Jong mense vra . . .

Is dit werklik so verkeerd om met onsedelikheid te speel?

“My kêrel het eendag kom kuier toe my ma nie by die huis was nie, kwansuis net om TV te kyk”, vertel Laura.a “Hy het eers net my hand vasgehou. Toe het sy hande skielik begin dwaal. Ek was bang om te sê dat hy moet ophou; ek het gedink dit sou hom omkrap en dat hy sou wou loop.”

LAURA en haar kêrel het dus al hoe dieper by onsedelike gedrag betrokke geraak. Hartstogtelike soenery het tot ernstiger onwelvoeglikhede gelei. Tog is daar maar min mense in vandag se wêreld wat sulke gedrag sal afkeur. Trouens, opnames toon dat die oorgrote meerderheid van jongmense in die Verenigde State al geslagsomgang gehad het teen die tyd dat hulle 19 is! Vurige soenery en selfs die liefkosing van intieme liggaamsdele is vir talle weinig meer as ’n onskadelike tydverdryf. Sommige jongmense spog met hoe ver hulle al op seksuele gebied gegaan het.

Ongelukkig het party jong Christene al by sulke wangedrag betrokke geraak. Hulle dink blykbaar dat so lank hulle nie “te ver” gaan nie dit geen kwaad doen nie.

Geestelike skade

Dit is alles behalwe die geval. Die Bybel veroordeel diegene wat hulle vryhede met die ander geslag veroorloof. Wat sommige as “onskuldige” liefkosing sou bestempel, kan neerkom op wat die Bybel onreinheid, losbandige gedrag of selfs hoerery noem. Hierdie is ernstige oortredings wat tot uitsetting uit die Christengemeente kan lei.—Galasiërs 5:19, 21.

Om met geslagsonsedelikheid te speel, is dus nie iets wat lig opgeneem moet word nie. Dit is ’n “besoedeling van die vlees en gees”—iets wat jou verhouding met God ernstig kan benadeel (2 Korinthiërs 7:1). Op die lange duur kan dit selfs veroorsaak dat jou verstand “verderf sal word, weg van die opregtheid en kuisheid af wat die Christus toekom” (2 Korinthiërs 11:3, NW). ’n Jong persoon wat tot onreine gedrag oorgehaal word of wat iemand anders daartoe oorreed, kan eenvoudig nie Christelike “liefde uit ’n rein hart en ’n goeie gewete en ’n ongeveinsde geloof” betoon nie.—1 Timotheüs 1:5, 19.

Iemand wat te ver gaan in die betoning van toegeneentheid kan emosionele skade ly. Die rede hiervoor is, soos ’n artikel in die tydskrif Seventeen ons daaraan herinner, dat “die verskillende maniere waarop mense mekaar kan aanraak . . . net so intiem en intens soos gemeenskap kan wees”. Terwyl soene en liefkosings dus fisies opwindend kan wees, vind meisies veral dat die ervaring hulle ná die tyd emosioneel leeg laat voel. Die Journal of Marriage and the Family sê: “Vroue sê dat hulle gevoelens van vrees, skuld, angs, verleentheid en selfs weersin ondervind.”

Is dit liefde?

Beskou die Bybel se verslag in Spreuke hoofstuk 7, wat vertel hoe ’n jong man deur ’n prostituut verlei word. Daardie onsedelike vrou het vir die jong man gesê: “Kom, laat ons dronk word van liefde tot die môre toe, laat ons mekaar vrolik maak in welluste.” Die gedagte daaraan om bemin te word, het ongetwyfeld vir hierdie jong man aantreklik geklink. Maar in werklikheid het die prostituut “hom verlei deur haar baie mooipraatjies, deur die gladheid van haar lippe het sy hom verlok”. Nee, sy het die jong man nie werklik liefgehad nie; hy was net ’n kliënt. Sy het hom tot die uiterste toe uitgebuit.—Spreuke 7:18-21.

Baie jongmense—veral meisies—word vandag op ’n soortgelyke manier uitgebuit. Dit is veral meisies wat gewoonlik oorgehaal moet word om die grense van welvoeglikheid oor te steek. Volgens die boek The Compleat Courtship deur Nancy Van Pelt het “een studie aan die lig gebring dat die algemeenste argument wat [deur seuns] gebruik word, is: ‘As jy my liefhet, sal jy dit doen.’” Die skryfster sê dat mans hierdie argument al “van die vroegste tyd af” gebruik.

Maar toon iemand werklik sy liefde vir jou as hy jou by gedrag betrek wat onrein is en deur die almagtige God veroordeel word? Nie volgens God se Woord nie. Daardie boek herinner ons daaraan dat ware ‘liefde . . . nie onwelvoeglik handel nie’ (1 Korinthiërs 13:4, 5). Die skryfster Nancy Van Pelt vra: “As hy wel kry wat hy soek, watter bewyse sal jy hê dat hy jou sal liefhê as dit alles verby is? Hy het jou heel waarskynlik net gebruik.”—Vergelyk 2 Samuel 13:15.

