Jongmense vra . . .

Hoe kan ek ’n mislukte romanse verwerk?

“HY HET my regtig baie spesiaal laat voel. Ek het gevoelens gehad wat ek nooit tevore gehad het nie. Maar toe sê hy dat hy nie dink dit sal uitwerk nie. Ek het gedink my lewe was verby. Ek het dag en nag gehuil. Ek het nie geëet nie, ek het niks geslaap nie, ek het 15 kilogram binne ’n paar maande verloor en ek het selfs brongitis gekry. Die lewe het vir my niks meer beteken nie.”—Renee.

As jy al seergekry het as gevolg van ’n mislukte romantiese verhouding klink hierdie woorde dalk bekend. Jy weet goed wat dit beteken om baie van iemand te hou, en dan te sien hoe jou drome in duie stort. Die gevoel van verworpenheid is intens en vernederend. Terwyl jy sukkel om die pyn te verwerk, wonder jy dalk: ‘Waarom kan ek dit nie net daarby laat nie—van die persoon vergeet en met my lewe aangaan nie?’ Dit is selde so maklik.

Waarom is dit so moeilik?

Een studie het getoon dat die bande van romantiese liefde baie sterk kan wees. Dit is al selfs vergelyk met die bande tussen ’n ouer en sy kind. Hoewel dit ongetwyfeld lank sal neem voordat romantiese liefde so sterk sal word, kan die gevoelens nogtans van die begin af sterk wees. Jy kan hulle nie net aan- en afskakel soos jy met ’n ligskakelaar kan doen nie. En as jy in “die jeugdige leeftyd” is soos die Bybel dit noem, kan dit amper oorweldigend wees wanneer jy seksuele begeertes begin ondervind (1 Korinthiërs 7:36). Daarom is dit besonder moeilik om die verlies van ’n kêrel of ’n meisie te aanvaar.

’n Geneigdheid om te fantaseer kan ook ’n rol speel. Een studie deur navorsers toon dat adolessente “kwetsbaarder is omdat hulle geneig is om oor hulle toekoms met hulle kêrel of meisie te fantaseer wanneer hulle ’n romantiese verhouding aanknoop. Hierdie fantasieë sluit moontlik drome in om te trou, kinders te hê en die res van hulle lewe bymekaar te wees.” Dit kan moeilik wees om nie oor sulke dinge te droom nie, selfs wanneer dit baie onwaarskynlik is dat dit ’n werklikheid sal word.

Ander het jou steeds lief

Dieselfde studie toon dat “die verlies van ’n kêrel of meisie . . . tot gevoelens van persoonlike mislukking en onbevoegdheid kan lei”. Jeanette sê: “Jy voel neerslagtig, asof daar niemand is om jou by te staan nie. Jy gee vir niks meer om nie. Jy voel verworpe.” Net so voel baie ander ook neerslagtig, skuldig en waardeloos en vind hulle dit moeilik om te konsentreer. Party het al selfs selfmoord gepleeg.

Dit kan dus vir jou ’n gevaarlike tyd wees. Maar hou Jesus se vermaning in gedagte dat ‘jy jou naaste moet liefhê soos jouself’ (Markus 12:31). ’n Mate van eieliefde is nodig en gepas. Die feit dat een persoon nie jou liefde beantwoord het nie, beteken mos nie dat jy onbeminlik is nie, of hoe? Jy kan tog nie tot die gevolgtrekking kom dat niemand anders jou ooit begeerlik of aantreklik sal vind nie, kan jy? Het jy dan nie familielede en vriende wat jou liefhet nie?

Nog belangriker, hoe voel God oor jou? Lea, ’n vrou wat in Bybelse tye geleef het, moes die pyn van verworpenheid baie intens gevoel het. Sy het goed geweet dat haar man, Jakob, bedrieg moes word om met haar te trou en dat hy haar suster, Ragel, liewer gehad het. Dit is geen wonder dat dit vir haar gevoel het asof sy as ’t ware die “nie-geliefde” was en dat sy ongelukkig was nie. Maar God was lief vir Lea. Hy het haar met baie kinders geseën, en die priesterlike lyn van Israel sowel as die koninklike lyn—waaruit die Messias gebore is—het deur haar gekom en nie deur Ragel nie.—Genesis 29:30-35.

Geen mate van verworpenheid kan die werklikheid van God se seën en liefde verander nie. Onthou, die Skepper van die heelal het jou só lief dat hy toegelaat het dat sy Seun om jou ontwil ly en sterf (Johannes 3:16). Jy is nie onbeminlik nie, en jy is beslis nie waardeloos nie.

Wanneer ’n verbroke verhouding in werklikheid ’n seën is

Jy dink dalk dat hierdie verbroke verhouding een van die ergste dinge is wat tot nog toe met jou gebeur het, maar dit is dalk net die teendeel. Hoe moeilik dit ook al is om te glo, die verbreking van jou romanse is heel moontlik ’n seën. Hoe so? Die meeste romantiese tienerverhoudings se kanse op sukses is baie skraal. Jongmense groei en verander nog; hulle is vatbaar vir verbygaande begeertes en dink maklik dat hulle iemand liefhet. Nietemin trou duisende tieners elke jaar en vind dan te laat uit dat dit ’n fout was. ’n Direkteur van ’n koerant het ná haar egskeiding gesê: “Dit was werklik ’n fout om so jonk te trou. Ek het nie werklik begryp dat ons waardes en agtergrond baie verskil het nie.”

