Wat kan jy omtrent herstelwerk aan die huis doen?
’NWYSE man van die ou tyd het gesê: “Alles het sy bepaalde uur” (Prediker 3:1). Hoe waar is dit tog wanneer dit by herstelwerk aan die huis kom! As herstelwerk aan jou huis nie onmiddellik gedoen word nie, kan dit duurder en meer tydrowend word. Die oplossing?
Stel ’n rooster op vir voorkomingsinstandhouding, en hou dan by die “bepaalde” tyd om dit te doen. Jy kan die dae wanneer jy sulke werk beplan op jou kalender aanteken. Dit sal die ander lede van jou gesin betyds daarvan in kennis stel sodat hulle beskikbaar sal wees om te help waar nodig.
Daar is twee gulde reëls vir behoorlike instandhouding van die huis. Eerstens, voorkom soveel probleme moontlik voordat hulle opduik. En tweedens, pak die probleme wat wel ontstaan so gou moontlik aan. Inspekteer jou huis versigtig in die lente of in die herfs, en skenk veral aandag aan die dak. Lekplekke kan nie net die binnekant van jou huis beskadig nie, maar dit kan ook die mure en buitekant van die gebou beskadig.
Behalwe jou jaarlikse dakinspeksie moet jy ook die dak na ’n kwaai stormwind nagaan. Hoewel jy moontlik geringe herstelwerk op ’n plat dak kan doen, is ’n betroubare kontrakteur beter toegerus om ’n meer permanente oplossing vir dakprobleme te waarborg.
As jou huis deur bome omring word, kan daar in die herfs die probleem van dooie blare wees wat in die geute opgaar en die vloei van reënwater belemmer. Daarom moet jy die geute en geutpype nagaan. Verseël enige lekplekke met ’n waterdigte middel. Jy kan metaalgeute beskerm deur ’n goeie glansverf vir die eindlaag te gebruik.
Die mure van jou huis moet ook gereeld geïnspekteer word. Wees op die uitkyk vir krake, vogtigheid en messelklei wat tussen stene uitgeval het. Die kombinasie van wind, reën en ryp kan die messelklei of ander digtingsmiddels wat jou mure waterdig hou, laat losraak. As dit gebeur het, sal jy die nodige herstelwerk moet doen.
Ondersoek gereeld die houtwerk in jou huis deeglik. Gaan die onderste dele van deure, hulle kosyne en die vensterbanke deeglik na om uit te vind of hulle nie besig is om te verrot nie. As die beskadigde deel groot is, kan jy dit moontlik uitsny en met gesonde hout vervang. Dit is dalk moontlik om klein verrotte dele met ’n houtpreserveermiddel te behandel wat ’n swamdoder bevat.
Huisswam ontwikkel binnenshuis in klam, swak geventileerde plekke. Dit het die vermoë om selfs deur pleister, messelklei en bakstene te versprei. Onmiddellike, deskundige aandag is nodig om huisswam uit te roei. Dit is selfs nog beter om te voorkom dat dit ooit wortelskiet deur seker te maak dat daar dwarsdeur jou huis goeie ventilasie is.
Om instandhouding van die huis te bemeester, moet jy oplettend wees. Inspekteer jou huis gereeld, buite sowel as binne. Doen die nodige herstelwerk onmiddellik. Doen die dinge wat jy kan doen self, maar waar nodig, moet jy nie aarsel om deskundige hulp in te roep nie.
[Venster/Prente op bladsy 15]
GEUTE EN GEUTPYPE
Om geute oop te maak
◼ Bedek eers die opening na die geutpyp met ’n groot lap voordat jy die slik en ander vullis verwyder sodat dit nie in die geutpyp beland nie.
◼ Krap alles wat die versperring veroorsaak in ’n emmer wat jy aan jou leer hang.
◼ Verwyder die lap, en gooi dan water in die geut af. As dit nie vryelik vloei nie, is die versperring in die geutpyp.
Hoe om ’n geutpyp skoon te maak
◼ As daar ’n dreineervoor onder die geutpyp is, moet jy ’n houer daar neersit om te keer dat vullis dit verstop.
◼ Druk ’n stewige draad van onder af in die geut op om enige versperring aan die onderkant los te maak.
◼ Druk ’n stewige draad wat voor in ’n haak gebuig is van die bokant van die geutpyp af in sodat jy enigiets wat aan die bokant ’n versperring veroorsaak, kan uithaak.
[Venster/Prente op bladsy 15]
DIE HERSTEL VAN STEEN- OF BLOKMURE
Hervoegstryking (Die herstel van messelvoeë)
◼ Gebruik ’n beitel en hamer om los messelklei tot een sentimeter diep te verwyder.
◼ Borsel die voeë wat gestryk gaan word met ’n stewige draadborsel om los stukkies messelklei en stof te verwyder.
◼ Meng die messelklei, maar nie meer as wat opgebruik kan word voordat dit hard word nie.
◼ Maak die stene asook die messelklei wat tussen die stene oorgebly het met water klam.
◼ Gebruik ’n voegtroffel om die openings tussen die stene met messelklei toe te stop.
◼ Vee enige messelklei wat op die stene gekom het met ’n droë stewige borsel af wanneer die messelklei droog is, maar voordat dit heeltemal hard is.
Hervlakking
◼ Kap enige gekraakte of los pleister of beton af.
◼ Maak die muur nat.
◼ Wend nuwe messelklei met ’n troffel aan die muur.
◼ Laat die messelklei effens hard word.
◼ Krap die oppervlak sodat die boonste laag messelklei kan vassit.
◼ Wend ’n eindlaag messelklei aan.
◼ Skraap ’n houtlat met saagbewegings oor die nat messelklei om die oppervlak gelyk te maak.