenslange verhouding met Jehovah te begin.
3 Wanneer ons Bybelstudente help om te besef wat ’n voorreg dit is om kennis in te neem van die enigste ware en lewende God, sal hulle, soos Jesaja, erken: “Dit is ons God” (Jes. 25:9). Wanneer ons God se Woord verduidelik, moet ons beklemtoon hoe die mensdom geseën sal word wanneer Jehovah se voorneme deur middel van sy koninklike regering onder Jesus Christus vervul word.—Jes. 9:6, 7.
4, 5. Wat beteken dit om Jehovah lief te hê?
4 Bewys van liefde vir Jehovah: Ons weet dat om Jehovah met jou hele hart, siel en verstand lief te hê, meer behels as om net sterk gevoelens vir God te hê. Ons moet sy denkwyse aanneem en dit volg (Ps. 97:10). Ons wys dat ons vir God lief is as ons sy gebooie streng gehoorsaam en voortdurend bewys lewer van “heilige gedrag en dade van godvrugtige toegewydheid”, selfs wanneer ons beproewinge of teenstand ondervind.—2 Pet. 3:11; 2 Joh. 6.
5 Wanneer ons God se wil uit liefde doen, is dit ’n plesier (Ps. 40:8). Die Bybelstudent moet besef dat al God se gebooie vir die ewige voordeel van Sy knegte bedoel is (Deut. 10:12, 13). As ’n persoon sy lewe volgens Jehovah se leiding rig, toon hy diepe waardering vir al Sy wonderlike werke. Help die student om te verstaan dat dit hom baie pyn en hartseer sal spaar as hy in Jehovah se regverdige weë wandel.
6. Watter seëninge kan ’n persoon ontvang omdat hy Jehovah liefhet?
6 Seëninge vir dié wat God liefhet: Jehovah gee baie om vir nederiges van hart wat hom liefhet, en hy openbaar “die diep dinge van God” aan hulle (1 Kor. 2:9, 10). Met hierdie kennis van Jehovah se voornemens het hulle ’n helder blik op die toekoms en ’n vaste hoop (Jer. 29:11). Diegene wat Jehovah liefhet, ontvang sy uitsonderlike goedhartigheid (Eks. 20:6). Weens God se groot liefde vir hulle koester hulle die hoop op die ewige lewe.—Joh. 3:16.
7. Hoe voel jy daaroor om ander te leer om Jehovah lief te hê?
7 Hoe meer ons omtrent ons hemelse Vader leer, hoe meer het ons om ander te vertel (Mat. 13:52). Wat ’n onskatbare voorreg is dit tog om ander, veral ons kinders, te leer om Jehovah lief te hê! (Deut. 6:5-7). Mag ons, tesame met ons Bybelstudente, altyd lof laat uitborrel namate ons ‘Jehovah se oorvloedige goedheid’ ervaar.—Ps. 145:7.