Quebec respekteer vryheid
’N OMROEPER in Montreal, Quebec, het onlangs oor die aandnuus gesê dat Jehovah se Getuies al lank in daardie Kanadese provinsie aangeval word “omdat hulle anders is”. Hy het verwys na ’n onlangse aanval wat Yvon Picotte, die minister vir munisipale sake, oor die radio gedoen het. Die omroeper het gesê dat Picotte “die Getuies ‘parasiete op die samelewing’ genoem het wat in baie gevalle van welsynsbystand lewe. Picotte het sodoende nie net Jehovah se Getuies beledig nie maar almal wat op maatskaplike hulp staatmaak.”
Die omroeper het in antwoord op Picotte se aantyging gesê dat die verhouding van Getuies wat van die welsyn afhanklik is nie groter is as dié van enige ander godsdiens nie. “Hulle verdien dit net so min as mnr. Picotte om ‘parasiete’ genoem te word”, het hy gesê. “Trouens, daar is diegene wat sê dat die politici eintlik die maatskaplike parasiete in ons samelewing is.”
“Wat my belangstelling in Picotte se belaglike tirade gewek het”, het die omroeper voorts gesê, “was die ‘terugflits’- of ‘déjà-vu’-aspek daarvan. Maurice Duplessis, die outokratiese eerste minister van Quebec en selfbenoemde verdediger van die Rooms-Katolieke geloof, het in die laat veertigerjare sowat 400 Jehovasgetuies in die tronk laat gooi, nie omdat hulle deurklokkies gelui het nie—waarteen Picotte so sterk beswaar gemaak het—maar op aanklagte van ‘sedisie’. Volgens Duplessis se vertolking van die wet was die verspreiding van godsdienspamflette ’n sedisieuse daad! Die Getuies se vergaderplekke is toegesluit en hulle is genadeloos deur die provinsiale polisie vervolg.”
Duplessis se aankondiging in 1946 van “Oorlog sonder genade teen die Getuies van Jehovah” is ook deur die pers aangeval. Hoofopskrifte het gelui: “Die onverligte Middeleeue keer terug na Quebec”, “Terugkeer van die Inkwisisie” en “Die stank van Fascisme”!
Nou, 50 jaar later, sluit hierdie omroeper van Montreal so af: “Hoewel ons nog ’n paar Neanderdal-politici het, word hulle ongehoorde beledigings nie meer geduld nie. Trouens, mnr. Bourassa [die huidige eerste minister van Quebec] het Picotte, wat deur Duplessis toegejuig sou gewees het, beveel om vandag in die Nasionale Vergadering vir sy uitlatings om verskoning te vra. Beskaafde vryheidsgesindes kan moed skep. Ons het ver gekom sedert mense in hierdie provinsie in die tronk gegooi is omdat hulle hul godsdiens uitdra.”