Waarom is daar so ’n reikhalsende verlange na die nuwe wêreld?

Die einde van die wêreld—Hoe naby is dit?

WAT word bedoel met die einde van hierdie wêreld? Die vernietiging van die aarde deur middel van vuur, soos party godsdienste leer? Nee; hoe is dit moontlik as Psalm 104:5 sê: ‘Dit sal vir ewig en altyd nie wankel nie’?

Die antwoord is duidelik as ons kyk na ’n wêreld wat hierdie wêreld baie eeue gelede voorafgegaan het. Dit het verdorwe geword en teen God in opstand gekom, en daarom ‘is die toenmalige wêreld met water oorstroom en het dit vergaan’. Maar toe daardie wêreld, wat uit die hemele sowel as die aarde bestaan het, deur die Vloed van Noag se dag vernietig is, het die letterlike hemele en aarde nie vergaan nie. Die einde van hierdie wêreld sal ook nie beteken dat die sterrehemele en die planeet Aarde met vuur vernietig sal word nie.—2 Petrus 3:5, 6; Genesis 6:1-8.

Soms gebruik die Bybel die uitdrukkings “hemele” en “aarde” figuurlik. “Hemele” kan na Satan, die god van hierdie wêreld, verwys; na wêreldheersers in sy mag en na bose geeste in die lug—wat almal ’n demoniese invloed op die mensdom uitoefen (2 Korinthiërs 4:4; Efesiërs 6:12). “Aarde” word dikwels gebruik om na die mense op die aarde te verwys (Genesis 11:1; 1 Konings 2:1, 2; 1 Kronieke 16:31; Psalm 96:1). Dit is hierdie simboliese hemele en aarde van hierdie teenswoordige bose wêreld wat 2 Petrus 3:7 sê met “vuur” vernietig sal word.—Galasiërs 1:4.

Daarna maak Petrus die vreugdevolle tyding bekend dat hierdie ou wêreld deur ’n nuwe een vervang gaan word: “Ons verwag volgens sy belofte nuwe hemele en ’n nuwe aarde waarin geregtigheid woon.”—2 Petrus 3:13.

’n Nuwe wêreld sonder trane of die dood

Petrus se bekendmaking dat geregtigheid in daardie nuwe wêreld sal woon, is verblydende nuus, maar wat Johannes verder daaroor sê, laat ’n mens in absolute ekstase raak! In Openbaring 21:3, 4 sê hy daaroor: “En ek het ’n groot stem uit die hemel hoor sê: Kyk, die tabernakel van God is by die mense, en Hy sal by hulle woon, en hulle sal sy volk wees; en God self sal by hulle wees as hulle God. En God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.”

Pleks van die aarde met vuur te vernietig, is Jehovah van voorneme dat dit vir ewig bewoon moet word: “So sê die HERE, wat die hemele geskape het—Hy is God!—wat die aarde geformeer en dit gemaak het—Hy het dit bevestig; Hy het dit nie geskape om woes te wees nie, maar dit geformeer om bewoon te word.”—Jesaja 45:18.

Geregtigheid sal daar woon omdat daar geen onregverdige mense sal wees nie: “Die opregtes sal die land bewoon, en die regskapenes daarin oorbly, maar die goddelose sal uit die land uitgeroei, en die ontroues sal daaruit weggeruk word.”—Spreuke 2:21, 22.

Die psalmis Dawid getuig ook onder inspirasie hiervan: “Nog ’n klein rukkie en die goddelose sal daar nie wees nie; ja, jy sal ag gee op sy plek, maar hy sal daar nie wees nie. Die ootmoediges daarenteen sal die aarde besit en hulle verlustig oor groot vrede.”—Psalm 37:10, 11.

Jesus self bevestig dit wanneer hy in sy Bergpredikasie sê: “Salig is die sagmoediges, want hulle sal die aarde beërwe.” Hierdie sagmoediges sal met die regverdige nuwe hemele waarvoor hulle bid as hulle regering geseën word: “Laat u koninkryk kom; laat u wil geskied, soos in die hemel net so ook op die aarde.”—Mattheüs 5:5; 6:10.

Die volmaakte vrede wat die bewoners van daardie nuwe wêreld gaan geniet, geld selfs vir die diereryk: “Dan wei die wolf by die lam, en die luiperd gaan lê by die bokkie, en die kalf en die jong leeu en die vetgemaakte vee bymekaar, en ’n klein seuntjie sal hulle aanja. . . . Hulle sal geen kwaad doen of verderf aanrig op my hele heilige berg nie; want die aarde sal vol wees van die kennis van die HERE soos die waters die seebodem oordek.”—Jesaja 11:6-9.

Hoe naby?

