Jongmense vra . . .

Verhoor God my gebede?

“EK MÓÉT weet of Jehovah my gebede verhoor”, sê 11-jarige Sandra, “want ek is nie seker of hy dit wel doen nie. Ek weet van baie ander jongmense wat dieselfde probleem het.” Vyftienjarige Alyssa het vroeër ’n soortgelyke probleem met gebed gehad. “Dit het dikwels gevoel asof ek met myself praat”, erken sy.

Volgens ’n Gallup-opname wat in 1988 gedoen is, het 87 persent van alle tieners in die Verenigde State al op die een of ander tydstip gebid, maar minder as die helfte bid gereeld. Party meen blykbaar dat hulle gebede eenvoudig nie verhoor word nie. Jy dink dalk soms ook dat niemand na jou gebede luister nie. Maar die Bybel verseker ons dat die “Hoorder van die gebed” wel luister wanneer ’n mens opreg in geloof bid! (Psalm 65:3). Maar hoe weet jy dat hy nie net ’n passiewe hoorder is nie—een wat beleef luister maar min of niks doen om jou te help nie?

Nadat die psalmis God die Hoorder van gebed genoem het, het hy gesê: “Met vreesinboesemende dinge sal u ons in regverdigheid antwoord, o God van ons redding.” (Psalm 65:5, NW; vergelyk Psalm 66:19, 20.) Waarom dink party dan dat hulle gebede nie verhoor word nie?

Dinge wat gebed verhinder

Dalk is dit omdat hulle nie ’n intieme verhouding met God het nie. Party jongmense twyfel selfs of hy bestaan. Ander glo in hom maar beskou hom as ’n terughoudende, abstrakte wese. Gebed word dan soos wanneer ’n mens die stopknoppie in ’n hysbak druk—as ’n laaste uitweg in uiterste noodsituasies. “Ek glo in God”, beweer een jong Katoliek. “Wanneer ek in die verknorsing is, wanneer ek hulp nodig het, vra ek Hom altyd om my te help.” ’n Ander meisie sê reguit: “Soms bid ek net wanneer ek regtig iets wil hê.”

Gebed moet egter ’n blyk van geloof, eerbied, toewyding en vertroue wees—nie net iets wat jy uit wanhoop of om selfsugtige redes doen nie. En dit is onvoldoende om te bid omdat jy dink dat God dalk bestaan. “Hy wat tot God gaan,” sê die Bybel, “moet glo dat Hy is en ’n beloner is van die wat Hom soek” (Hebreërs 11:6). Twyfelaars se gebede word nie verhoor nie (Jakobus 1:6-8). Jehovah luister na diegene wat hom leer ken het en wat hom liefhet; hulle bid nie net in noodsituasies nie. Soos 1 Thessalonicense 5:17 vermaan, ‘bid hulle sonder ophou’, of soos An American Translation dit stel, ‘laat vaar hulle nooit gebed nie’.

Ongelukkig het party jong Christene van Jehovah geleer, maar hulle het nie regtig ’n vriendskap met hom aangekweek nie (Psalm 25:14, NAV). Hulle gebede is geneig om sporadies en onpersoonlik te wees, en gevolglik word dit nie verhoor nie. Is dit dalk die geval met jou gebede? Indien wel, “nader tot God” deur hom te leer ken (Jakobus 4:8). Jong Alyssa, wat vroeër genoem is, het aan Jehovah getwyfel. Maar ’n persoonlike Bybelstudie het haar twyfelgedagtes geleidelik uit die weg geruim en het haar gehelp om ’n verhouding met God op te bou.

’n Mens se gesindheid en gedrag kan ook verhinder dat jou gebede verhoor word. Die psalmis het gesê: “As ek ongeregtigheid bedoel het in my hart, sou die Here nie gehoor het nie” (Psalm 66:18; Spreuke 15:29). Sal dit redelik wees om te verwag dat God jou gebede verhoor as jy dinge doen wat hy afkeur—as jy dwelms gebruik, rook, na verderflike musiek luister of jou aan geslagsonsedelikheid skuldig maak? Beslis nie. Jehovah verwerp gevolglik die gebede van diegene wat ’n dubbele lewe lei en wat skynheilig ‘verberg wat hulle is’ (Psalm 26:4, NW). Hy luister net na iemand wat “opreg wandel en geregtigheid doen, en wat met sy hart die waarheid spreek” (Psalm 15:1, 2). As jy dus die gevoel kry dat jy met jouself praat wanneer jy bid, moet jy jou lewe ernstig in oënskou neem. Miskien moet jy ’n paar veranderinge aanbring.

Wanneer gebed misbruik word

Watter soort dinge kan jy van God vra? Jesus het ons verseker: “Alles wat julle die Vader sal vra in my Naam, sal Hy julle gee” (Johannes 16:23). Daardie aanloklike woordjie—alles! Moet God werklik altyd soos die een of ander genius vir jou klaarstaan? Sal hy aan elkeen van jou versoeke, selfs nietige versoeke, voldoen? Jesus het hierdie woorde van hom enkele ure voor sy marteldood geuiter. Hy het beslis nie aan verspotte dinge gedink nie! Daarom waarsku Jakobus 4:3 (NAV) dat gebed nie misbruik moet word nie. Dit sê: “As julle bid, ontvang julle nie, omdat julle verkeerd bid: julle wil net julle selfsugtige begeertes bevredig.”

