Jongmense vra . . .

Kan ek regtig aan drank verslaaf raak?

DIT het alles begin toe Jerome maar nege jaar oud was. “Ek het geproe aan die drank wat ná ’n partytjie by ons huis oorgebly het, dronk geword en van die gevoel gehou”, verduidelik hy. Kort voor lank het dit Jerome se daaglikse roetine geword om drank te koop, weg te steek en te drink. Tog erken hy: “Totdat ek 17 was, het ek nie geweet dat ek ’n probleem het nie. Wanneer die ander ontbyt geëet het, het ek ’n [kwart liter] wodka uitgedrink!”

Alkoholgebruik en -misbruik neem skrikwekkend toe onder jongmense in alle wêrelddele. In die Verenigde State alleen het meer as tienmiljoen—die helfte—van die 13- tot 18-jarige leerlinge in Amerika in die afgelope jaar ten minste een alkoholiese drankie gedrink. Sowat agtmiljoen drink weekliks. Trouens, Amerikaanse tieners drink jaarliks meer as ’n miljard blikkies bier en meer as 300 miljoen bottels perléwyn, ’n gekarboneerde wyndrankie.

Die Bybel sê aangaande alkoholiese drank: “Elkeen wat daardeur op ’n dwaalspoor gelei word, is nie wys nie” (Spreuke 20:1, NW). Miljoene jeugdiges, soos Jerome, word nogtans deur alkohol op ’n dwaalspoor gelei. Wat is die gevare verbonde aan alkoholmisbruik? Hoe weet jy of jy besig is om verslaaf te raak?

Alkohol en alkoholisme

Wanneer alkohol as ’n helderkleurige perléwyn of ’n skuimerige bier aangebied word, lyk dit heel onskadelik. Maar smaak en voorkoms kan bedrieglik wees. Alkohol is ’n sterk dwelmmiddel.

Dokters sê dat alkohol ’n kalmeermiddel is wat ’n uitwerking het op die brein en wat op die sentrale senustelsel werk. Wanneer ’n volwassene dit in matige hoeveelhede gebruik, kan dit ’n onskadelike, aangename uitwerking hê. ‘Wyn maak die mens se hart bly’, sê Psalm 104:15. Maar te veel alkohol kan dronkenskap veroorsaak—’n toestand waarin fisiese en verstandelike beheer merkbaar verswak is. Soos Jerome kan ’n mens verslaaf raak, en sonder dat jy dit besef, kan jy die stadium bereik dat jy nie net ’n drankie wil hê nie, maar dat jy een nodig het of daarna smag. Waarom gebeur dit? Die liggaam kan ’n weerstandsvermoë teenoor alkohol ontwikkel wanneer dit oormatig gebruik word. Die drinker moet dan al hoe meer drink om die uitwerking daarvan te voel. Voordat hy dit egter besef, is hy verslaaf. As ’n mens eers verslaaf is, word jou lewe tragies verander. Byna vyfmiljoen Amerikaanse jongmense het ’n drankprobleem.

Waarom hulle drink

In die dertigerjare het die deursneetiener in Amerika sy eerste alkoholiese drankie op ongeveer 18 geproe. Vandag doen hy dit voordat hy 13 is. Party begin selfs vroeër. “Ek was ses jaar oud, . . . en ek het ’n slukkie bier uit my oupa se glas gedrink. . . . Ek was so duiselig!” Dit is wat Carlotta—’n alkoholis wat besig is om te herstel—onthou. Hoe vroeër jy begin, hoe waarskynliker is dit dat jy verslaaf sal raak.

Maats oefen natuurlik in hierdie opsig dikwels groot druk uit. Maar ouers kan ook soms die skuld dra. Party drink self te veel, gebruik drank vir emosionele onderskraging of spog selfs met hoeveel drank hulle kan drink. ’n Brosjure oor alkoholisme sê: “Kinders wat verantwoordelike volwasse drinkers word, kom gewoonlik uit gesinne waar alkohol nugter en sonder emosie beskou word . . . , waar drinkery sy behoorlike plek beklee.”a

Televisie is nog iets wat jongmense sterk beïnvloed. Teen 18-jarige leeftyd het die gemiddelde Amerikaanse jongmens 75 000 drinktonele op TV gesien—11 per dag. Aantreklike advertensies, wat ontwerp is om drank na die sleutel tot pret en romanse te laat lyk, beeld begeerlike modelle uit wat op vrolike partytjies drink. Alkoholiese dranke word vrugtegeure en oulike produkname gegee. Die advertensies werk. Elke naweek is daar 454 000 jongmense in die Verenigde State wat te veel drink, en dit het die Amerikaanse geneesheer-generaal laat sê dat baie van hulle “reeds alkoholiste [is], en die res is waarskynlik op pad daarheen”.

Maar party jongmense word deur ’n innerlike stryd tot drank gedryf. Kim het vertel waarom sy haar aan bier vergryp het: “Ek het [alkohol] gebruik om my gemoedstoestand te verander en om my beter oor myself te laat voel.” As ’n jongmens skaam is of ’n swak selfbeeld het, sal drinkery moontlik na ’n aantreklike oplossing lyk. Ander drink weer om aan die een of ander pynlike werklikheid van die lewe te ontvlug, soos wanneer hulle ouers hulle mishandel of verwaarloos. Waarom het Ana begin drink? “Ek het nooit die liefde gekry wat ek nodig gehad het nie.”

Ongeag die rede waarom ’n jongmens begin drink het, hy kan dit naderhand al hoe moeiliker vind om sy drinkery te beheer. Op dié tydstip staar hy alkoholisme in die gesig. Het jy begin drink? Antwoord dan die vrae onder die opskrif “Vandat jy begin drink het”. Dalk is die uitslae vir jou ’n groot openbaring.