’n Skokkende aantal tienerhuwelike misluk. Al voel jy nou dus baie hartseer daaroor, kan jy van een ding verseker wees—jy sou baie erger gevoel het as jy in ’n ongelukkige huwelik vasgevang was. Vra jou af of jy werklik gereed was vir ’n lewenslange huwelik met al sy verantwoordelikhede, wat die grootmaak van kinders insluit. En was die persoon wat jy liefgehad het werklik gereed en volwasse genoeg vir die verantwoordelikheid? Hou in gedagte dat dit nie naastenby so pynlik is wanneer ’n hofmakery beëindig word as wanneer ’n huwelik ontbind word nie.

Die beëindiging daarvan was veral ’n seën as jy die fout gemaak het om met iemand deurmekaar te raak wat nie Goddelike beginsels en sedelike standaarde respekteer nie (2 Korinthiërs 6:14). Shana sê sy onthou watter sedelike gevare dit ingehou het toe sy ’n wêreldse kêrel gehad het: “Hy het altyd gesê hy het my lief. Maar toe het hy my begin vra om geslagsomgang met hom te hê. Ek het nee gesê. Ek het besef dit sou verkeerd wees. Naderhand het hy opgehou om my te bel. Ek het elke nag gehuil—dit was so moeilik om hom te verloor!” Dit is egter duidelik dat die beëindiging van hierdie verhouding voorkom het dat Shana deur ’n geestelike ramp getref is.

Jy kan dus die beëindiging van die verhouding as ’n ondervinding beskou waaruit jy iets kan leer. Soos Spreuke 22:3 sê: “’n Skrander mens sien die onheil en verberg hom, maar die eenvoudiges gaan verder en word gestraf.” Sal hierdie ondervinding jou meer skrander maak sodat jy in die toekoms probleme sal vermy?

Hoe om gevoelens te verwerk

Maar al was dit vir jou eie beswil dat die verhouding beëindig is, is dit steeds nie minder pynlik nie. Hoe kan jy die gevoelens verwerk wat net nie lyk asof hulle wil weggaan nie? Om maar een ding te noem, dit sal nie help om voor te gee dat jy niks voel nie. Soos die tydskrif ’Teen onlangs oor hierdie onderwerp gesê het, “is gevoelens nie iets waarvoor jy kan weghardloop of wegkruip nie. Hulle sal jou uiteindelik inhaal.”

Dit is heel natuurlik dat jy kwaad en baie ontsteld hieroor sal wees. Maar moenie jou gevoelens opkrop en aand ná aand ontsteld wees wanneer jy gaan slaap nie. Volg die Bybel se wyse raad: “Word toornig en moenie sondig nie; laat die son nie ondergaan oor julle toorn nie” (Efesiërs 4:26). Gesels met ’n betroubare vriend of vertroueling. “Planne misluk sonder beraadslaging”, sê Spreuke 15:22. Jou ouers of die Christen- ouere manne kan van groot hulp wees in hierdie verband. Jy vind dalk uit dat hulle soortgelyke pynlike situasies deurgemaak het toe hulle jonk was.

Nog iets wat jou kan help om jou gevoelens te verwerk, is om besig te bly. Jy is dalk geneig om jou eenkant te hou, jou af te skei, te dagdroom en belangstelling in die lewe te verloor. Jeanette sê: “Jy het nie lus om enigiets te doen nie. Jy slaap net baie.” Maar soos Spreuke 18:1 waarsku: “Hy wat hom afskei, soek sy eie begeerte; hy bestry alles wat waarlik tot voordeel strek.” Bly dus eerder besig. Begin dadelik om in groepe te assosieer met dié wat jou sal aanspoor om die regte dinge te doen.

’n Uitstekende manier om jou energie vir die regte dinge te gebruik, is om jou op die Christelike bediening toe te lê. Die apostel Paulus het geskryf: “Daarom, my geliefde broeders, wees standvastig, onbeweeglik, altyd oorvloedig in die werk van die Here, omdat julle weet dat julle arbeid in die Here nie tevergeefs is nie” (1 Korinthiërs 15:58). Jou lewe hoef nie leeg of sinloos te wees nie. Wanneer jy die goeie nuus aan ander verkondig, verskaf dit geluk en bevrediging.—Handelinge 20:35.

Onthou ook dat jy ’n ruk lank goeie dae en slegte dae sal hê. Tydens slegte dae sal jy dalk dink dat jy nooit hieroor sal kom nie. Maar die waarheid is dat jy daaroor sál kom. Wanneer ’n wond—enige wond—genees, neem dit tyd. Moenie die proses vertraag deur heeldag na romantiese of sentimentele musiek te luister en oor jou verlore liefde te dagdroom nie. Vertrou op Jehovah vir krag. Hy weet presies wat jy deurmaak en hoe jy voel. “[Jehovah] is naby die wat gebroke is van hart, en Hy verlos die wat verslae is van gees.”—Psalm 34:19.

Beter tye voor die deur

As jy jonk is, is tyd een van jou groot seëninge. Jy het nog soveel tyd tot jou beskikking om te leer en ondervinding op te doen. Gebruik dus hierdie kosbare bate verstandig; kweek eienskappe aan wat jou sal help om ’n bestendige en standvastige volwassene te word. Dit sal jou in staat stel om in die toekoms verstandige besluite oor hofmakery en die huwelik te neem.

Hoe moeilik dit ook al is, hierdie pynlike tyd in jou lewe sal verbygaan, en jy sal daarna dalk des te verstandiger wees. Renee, wat vroeër aangehaal is, sê: “Ek kan my gevoelens nou baie beter verwerk. Ek het só baie geleer. Ek het geleer dat dinge slegs goed sal gaan as dit op Jehovah se manier gedoen word.”

[Prent op bladsy 23]

Dit maak werklik seer as jy sien hoe die persoon van wie jy hou van iemand anders begin hou