Baie misbruik vandag die voorreg van gebed. Een skoolkorfbalspan het altyd in die middel van die baan gekniel en ’n gebed na elke spel opgesê. Maar dink jy regtig dat God ’n korfbalentoesias is of dat hy hom daartoe sal verlaag om by ’n mededingende spel betrokke te raak? (Vergelyk Galasiërs 5:26, NW.) Of wat van die vrou wat volgens berig vir skoene bid? “Soms het ’n skoenwinkel net een of twee pare van my grootte oor”, sê sy, “en as ek nie dan die geld het nie, vra ek God om te sorg dat hulle nog daar is wanneer ek terugkom.” Daar is beslis ’n groot verskil tussen wanneer jy bid omdat jy iets nodig het—en wanneer jy verwag dat God jou inkopies moet doen.

Daarom sal dit ook ongepas—en tevergeefs—wees om tot God te bid en te vra dat jy van verdiende straf of tugtiging gespaar bly (Hebreërs 12:7, 8, 11). Dit sal ook nie veel help as jy vir God vra om jou te help om hoë punte vir ’n toets te behaal waarvoor jy min of niks geleer het nie.—Vergelyk Galasiërs 6:7.

Gebede “volgens sy wil”

Die apostel Johannes verduidelik iets belangriks omtrent gebed: “Dit is die vrymoedigheid wat ons teenoor Hom het, dat Hy ons verhoor as ons iets vra volgens sy wil” (1 Johannes 5:14). Jesus se modelgebed (die Onse Vader-gebed) toon wat party van die dinge is wat so ’n gebed kan insluit. Hy het gebid dat (1) God se naam geheilig moet word, (2) God se Koninkryk moet kom, (3) God se wil moet geskied, (4) God in ons fisiese en geestelike behoeftes moet voorsien en (5) God ons moet help om Satan se strikke te vermy.—Mattheüs 6:9-13.

Hierdie raamwerk sluit baie gepaste dinge in waarvoor ons kan bid. Trouens, 1 Petrus 5:7 spoor Christene aan om ‘al hulle bekommernis op God te werp, want Hy sorg vir hulle’. Dit beteken dat ons oor feitlik elke aspek van ons lewe kan bid. Moet jy ’n besluit neem, soos watter skoolvakke jy moet kies? Bid om Goddelike wysheid (Jakobus 1:5). Het jy die een of ander dwase fout begaan? Bid dan om God se vergifnis.—Jesaja 55:7; 1 Johannes 1:9.

Maar jy moet in ooreenstemming met jou gebed handel. Neem byvoorbeeld die geval van jong Clint. Hy het ’n voltydse evangeliedienaar geword nadat hy gematrikuleer het. Maande lank het hy niemand gekry wat die Bybel wou bestudeer nie. Hy het dit dus ’n saak van gebed gemaak. Hy het egter nie vir ’n Bybelstudent gewag om uit die lug te val nie. Hy het ywerig aangehou om aan die huis-tot-huis-bediening deel te neem, en mettertyd het hy ’n aantal mense gevind wat die Bybel wou bestudeer.

Hoe God gebede verhoor

Soms help gebed op sigself. Jong Sandy het met die probleem van masturbasie geworstel. Sy sê: “Dit help om tot Jehovah te bid en hom aan te roep, want ek weet as ek hom gevra het om my te help om nie te masturbeer nie, moet ek dit liewer nie doen nie.”

Maar soms lyk dit asof God sake so rig dat dit ’n antwoord op ’n mens se gebede is. Jong Ken moes eenkeer by die Koninkryksaal van Jehovah se Getuies kom sodat hy ’n kort Bybeltoespraak kon hou waarvoor hy aangewys is. Ongelukkig het hy nie vervoer na die saal toe gehad nie. Hy het vurig daaroor gebid. ’n Paar minute later het sy suster, wat selde kom kuier het, daar aangekom. Hoewel sy nie in sy godsdiens belanggestel het nie, het sy hom na die saal toe geneem. ’n Regstreekse antwoord op sy gebed? Miskien. Dit is in elk geval altyd gepas om God te bedank wanneer dinge tot ons voordeel uitwerk. Paulus vermaan: “Wees in alles dankbaar.”—1 Thessalonicense 5:18.

Maar moenie verwag dat God jou gebede op die een of ander dramatiese wyse sal verhoor nie. Jy moet ook nie dink dat elke ou dingetjie wat met jou gebeur ’n Goddelike teken is nie. Ons gebede word gewoonlik op ’n indirekte wyse beantwoord: Jy lees iets in die Bybel of Bybellektuur; jou ouer of ’n mede-Christen gee jou goeie raad. Dit kan weliswaar onderskeidingsvermoë verg om vas te stel presies wat God se wil vir jou is. Dinge kom gewoonlik mettertyd reg.

Ja, dit neem tyd! Moenie verwag dat God jou ’n antwoord sal gee wanneer jy dink hy moet nie. Jeremia het geskryf: “Dit is goed om geduldig te wag op die hulp van die Here” (Klaagliedere 3:26, NAV). Dit beteken boonop nie dat jy altyd die antwoord sal kry wat jy graag wil hê nie. Die apostel Paulus het God drie keer gevra om die probleem wat hy “’n doring in die vlees” genoem het, weg te neem. God se antwoord was nee (2 Korinthiërs 12:7-9). Paulus het egter nie sy waardering vir die gawe van gebed verloor nie, maar hy het aangehou om Jehovah te dien. Dit is hy wat geskryf het: “Volhard in die gebed” (Kolossense 4:2). Daarom moet jy “aanhou vra, . . . aanhou soek, en . . . aanhou klop” (Mattheüs 7:7, NW). As jy dit doen, sal jy nader aan God kom, en jy kan verwag dat jou gebede verhoor sal word.

[Prente op bladsy 15]

Gebed moet nie nietige versoeke vir materiële dinge insluit nie