Vuurwapens—’n wêreld daarsonder
VAN die begin van die mensegeskiedenis af gebruik die mens geweld teenoor sy medemens. Moord het in die eerste gesin kop uitgesteek toe Kain sy broer Abel doodgemaak het. Die slagting het sedertdien voortgeduur—in gesinne, in stamme en tussen nasies. Namate die wapens kragtiger geword het, het die slagoffers al hoe meer geword. Klippe en knuppels het plek gemaak vir spiese en pyle, wat deur vuurwapens en bomme vervang is. Die vernietiging van honderde het dié van duisende geword; vandag het die duisende miljoene geword. En nie net in oorlog nie, maar ook gedurende vredestyd. Nie net deur soldate nie, maar ook deur gewone burgers. Nie net deur volwassenes nie, maar ook deur kinders. Sal die toename in geweld ooit eindig? As dit van mense afhang, is die vooruitsigte sleg.—2 Timotheüs 3:1-5, 13.
Christus Jesus het voorspel dat ons dag ’n tyd sou wees wanneer nasies teen ander nasies sou opstaan in verskriklike oorloë wat die lewens van miljoene sou vernietig. Pessiektes en aardbewings sou in baie plekke swaar verliese meebring. Die mens sou die aarde in so ’n mate besoedel dat die aarde se vermoë om lewe self te onderhou, bedreig sou word—baie wetenskaplikes spreek nou daardie vrees uit. Maar die mens se geldgierigheid veroorsaak dat hy sonder ophou met sy vernietigende besoedeling voortgaan, en dit sal slegs eindig wanneer Jehovah God self ingryp “om die verderwers van die aarde te verderf”.—Openbaring 11:18.
Talle spot met sulke waarskuwings en vervul sodoende ’n ander deel van die voorspelde teken van die laaste dae: “Dit moet julle veral weet, dat daar aan die einde van die dae spotters sal kom wat volgens hulle eie begeerlikhede wandel en sê: Waar is die belofte van sy wederkoms? Want vandat die vaders ontslaap het, bly alles soos dit was van die begin van die skepping af.”—2 Petrus 3:3, 4.
Maar agter hierdie donker wolk wat oor die mensdom hang, skyn die son tog. Jesus het voorspel dat daar tydens sy teenwoordigheid “op die aarde benoudheid van nasies in hulle radeloosheid [sal wees], wanneer see en branders dreun, en mense se harte beswyk van vrees en verwagting van die dinge wat oor die wêreld kom”. Maar hy het ook gesê dat dit ’n tyd sal wees ‘om na bo te kyk en ons hoofde op te hef, omdat ons verlossing naby is’.—Lukas 21:25-28.
Die nasies is in benoudheid, die massas is in beroering en individue is beangs oor die dinge wat oor die aarde kom, maar dit is ’n tyd van verlossing vir diegene wat op die komende Koninkryk van God en die Duisendjarige Heerskappy van Christus Jesus wag. Dit sal die tyd wees vir die vervulling van Jehovah God se belofte van “nuwe hemele en ’n nuwe aarde waarin geregtigheid woon”.—2 Petrus 3:13.
En geen vuurwapens nie! Dit sal glad nie nodig wees vir oorlog nie. “[Hy laat] die oorloë . . . ophou tot by die einde van die aarde, [hy sal] die boog verbreek en die spies stukkend slaan, die strydwaens met vuur verbrand.”—Psalm 46:10.
Geen vuurwapens sal nodig wees vir persoonlike beskerming nie. “Hulle sal sit elkeen onder sy wingerdstok en onder sy vyeboom, sonder dat iemand hulle verskrik; want die mond van die HERE van die leërskare het dit gespreek.”—Miga 4:4.
Net die opregtes, nie een van die goddeloses nie, sal daar wees. “Die opregtes sal die land bewoon, en die regskapenes daarin oorbly, maar die goddelose sal uit die land uitgeroei, en die ontroues sal daaruit weggeruk word” (Spreuke 2:21, 22). “Die ootmoediges daarenteen sal die aarde besit en hulle verlustig oor groot vrede.”—Psalm 37:11.
In God se oë verderf geweld die aarde. In Noag se dag was “die aarde . . . verdorwe voor die aangesig van God, en die aarde was vol geweld” (Genesis 6:11-13). Gevolglik het Jehovah daardie wêreld met ’n wêreldvloed beeindig. Jesus het die einde van hierdie hedendaagse gewelddadige wêreld gedurende sy teenwoordigheid vergelyk met die einde van daardie eertydse wêreld: “Want net soos hulle was in die dae voor die sondvloed toe hulle geëet en gedrink het, getrou en in die huwelik uitgegee het, tot op die dag dat Noag in die ark gegaan het, en dit nie verstaan het [“geen ag daarop geslaan het”, NW] voordat die sondvloed gekom en almal weggevoer het nie, so sal ook die koms van die Seun van die mens wees.”—Mattheüs 24:38, 39.
In God se nuwe wêreld sal almal wat lewe Markus 12:31 vervul: “Jy moet jou naaste liefhê soos jouself.” En Jesaja 11:9: “Hulle sal geen kwaad doen of verderf aanrig op my hele heilige berg nie; want die aarde sal vol wees van die kennis van die HERE soos die waters die seebodem oordek.” En die glorieryke toestande wat in Openbaring 21:1, 4 beskryf word, sal ook in daardie nuwe wêreld van geregtigheid vervul word: “Ek het ’n nuwe hemel en ’n nuwe aarde gesien, want die eerste hemel en die eerste aarde het verbygegaan; en die see was daar nie meer nie. En God sal al die trane van hulle oë afvee en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.” Dan sal daar gewis geen mensegemeenskappe vol vuurwapens wees nie!
Nie een van hierdie betekenisvolle veranderinge tot seën van die mens sal bewerkstellig word deur oproermakers wat die teenparty met hulle knetterende vuurwapens afmaai nie. Dit is eerder Jehovah God wat dit deur sy Koninkryk in die hande van Christus Jesus sal teweegbring. Jesaja 9:5, 6 sê gevolglik: “’n Kind is vir ons gebore, ’n Seun is aan ons gegee; en die heerskappy is op sy skouer, en Hy word genoem: Wonderbaar, Raadsman, Sterke God, Ewige Vader, Vredevors—tot vermeerdering van die heerskappy en tot vrede sonder einde, op die troon van Dawid en oor sy koninkryk, om dit te bevestig en dit te versterk deur reg en deur geregtigheid, van nou af tot in ewigheid. Die ywer van die HERE van die leërskare sal dit doen.”