Alkohol—gevaarlik vir jongmense!

“Dié wat tot laat sit en drink”, word deur die Bybel gewaarsku dat dit ‘agterna gif spoeg soos ’n kobra’ (Spreuke 23:29-32, NAV). Die gif van ’n giftige slang kan ’n mens stadig en pynlik beseer of doodmaak. (Vergelyk Handelinge 28:3, 6.) Die langdurige en strawwe misbruik van alkohol kan jou eweneens stadig doodmaak. Dit kan lewensorgane, soos jou lewer, pankreas, brein en hart beskadig of vernietig. Veral ontwikkelende, jong liggame en verstande is gevoelig vir sulke skade, wat somtyds onherstelbaar is.

Alkoholmisbruik kan aan jou emosies selfs groter skade doen as aan jou liggaam. ’n Drankie kan jou miskien tydelik meer selfvertroue gee. Maar die selfvertroue is vals—en die uitwerking verdwyn altyd weer. Intussen strem jy jou emosionele en geestelike groei. Pleks van nugter te word en die werklikheid onder die oë te sien, reik jy na nog ’n drankie. Maar die 18-jarige Peter sê, nadat hy 11 maande nugter was: “Ek moet nou leer hoe om my gevoelens te verwerk, en ek moet nuwe maniere vind om situasies die hoof te bied waarmee drank my nog altyd gehelp het. Ek skat dat ek emosioneel en sosiaal omtrent dertien jaar oud is.”

Dan is daar ook die gevare van drink en bestuur. Alkoholverwante sterftes op snelweë is die vernaamste doodsoorsaak onder jongmense in die Verenigde State. Drank word ook verbind met manslag, selfmoord en verdrinking—die ander vername doodsoorsake onder jongmense.

Alkoholmisbruik kan daarbenewens ’n verwoestende uitwerking hê op jou gesinslewe, vriendskappe, skoolwerk en geestelikheid. Die Bybel stel dit so: “Wys my iemand wat te veel drink, . . . en ek sal jou ’n ellendige mens wys wat homself bejammer en wat altyd twis en kla. Sy oë is bloedbelope, en hy het kneusplekke wat vermy kon geword het. . . . Dit sal voel of jy op die see uit was, seesiek, en asof jy hoog in die touwerk van ’n skip swaai wat heen en weer geslinger word” (Spreuke 23:29-34, Today’s English Version). Dit is ’n sy van drinkery wat nooit op die glansende TV-advertensies uitgebeeld word nie.

Waarom dan begin?

Baie lande stel om dié rede beperkings op jongmense wat drank betref. As jy ’n Christen is, het jy ’n dwingende rede om hierdie wette te gehoorsaam, want God beveel dat “elke mens hom [moet] onderwerp aan die magte wat oor hom gestel is” (Romeine 13:1, 2). Is dit werklik in jou belang om nou te begin drink, selfs al is die gebruik van alkohol as gevolg van plaaslike kultuur wettig onder jongmense? Soos 1 Korinthiërs 6:12 sê: “Alles is my geoorloof, maar nie alles is nuttig nie.” Is jy werklik gereed vir alkoholiese drank?

Wanneer jou maats jou ’n kleurryke drankie aanbied, is die versoeking om daaraan te proe weliswaar groot. Jy moet egter besef dat jy iets aangebied word waaraan jy moontlik verslaaf kan raak. Godvrugtige jongmense in Bybeltye, soos Daniël, Sadrag, Mesag en Abednego, het die moed gehad om hulle standpunt teen die Babiloniese owerhede in te neem en die onrein voedsel en wyn wat Babilon se heidense koning aan hulle gegee het te weier. Jy kan ook die moed hê om nee te sê!—Daniël 1:3-17.

Mettertyd sal jy oud genoeg wees—wettig, verstandelik, emosioneel en fisies—om alkohol te gebruik as dit jou keuse is. Selfs dan sal dit verstandig wees om matigheid voor oë te hou en seker te maak dat jy nie verslaaf raak nie. Baie jongmense is alreeds verslaaf, en ’n toekomstige artikel sal bespreek wat hulle kan doen om te herstel.

[Voetnoot]

[Venster op bladsy 24]

VANDAT JY BEGIN DRINK HET:

◻ het jy ander of minder vriende?

◻ vind jy die lewe by die huis moeiliker?

◻ raak jy moeilik aan die slaap of voel jy neerslagtig of angstig?

◻ het jy ’n drankie nodig om op jou gemak te voel wanneer jy tussen ander mense is?

◻ voel jy ongelukkig of teleurgesteld in jouself nadat jy gedrink het?

◻ vertel jy leuens oor of verdoesel jy die feit dat jy drink?

◻ word jy verleë of kwaad wanneer iemand oor jou drinkgewoontes praat?

◻ het iemand jou al ooit raad gegee of ’n grap gemaak oor jou alkoholgebruik?

◻ voel jy dat jy perléwyn of bier maar kan drink omdat dit nie sterk drank is nie?

◻ het jy belangstelling verloor in of opgehou met stokperdjies en sportsoorte wat jy vroeër geniet het?

As jy op meer as twee vrae ja geantwoord het, kan dit ’n aanduiding wees dat jy ’n ernstige drinkprobleem het. As dit so is, sal dit verstandig wees om onmiddellik hulp te soek.

Bron: THE REGENT HOSPITAL, New York, NY.

[Prent op bladsy 23]

Baie alkoholiste ontwikkel op ’n vroeë ouderdom drankprobleme