Jongmense vra . . .
Moet ek na ’n welvarender land trek?
TARA het haar geboorteland Trinidad verlaat, Sheila het Jamaika verlaat, en Erick het Suriname verlaat. Al drie jongmense het na ’n welvarender land getrek. Waarom?
“Ons, die jongmense in Trinidad”, verduidelik Tara, “word baie beïnvloed deur wat ons in tydskrifte en op die TV sien. Ongelukkig gee dit ons ’n geïdealiseerde beskouing van die Verenigde State en ander welvarende lande.”
Sheila het dieselfde ondervind: “Ek onthou hoe daar vir my van uitstekende werksgeleenthede en gratis onderwys vertel is.” Maar sy voeg by: “Ek weet nie hoekom nie, maar diegene wat al in hierdie lande was, het nooit die res van die verhaal vertel nie. Miskien was hulle skaam om te erken dat dinge in daardie lande nie so wonderlik is nie.”
En tog trek mense steeds. ’n Verslag in die Los Angeles Times het getoon dat die aantal mense wat van 1980 tot 1990 na ander lande getrek het, verdubbel het en waarskynlik teen die jaar 2000 weer sal verdubbel. Elke jaar trek meer as 700 000 mense na die Verenigde State. Australië, Côte d’Ivoire, Kanada en Saoedi-Arabië kry elk jaarliks meer as 50 000 immigrante, en baie van hulle is op soek na ’n voorspoediger lewe.
As jy in ’n arm of ontwikkelende land woon, wonder jy dalk ook of jy nie ’n rooskleuriger toekoms in ’n ryker land sal hê nie. Dit is ’n gewigtige besluit. Hoe kan jy ’n wyse keuse maak?
Moenie haastig besluit nie
Erick, van Suriname, glo dat jy nooit haastig moet optree nie, maar dat jy eers soveel moontlik inligting moet inwin. “Selfs in Suriname”, sê hy, “het die meeste gesinne familielede in die groot lande, en jy behoort by hulle die jongste inligting te kan kry en te kan hoor wat die ware toestand van die wêreld se ekonomie is.”
Onthou egter voor jy besluit: “Planne misluk sonder beraadslaging, maar deur die veelheid van raadgewers kom dit tot stand” (Spreuke 15:22). Bespreek dus jou keuses openhartig met jou ouers, Christen- ouere manne en ander ervare mense wat vir jou omgee.
Moenie alles glo wat jy hoor nie
Wanneer jy rooskleurige berigte oor welvarende, verafgeleë lande hoor, moet jy nie alles vir soetkoek opeet nie. “Die eenvoudige glo elke woord”, sê ’n wyse spreuk, “maar die skrandere let op sy voetstappe.”—Spreuke 14:15.
Sheila, wat in Jamaika gewoon het, het gesê: “My Engelse onderwyser het volgehou dat ek die allerbeste ding sou doen as ek na die Verenigde State sou trek. Party volwassenes het gesê dat ek, ongeag watter arbeidsveld ek kies, daarby sou baat as ek na Kanada, die Verenigde State of Engeland sou gaan. Kortom, dit sou onnosel van my wees om so ’n geleentheid te laat verbygaan.”
Het dit haar werklik gehelp om na die Verenigde State te trek? “My lewe het in die meeste opsigte verbeter, maar my vriende wat in Jamaika gebly het, het ook hulle lewens verbeter. Gewoonlik verruil jy een probleem vir ’n ander. Waar jy woon, sal nie vanselfsprekend ’n groot verskil maak nie.”
Tara, wat van Trinidad na die Verenigde State getrek het, stem saam: “Mense het die welvarende lande voorgehou as lande vol geleenthede—om te studeer, te werk, meer geld te maak en onder beter toestande te lewe. Maar nou besef baie wat getrek het dat toestande oral besig is om te versleg. Party het teruggetrek.”
Oorweeg die voor- en nadele
Ten einde ’n gebalanseerde besluit te neem, moet jy nie net die rooskleurige berigte van oorvloedige rykdom in ander lande in ag neem nie. Oorweeg die voor- en nadele—ekonomies, maatskaplik, sedelik en geestelik—wat so ’n stap kan behels.
Die ekonomie is byvoorbeeld moontlik swak waar jy woon. Maar is daar geen werksgeleenthede naby jou huis nie? “Tuis”, sê Tara, “was baie mense werkloos, veral diegene sonder geleerdheid.” Daarom het sy getrek; haar broers het agtergebly. “My twee jonger broers het ’n kursus in meubelmakery en -stoffeerdery gevolg. Nou werk hulle in fabrieke en kry hulle baie privaat werk van mense wat van hulle werk hou. Hulle doen tuis heel waarskynlik beter as wat ek hier in die ‘land vol geleenthede’ doen.”
As jy wel trek, sal jy waarskynlik met ’n kultuurskok te kampe hê, miskien selfs met ’n algehele aanslag op die sedelike beginsels waaraan jy baie waarde heg. Is die trek so ’n risiko werd? Materialisme is boonop iets algemeens in welvarende lande. Hoe kan dit jou geestelik beïnvloed?
