Hoe om doeltreffende Bybelstudies te hou
1. Watter verantwoordelikheid het verkondigers wat Bybelstudies hou?
1 Niemand kan God dien tensy Jehovah “hom trek nie” (Joh. 6:44). Verkondigers wat Bybelstudies hou, moet nietemin hulle deel doen om mense te help om nader aan hulle hemelse Vader te kom (Jak. 4:8). Dit vereis voorbereiding. Om net elke paragraaf te lees en die gedrukte vraag te vra, is nie genoeg om ons studente te help om die boodskap te verstaan en vordering te maak nie.
2. Wat sal deur ’n doeltreffende Bybelstudie bereik word?
2 Om doeltreffende studies te hou, moet verkondigers hulle studente help om (1) te verstaan wat die Bybel leer, (2) te aanvaar wat die Bybel leer en (3) toe te pas wat die Bybel leer (Joh. 3:16; 17:3; Jak. 2:26). Dit kan maande neem om iemand deur hierdie stappe te lei. Maar elke stap help hom om ’n verhouding met Jehovah op te bou en hom uiteindelik aan Jehovah toe te wy.
3. Waarom vra doeltreffende onderrigters beskouingsvrae?
3 Wat dink die Bybelstudent?: As ons wil sien of ons Bybelstudent verstaan en aanvaar wat hy leer, moet ons nie al die praatwerk doen nie, maar hom eerder aanspoor om te sê wat hy dink (Jak. 1:19). Verstaan hy wat die Bybel sê oor die onderwerp wat julle bespreek? Kan hy dit in sy eie woorde verduidelik? Hoe voel hy oor wat hy geleer het? Glo hy dat wat die Bybel leer, redelik is? (1 Tess. 2:13). Verstaan hy dat die dinge wat hy leer, ’n verskil aan sy lewenswyse moet maak? (Kol. 3:10). Om antwoorde op hierdie vrae te kry, moet ons taktvolle beskouingsvrae vra, en dan luister.—Matt. 16:13-16.
4. Wat moet ons doen as ’n student dit moeilik vind om ’n Bybellering te verstaan of toe te pas?
4 ’n Persoon se gewoontes en denkwyse is dikwels diepgewortel, en dit neem tyd om dit te verander (2 Kor. 10:5). Sê nou ons student aanvaar nie wat hy geleer word of pas dit nie toe nie? Ons moet geduldig wees en ’n redelike tyd toelaat sodat God se Woord en heilige gees ’n uitwerking op die student se hart kan hê (1 Kor. 3:6, 7; Heb. 4:12). As die student dit moeilik vind om ’n Bybellering te verstaan of toe te pas, moet ons nie druk op hom plaas nie. Dit is dikwels beter om dan ’n ander onderwerp te bespreek. As ons aanhou om hom geduldig en liefdevol uit die Bybel te leer, sal hy dalk ná verloop van tyd beweeg word om die nodige aanpassings te maak.