As ’n seun druk op ’n meisie uitoefen sodat sy haar Christelike opleiding en gewete skend, maak hy ’n klug van enige bewering dat hy haar waarlik liefhet. En as ’n seun sê dat hy ’n Christen is, maak hy ’n klug van sy sogenaamde Christenskap. ’n Meisie wat aan hierdie intimidasie toegee, word uitgebuit, gebruik en verneder. Nog erger, sy het ’n onreine daad gepleeg, miskien selfs hoerery, wat ’n ernstige oortreding van God se wet is.—1 Korinthiërs 6:9, 10.

Dit is waar dat sommige meisies gewillige deelgenote is. Maar selfs as albei inwillig om iets te doen wat verkeerd is, regverdig dit nie die daad nie. “Daar is ’n weg wat vir ’n mens reg lyk, maar die einde daarvan is weë van die dood”, sê Spreuke 14:12.

Skade aan die verhouding

Party dink dalk dat fisiese betuigings van toegeneentheid ’n verhouding versterk. Maar as ’n paartjie hulle onwelvoeglike seksuele vryhede veroorloof, maak dit nie ’n verhouding hegter nie. Dit maak dit goedkoop. Op sy allerminste breek dit onderlinge respek en vertroue af. “Ek het later kwade gevoelens teenoor die ou gekoester”, erken een meisie wat haar aan onreine gedrag skuldig gemaak het.

’n Gebrek aan selfbeheersing tydens hofmakery kan steeds ’n negatiewe uitwerking hê selfs nadat ’n paartjie trou. Selfbeheersing, geduld en onselfsugtigheid is die grondslag van ’n bevredigende seksuele verhouding in die huwelik (1 Korinthiërs 7:3, 4). Maar party paartjies maak gedurende hulle hofmakery ’n gewoonte daarvan om aan selfsugtige begeertes toe te gee, selfbeheersing oorboord te gooi en die ander se gevoelens te ignoreer. Dit kan ’n huwelik ’n slegte begin gee.

Wanneer hartstogtelike soenery en aanraking begin, beteken dit gewoonlik die einde van sinvolle kommunikasie. Noodsaaklike beraadslaging—oor doelwitte, aspirasies en gevoelens—word deur verstandelose, hartstogwekkende gedrag vervang. Spreuke 15:22 waarsku: “Planne misluk sonder beraadslaging.” Aangesien baie paartjies nie tydens hulle hofmakery ’n vaste grondslag vir die huwelik lê nie, ondervind hulle groot frustrasie en skuldgevoelens wanneer hulle uiteindelik trou.

Maak ’n einde aan verkeerde begeertes

Nog iets om in gedagte te hou, is die Bybelbeginsel in Kolossense 3:5: “Maak dood dan julle lede wat op die aarde is, naamlik hoerery, onreinheid, hartstog, slegte begeertes en gierigheid, wat afgodediens is.” Pleks van “slegte begeertes” te verlig, wakker soene en liefkosings dit net aan. ’n Jong man, Jack, vertel wat met hom en sy verloofde gebeur het: “In die begin was dit net ’n soenery. Maar daarna het dit tot hartstogtelike soene en intieme liefkosings oorgegaan, tot ons selfs eenkeer amper hoerery gepleeg het. Ek het geweet dat wat ons gedoen het nie reg was volgens Jehovah se standaarde nie.”

’n Jong meisie, Vera, wat ook by sulke wangedrag betrokke geraak het, erken dat soene en liefkosings ’n begeerte in haar gewek het om “geslagsomgang te hê”. Dit is presies wat soms gebeur. Die Bybel toon dat ’n mens se gewete deur die sonde verhard kan word (Hebreërs 3:13). Wanneer iemand daaraan gewoond raak om hom onwelvoeglike vryhede te veroorloof, kan onsedelikheid toeneem. Een seksuele daad lei tot ’n volgende. “As jy jou weer kom kry”, erken Laura (na wie ons in die begin verwys het), “liefkoos jy die persoon op ’n intieme wyse. En dis net oomblikke later wat jy hoerery pleeg. Dis wat met my gebeur het.”

Ongelukkig het dieselfde met baie ander jongmense gebeur. ’n Ou spreuk waarsku: “Kan iemand vuur in sy skoot dra sonder dat sy klere verbrand?” (Spreuke 6:27). Die antwoord is voor die hand liggend. En wat jong Christene betref, hulle moet God se waarskuwing ernstig opneem: “Moenie dwaal nie; God laat Hom nie bespot nie; want net wat die mens saai, dit sal hy ook maai.”—Galasiërs 6:7.

Daarbenewens sê God se Woord: ‘Geen hoereerder of onreine of gierigaard, wat ’n afgodedienaar is, het ’n erfdeel in die koninkryk van Christus en van God nie’ (Efesiërs 5:5). Om dus met onsedelikheid te speel, het ernstige gevolge en kan selfs beteken dat ’n Christen sy of haar hoop op die ewige lewe in God se nuwe wêreld verloor.—Openbaring 22:15.

[Voetnoot]

[Lokteks op bladsy 18]

Opbouende groepbedrywighede help jou om gevaarlike situasies te vermy

[Prent op bladsy 17]

As ’n paartjie hulle onwelvoeglike seksuele vryhede veroorloof, maak dit ’n verhouding goedkoop