Christelike liefde ten tye van natuurrampe

AARDBEWINGS, tsoenami’s en vulkane ontwrig dikwels die lewe in Indonesië. Wanneer daar ’n ramp is, is Jehovah se Getuies gou om diegene te help wat daardeur geraak word, veral hulle geestelike broers. Byvoorbeeld, in 2005 het ’n groot aardbewing Gunungsitoli, die grootste dorp op Niaseiland, in Noord-Soematra, heeltemal vernietig. Gemeentes op die naburige eiland Soematra en die takkantoor het onmiddellik noodlenigingsvoorraad na die rampgebied gestuur. Die plaaslike kringopsiener en ’n takverteenwoordiger het na die eiland gevlieg om die broers aan te moedig en te vertroos. “Mense om ons was vreesbevange”, sê Yuniman Harefa, ’n ouer man op Nias. “Maar die vinnige reaksie van God se organisasie het ons verseker dat ons nie alleen is nie.”