As jy dink dat dit alles net leë beloftes is, te goed om te glo, moet jy weer vir ’n oomblik daaroor nadink. Buiten die aspekte van die saamgestelde teken van Christus Jesus se teenwoordigheid is daar ook Bybelchronologie wat na 1914 as die begin van sy teenwoordigheid gewys het. Jehovah se Getuies het die jaartal 1914 as ’n betekenisvolle jaar in die ontstaan van Jehovah se Koninkryksheerskappy oor die aarde in die Watch Tower van Julie 1879 bekend gemaak. Baie geskiedkundiges en dié wat wêreldgebeure dophou, het gesê dat die jaar 1914 ’n heeltemal verskillende en betekenisvolle tydperk in die mensegeskiedenis ingelui het, soos die bygaande venster toon.

Nog ’n gebeurtenis wat Jesus gegee het, is in Mattheüs 24:21, 22: “Dan sal daar groot verdrukking wees soos daar van die begin van die wêreld af tot nou toe nie gewees het en ook nooit sal wees nie. En as daardie dae nie verkort was nie, sou geen vlees gered word nie; maar ter wille van die uitverkorenes sal daardie dae verkort word.”

Jesus het ook getoon dat hierdie saamgestelde teken sy voltooiing sal bereik gedurende die lewensduur van die geslag wat die begin daarvan in 1914 gesien het. Hy het in Mattheüs 24:32-34 gesê: “En leer van die vyeboom hierdie gelykenis: Wanneer sy tak al sag word en sy blare uitbot, weet julle dat die somer naby is. So weet julle ook, wanneer julle ál hierdie dinge sien, dat dit naby is, voor die deur. Voorwaar Ek sê vir julle, hierdie geslag sal sekerlik nie verbygaan voordat al hierdie dinge gebeur het nie.”

Om hierdie ou wêreld—met al sy oorloë, hongersnode, pessiektes en sterftes—tot ’n einde te sien kom, sal ’n rede tot vreugde wees. Om te sien dat dit vervang word deur Jehovah God se nuwe wêreld van geregtigheid—wat droefheid, trane, siekte en die dood tot ’n einde sal bring—sal rede gee tot eindelose feesviering en vreugde en ewigdurende lofuitinge aan Jehovah God, die Grootse Skepper en Universele Soewerein.

Met dit in die vooruitsig is dit geen wonder dat baie so gretig is dat Jehovah se nuwe wêreld van geregtigheid gou moet kom en hierdie oue vol droefheid, misdaad, siekte en die dood moet vervang nie! Dit is geen wonder dat hulle so gretig is dat hulle geneig is om vroeë datums vir die koms daarvan te bepaal nie! Nou is daar egter nie net gedeeltes van die teken van die koms om ons in die versoeking te bring om vals alarms te gee nie. Ons kan nou die volledige saamgestelde teken sien ontvou wat ons ’n vaste grondslag gee vir ons reikhalsende verlange na die einde van hierdie bose wêreld en na Jehovah se nuwe wêreld wat dit sal vervang.

[Venster op bladsy 11]

1914—’n keerpunt in die geskiedenis

SELFS na ’n tweede wêreldoorlog praat baie nog steeds van 1914 as die groot keerpunt in eietydse geskiedenis:

“Dit is inderdaad die jaar 1914 eerder as dié van Hirosjima wat die keerpunt in ons tyd is.”—René Albrecht-Carrié, The Scientific Monthly, Julie 1951.

“Sedert 1914 is almal wat van neigings in die wêreld bewus is diep verontrus oor wat na ’n gedoemde en voorbestemde opmars na immer groter onheil lyk. Talle ernstige mense meen nou dat niks gedoen kan word om die ongeluk af te wend nie.”—Bertrand Russell, The New York Times Magazine, 27 September 1953.

“Die hedendaagse tydvak . . . het in 1914 begin, en niemand weet wanneer of hoe dit gaan eindig nie. . . . Dit kan op massa-uitwissing uitloop.”—The Seattle Times, 1 Januarie 1959.

“Die hele wêreld het werklik om en by die Eerste Wêreldoorlog ontplof en ons weet nog steeds nie waarom nie. . . . Utopia was in sig. Daar was vrede en voorspoed. Toe het alles ontplof. Ons is sedertdien in ’n toestand van skyndood.”—Dr. Walker Percy, American Medical News, 21 November 1977.

“In 1914 het die wêreld ’n koherensie verloor wat dit nog nie weer teruggekry het nie. . . . Dit is ’n tyd van buitengewone wanorde en geweld, oor landsgrense heen sowel as daarbinne.”—The Economist, Londen, 4 Augustus 1979.

“Alles het voortdurend verbeter. Dit was die wêreld waarin ek gebore is. . . . Alles het skielik, onverwags, een oggend in 1914 geëindig.”—Britse staatsman Harold Macmillan, The New York Times, 23 November 1980.

[Prent op bladsy 10]

Volmaakte vrede vir almal in die beloofde nuwe wêreld