Die Bybelse beskouing

Is God ’n verborgenheid?

“Wat is ’n verborgenheid? ’n Verborgenheid is oor die algemeen ’n waarheid wat uiteraard onmoontlik is om te verstaan of te bewys. . . . Wat is ’n godsdiensverborgenheid? Dit is een van die waarhede van God wat ons genoodsaak is om te glo, hoewel ons dit nóg kan verstaan nóg kan bewys. Wat is die vernaamste godsdiensverborgenhede? Dit is die verborgenhede van die Heilige Drie-eenheid, die Inkarnasie en die Verlossing.” —Abrégé de l’exposition de la doctrine chrétienne, 1901 (Verkorte Verklaring van Christelike Leerstellings)

DIT is hoe ’n boek wat aan die begin van die 20ste eeu geskryf is die siening van die Rooms-Katolieke Kerk aangaande verborgenhede opgesom het. Verder het die onlangs gepubliseerde Guide des difficultés de la foi catholique (Handboek van Moeilike Aspekte van die Katolieke Geloof, 1989) getoon dat sulke leerstellige punte steeds van belang is deur te sê: “Dit is nie net as gevolg van ’n persoonlike aangetrokkenheid tot duistere werklikhede dat ’n Christen erken dat daar ’n sekere aantal verborgenhede in sy godsdiens se geloofsformulier voorkom nie. As hy in hulle glo, is dit bloot op grond van God se Woord.” Maar wat sê “God se Woord”? Is God ’n verborgenheid?

Kan ons alles omtrent God weet?

Die Bybel gee wel vir ons baie besonderhede oor God as Persoon, oor sy eienskappe en oor die manier waarop hy met die mensdom handel. Maar dit verduidelik ook dat sy wysheid en intelligensie die menslike verstand te bowe gaan. Daarom sê die profeet Jesaja dat God se weë en gedagtes veel hoër as dié van die mens is.—Jesaja 55:8, 9.

Ons moet nie verbaas wees dat dit onmoontlik is om elke enkele ding oor God te weet nie. Hoewel ons voortdurend meer oor die heelal leer, erken wetenskaplikes byvoorbeeld dat hulle waarskynlik nooit die verborgenhede van die oneindig klein dingetjies of die oneindig groot dinge waarlik sal deurgrond nie. Hoe kan enige skepsel dus die diepte van God se wysheid, hy wat die Skepper is, heeltemal verstaan? Job het teenoor Jehovah erken: “Sonder om te verstaan, dinge te wonderbaar vir my, wat ek nie begryp nie.” (Job 42:3; vergelyk Romeine 11:33.) Volledige kennis van God is dus in party opsigte bo ons beperkte begrip. Maar die leerstellings van baie kerke oorskry die perke van hierdie eenvoudige waarnemings.

Meer verborge as wat nodig is?

Die onlangs gepubliseerde Katolieke ensiklopedie Théo sê: “In die kerkleer kan die term verborgenheid ook toegepas word op wat God oor homself, byvoorbeeld aangaande sy Drie-enige bestaan, onthul.” Soos in baie ander teologiese boeke word die idee hier vanselfsprekend ontwikkel dat ‘dit ons nie moet verbaas nie dat God ’n Drie-eenheid is en dat hierdie Drie-eenheid ’n verborgenheid is, aangesien kennis van God uiteraard verborge is’. Is so ’n redenasie gegrond?

In die eerste plek erken baie boeke, soos The New Encyclopædia Britannica, dat “nóg die woord Drie-eenheid nóg die uitdruklike leerstelling in die Nuwe Testament voorkom”. Verder toon die geskiedenis van hierdie leerstelling dat baie idees uit heidense filosofieë geneem en gekombineer is en dat hulle etlike dekades na die dood van die apostels in die kerkleer opgeneem is. Daarom is daar geen klinkklare bewys dat die verborgenheid van die Drie-eenheid op die Bybel gegrond is nie.a

Dink hieraan: Aangesien dit onmoontlik is om alles omtrent God te weet, sal dit sin hê as Jehovah sy eie identiteit verberg? Nee, hy wil graag hê dat alle mense hom moet ken. (Johannes 17:3; vergelyk Hebreërs 8:11.) En sal dit sin hê as diegene wat hom waarlik wil behaag sy identiteit verberg? Ter toeligting: Sal dit verstandig wees om ’n venster toe te stoom as dit jou enigste kans is om ’n pragtige landskaptoneel te sien en dan te sê: ‘Dit kan net sowel toegestoom wees, want ons kan in elk geval nie die detail sien nie?’ Natuurlik nie! Die Bybel en gesonde verstand toon dat ons kennis van God noodwendig beperk is. Maar hierdie perke gee ons glad nie die reg om ons kennis van God te omskep in ’n verborge leerstelling, soos die Drie-eenheid, wat slegs ons begrip van hom verwar nie.

Verborgenhede—heidens en Christelik

Boonop het die term “verborgenheid” in die Skrif nie die betekenis van “verborge kennis” soos wat dit gewoonlik verstaan word nie. Soos Théo ons tereg herinner: “Die term verborgenheid het nie hier dieselfde betekenis nie. Vir Christene dui dit op iets wat gewoonlik verborge of onbereikbaar is, maar wat God vir hulle wil sê . . . en wil hê hulle moet ervaar.”

Die apostel Paulus het die Griekse woord my·steʹri·on (“verborgenheid”, of “heilige geheim”) 20 keer in ’n spesifieke betekenis gebruik. Hy het dit gebruik met verwysing na ’n heilige geheim wat lank verborge was maar wat God onthul het toe Hy Jesus na die aarde toe gestuur het. Jesus Christus, die Verlosser van die mensdom, was die vernaamste lid van die beloofde “saad” wat God sou gebruik om die mensdom los te koop, die Een ‘waardeur al die nasies van die aarde geseën sal word’ en wat mede-erfgename in die hemele sal hê (Genesis 3:15; 22:18; Romeine 8:17). Hierdie geheime, of verborge, feite is vir God se voor-Christelike dienaars verberg maar is op die regte tyd deur Jehovah bekend gemaak (Efesiërs 1:9; Kolossense 1:26). Gelukkig is hierdie kennis nie net vir ’n paar uitverkorenes bestem nie—soos in die geval van godsdiensverborgenhede in sekere godsdienste—maar dit moet sonder onderskeid aan soveel mense moontlik verkondig word.—Efesiërs 6:19, 20.

Aanbid God in waarheid

Die Bybel bevat genoeg inligting vir ons om God op aanneemlike wyse te aanbid. Dit leer glad nie ’n Drie-eenheid nie. Inteendeel, dit openbaar baie duidelik die oppergesag van Jehovah en die ondergeskikte posisie van Jesus. Jesus het byvoorbeeld gesê: ‘My Vader is groter as Ek’ (Johannes 14:28; 1 Korinthiërs 15:28). Die Bybel toon ook dat die heilige gees God se werkende krag is waardeur sy getroue dienaars gerig word.—Handelinge 2:1-4.

Toe Jesus met ’n Samaritaanse vrou gepraat het, het hy getoon dat as iemand God wil behaag hy Hom “in gees en waarheid” moet aanbid. Hy het bygevoeg dat ‘die Vader ook mense soek wat Hom só aanbid’ (Johannes 4:21-24). Elkeen van ons het die verantwoordelikheid om te soek na hierdie juiste kennis wat vir ons seëninge sal meebring as ons op God se Woord vertrou pleks van mensgemaakte, verborge tradisies te aanvaar wat dit weerspreek.

[Voetnoot]

[Foto-erkenning op bladsy 26]

All rights reserved