Die toewyding van takkantore

“MY HART loop oor van vreugde”, het ’n suster gesê wat die toewydingsprogram van die takkantoor in Madagaskar op Saterdag 24 Januarie 2015 bygewoon het. Sy en 583 ander gaste was opgewonde om die nuwe woongebou met 19 kamers sowel as die vergrote eetsaal en die opgeknapte kombuis te sien. Nog kantore is vir die Diens- en Rekeningafdeling en die Plaaslike Kantoor vir Ontwerp en Konstruksie gebou. Daar is ook nuwe ateljees vir die Oudio/Video- en Gebaretaalafdeling gebou, en die broers het begin om braillepublikasies te maak. Nadat die gaste na ’n oorsig van die geskiedenis van die predikingswerk in Madagaskar geluister het, het Mark Sanderson van die Bestuursliggaam die toewydingstoespraak gelewer.

Jehovah se volk in Djakarta, Indonesië, was verlig toe die hoë watervlak, weens oorstromings in die stad, gesak het net voor die toewyding van die nuwe takfasiliteite op 14 Februarie 2015. Een van die vloere van ’n 42-verdieping kantoorgebou dien nou as die takkantoor, en 12 vloere van ’n nabygeleë woonstelgebou word vir behuising gebruik. Kleiner nabygeleë geboue word vir verskeie Bethelafdelings gebruik. Anthony Morris van die Bestuursliggaam het die toewydingstoespraak gehou, en die volgende dag het 15 257 mense by ’n sokkerstadion bymekaar gekom om te luister na sy toespraak met die titel “Volhard in goeie werk”. ’n Gehoor van 11 189 het op 41 ander plekke deur middel van videoverbinding na die program gekyk. Dit was dus die grootste samekoms van Jehovah se volk wat nog ooit in Indonesië gehou is. Ronald Jacka, een van die eerste sendelinge in Indonesië, het gesê: “Toe ek in 1951 hier aangekom het, was daar net 26 verkondigers in die hele land. Maar vandag het meer as 26 000 mense hierdie spesiale program bygewoon. Jehovah het waarlik sy volk in Indonesië geseën!”