Wil jou kind ’n troeteldier hê?
KINDERS in alle wêrelddele hou van troeteldiere. En wat ’n verskeidenheid het hulle tog om van te kies! Die 13-jarige Tabitha se troeteldier is byvoorbeeld ’n marmotjie. Vyfjarige Naomi het ’n witmuis. En deesdae is 15-jarige Bobby-John se vreugde ’n jong kangaroewyfie. “Sy het haar eie mandjie en krul daarin op asof sy in haar ma se buidel is”, verduidelik Bobby-John. “Sy hou nie baie daarvan om opgetel te word nie, maar sy is tog te oulik.”
Baie volwassenes is ook lief vir troeteldiere. En diere word al van die ou tyd af getem en as troeteldiere gebruik. Die Egiptenare het byvoorbeeld katte en bobbejane getem. Dan was daar ook die Romeinse keiser wat ’n buitengewone troeteldier gehad het—’n leeu met die naam Scimitar. Hy was so lief vir sy katvriend dat Scimitar saam met hom aan die etenstafel gesit en snags by sy bed se voetenent geslaap het. Die Romeine het ook honde en ape geleer. Dit was ’n gewilde vermaaklikheid om te sien hoe ape op honde se ruê of in ’n strydwa ry.
Wanneer kinders behoorlik deur hulle ouers opgevoed en gelei word, kan hulle leer om hulle troeteldiere goed te versorg. Hulle kan die verantwoordelikheid gegee word om hulle te voer en op te pas. Om troeteldiere te hê, kan ook vir kinders baie leersaam wees. Soos The New Encyclopædia Britannica sê, “bied die aanhou van troeteldiere die geleentheid om kinders te leer hoe nou voorregte met verantwoordelikheid saamhang, en dit leer hulle ook iets van geslagsake. Paring word gou opgemerk, en dit word gevolg deur sake soos dragtyd en die verskillende probleme wat met die geboorte en die versorging van die kleintjies gepaardgaan.”
Ouers het troeteldiere al gebruik om aan hulle kinders die regte beskouing teenoor alle lewende wesens te toon—dat hulle byvoorbeeld nooit wreed moet wees of die troeteldier moet laat ly nie en dat hulle dit nooit honger moet laat ly of vuil moet laat bly nie. Hier is ook ’n praktiese manier om aan kinders die wysheid en meesterlike bekwaamheid te toon van die diere se Skepper, wat almal “volgens hulle soorte” gemaak het.—Genesis 1:24.
Maar kinders raak dikwels moeg vir verantwoordelikheid of hulle is vergeetagtig. Alte dikwels verdamp ’n kind se entoesiasme oor ’n troeteldier vinnig. Dié week se belangstelling kan maklik volgende week se verveling word. Ouers, as julle dit dan oorweeg om julle kind die verantwoordelikheid van ’n troeteldier te gee, onthou dan dat dit julle, die volwassenes, is wat die finale verantwoordelikheid moet dra.
Behoorlike higiëne noodsaaklik
Goeie higiëne is vir die troeteldiere belangrik, maar dit is ewe belangrik—miskien nog belangriker—vir jou kinders. Troeteldiere se koue en hokke moet skoon gehou word, en party troeteldiere moet gereeld geborsel en gebad word. ’n Mens moet ook oorweeg hoeveel noue fisieke kontak jy met diere behoort te hê. Onthou dat baie diere se tonge ook hulle waslap is wat hulle vir alle dele van hulle liggaam gebruik. En hoewel hulle toegerus is om die kieme wat hulle inneem baas te raak, is kinders nie. Moenie jou kind aanmoedig om ’n dier te soen nie.
Troeteldiere moet ook hulle eie voerbakke hê en moet nie toegelaat word om borde te lek wat deur mense gebruik word nie. Dit is ’n ernstige saak, want diere en voëls het baie siektes wat aan mense oorgedra kan word indien verstandige voorsorgmaatreëls nie getref word nie. En baie troeteldiere byt. Baie van dié ongesteldhede is weliswaar nie baie ernstig nie, en baie keer kan hulle onopgemerk bly of aan iets anders as die troeteldier toegeskryf word. Maar party asemhalingsiektes en veluitslae word gewoonlik by troeteldiere aangesteek. Ander siektes is baie ernstiger en kan noodlottig wees. “Huiskatte besmet jaarliks sowat 3300 verwagtende moeders met toksoplasmose, en dit lei tot ’n sterftesyfer van 15 persent by fetusse”, sê U.S.News & World Report.
Leer kinders dat troeteldiere nie mense is nie
Namate kinders liewer word vir ’n troeteldier moet ouers sorg dat hulle nie oorboord gaan en hulle troeteldiere begin behandel asof hulle mense is of menslike eienskappe of intelligensievlakke het nie. Dit sal onnodige trauma veroorsaak wanneer die troeteldier oud word en doodgaan of dalk in ’n ongeluk doodgaan.
Dit is natuurlik nie iets wat net kinders geleer moet word nie. Sommige volwassenes moet ook hiervoor versigtig wees. In party gevalle word die troeteldier geliefkoos en behandel asof dit ’n baba of ’n klein kindjie is. Kinders sal dinge wat hulle party volwassenes sien doen gou nadoen en oordadige liefde teenoor hulle troeteldiere betoon.
Ons moet dus ’n gebalanseerde beskouing van troeteldiere behou en dit ook vir ons kinders leer. Help hulle om te verstaan dat troeteldiere en al God se lewende skepsele hier is vir die mens se genot en gebruik. Maar ons moet oppas om nooit die diere en voëls te verhef bo die posisie wat God vir hulle bestem het nie. Dit was nie God se doel dat diere vir ewig lewe nie. Hulle beperkte lewensduur is nie te wyte aan Adam en Eva se sonde en die gevolglike oorerwing van sonde en die dood, soos dit met mense die geval is nie.—Romeine 5:12; 2 Petrus 2:12.
Wanneer troeteldiere op hulle regmatige plek gehou word, is hulle ’n wonderlike gawe van God vir die plesier van die mens. En nie net vir kinders nie. Baie eensame, siek en bejaarde mense het al voordeel getrek uit, sowel as plesier gekry van, hulle liefderyke troeteldiere. “Navorsers sê dat troeteldiere—of, soos party verkies, ‘dieremetgeselle’—in party gevalle die werking van hulle eienaar se hart kan verbeter, beterskap ná ’n hartaanval kan versnel, angstigheid kan verlig en bloeddruk kan laat daal”, sê die tydskrif AARP News Bulletin.
Om ’n troeteldier te hê, of nie
Wat sal jy dan doen as jou kind ’n troeteldier wil hê? Jy moet besluit terwyl jy al die voordele en nadele in gedagte hou. Jy sal faktore soos die omgewing waarin jy woon, die onkoste om die troeteldier behoorlik te versorg en te voer, jou kind se ouderdom en hoeveel tyd jy aan die behoorlike versorging van die dier sal moet bestee versigtig moet oorweeg.
Maar as jy wel besluit dat dit vir jou kind voordelig sal wees om ’n troeteldier te hê, moet jy die voormelde raad in gedagte hou. Wanneer jy dan ’n troeteldier in die gesin het, geniet hom gerus ten volle. Versorg hom goed en leer jou kind om dit ook te doen. Wanneer troeteldiere op hulle plek gehou word, is hulle nie net nuttige en aangename metgeselle nie, maar hulle is ook ’n blyk van die interessante verskeidenheid, die eindelose inisiatief van ’n nadenkende Skepper.