Leer deur Esau se foute
Toe Esau in Bybeltye die voor- en nadele van besluite moes opweeg, het hy ’n ernstige probleem gehad. Hy het telkens nagelaat om deurslaggewende faktore—sy geestelikheid en sy gesin—in aanmerking te neem. Gevolglik was party van sy grootste besluite rampspoedig.
Die Bybel bevat ’n waarskuwing vir “enigiemand wat heilige dinge nie waardeer nie, soos Esau, wat in ruil vir een maaltyd sy regte as eersgeborene weggegee het” (Hebreërs 12:16, NW). Hierdie eersgeboortereg was heilig. God het vir Esau se gesin ’n geleentheid geskep om in die geslagslyn van die Messias, die sleutel tot die mensdom se redding, te wees (Genesis 22:18). Maar Esau het “sy eersgeboortereg verag”. Hy het dit geredelik vir ’n maaltyd van lensies verkoop! (Genesis 25:30-34). Jou verhouding met jou Skepper is jou kosbaarste besitting. Moenie dit verruil, geringskat of ter wille van enige materiële gewin in gevaar stel nie.—Markus 12:30.
Toe Esau later uit sy ouerhuis na ’n ander land getrek het, het hy met twee Hetitiese vroue getrou. Hierdie huwelike kon om die een of ander rede prakties gelyk het, maar op geestelike gebied het hulle net probleme veroorsaak omdat die vrouens nie die God van Esau se ouers, Isak en Rebekka, aanbid het nie. Daardie vrouens was “’n bitter verdriet” vir sy ouers.—Genesis 26:34, 35.
Dit is niks ongewoons vir jongmense om te trou net om toegang tot ’n welvarender land te verkry nie. Uit Indië het daar glo 4000 huweliksmaats per jaar na die Verenigde State getrek, en na raming is daar sowat 10 000 wat nog wag om dit te doen. Die huwelik is egter ’n kosbare gawe van God. Dit moenie goedkoop gemaak word en bloot as ’n kaartjie gebruik word om ’n grens oor te steek nie. Dink ook hoe dit Jehovah en jou getroue familielede sal seermaak as jy ‘in dieselfde [ongelyke] juk saam met ’n ongelowige sou trek’.—2 Korinthiërs 6:14.
Voer jou besluit suksesvol uit
Hoe goed jy jou besluit gaan uitvoer, kan belangriker wees as die besluit self. Hetsy jy bly waar jy is of besluit om te trek, die belangrikste ding is om jou besluit suksesvol uit te voer.
As jy bly: Moenie diegene wat trek kritiseer nie. Hulle dra self die verantwoordelikheid vir hulle besluit (Romeine 14:4; Galasiërs 6:4, 5). Leer om die prag en voordele te waardeer wat eie aan jou geboorteland is. Kweek meer liefde aan vir die mense en empatie vir die moeilikhede en uitdagings waarmee hulle te kampe het.
As jy trek: Besluit wyslik wat jou prioriteite gaan wees terwyl jy nuwe gebruike en miskien ’n nuwe taal aanleer. Moenie vasgevang word in lang werksure net om materiële besittings te verkry wat jy nooit vantevore nodig gehad het nie. Andersins sal jy dalk gou te besig wees vir geestelike dinge.
“In vandag se wêreld is dit baie belangrik om ’n werk te hê”, het Sheila erken. “Maar familie, vriende en geestelike sake is belangriker. Wanneer alle ander dinge misluk, is dit hulle wat ons aan die gang hou.” Die Bybel waarsku ons wyslik om nie die wêreld “ten volle [te] gebruik nie; want die gedaante van hierdie wêreld gaan verby” (1 Korinthiërs 7:31). Diegene wat werklik sukses behaal, hou besorgdheid oor werk en geld op die regte plek—ver agter gesinsbehoeftes en geestelike strewes.
Kies nuwe vriende versigtig. Erick sê: “Behou kontak met vriende wat ’n opbouende lewenswyse bevorder.”
Onthou jou ware behoeftes
Die dinge wat ons werklik vir geluk nodig het, verander nie. “Dit maak nie saak waar ons woon nie”, merk Sheila op, “Jehovah se vereistes vir ons bly dieselfde.” Wat is sy vereistes? Jesus het dit bondig gestel: “Gelukkig is dié wat bewus is van hulle geestelike behoefte.” “Moet julle . . . nie kwel” of julle genoeg kos of klere gaan hê nie. Gee eers die voorkeur aan “die koninkryk van God en [God se] geregtigheid, en al hierdie dinge sal vir julle bygevoeg word”.—Mattheüs 5:3, NW; 6:31, 33.
As jy volgens hierdie beginsels lewe, kan dit jou help om in enige land ’n beter lewe te vind.
[Prente op bladsy 18]
Ryk lande kan aantrekliker lyk as wat hulle werklik is