Is reïnkarnasie die sleutel tot die geheime van die lewe?
Het jy voorheen gelewe?
Sal jy weer ná jou dood in die een of ander lewensvorm lewe?
Hierdie vrae laat jou moontlik aan die leerstelling van reïnkarnasie dink.
The New Encyclopædia Britannica definieer “reïnkarnasie” as volg: “’n Geloof in die hergeboorte van die siel in een of meer opeenvolgende lewensvorme, wat ’n mens, ’n dier of in sommige gevalle ’n plant kan wees.”
Reïnkarnasie speel ’n belangrike rol in die Oosterse gelowe, veral in dié wat in Indië ontstaan het, soos Boeddhisme, Hindoeïsme, Djainisme en Sikhisme. Die Hindoes in Indië beskou die lewe byvoorbeeld as ’n voortdurende kringloop van dood en hergeboorte.
Maar in meer onlangse jare het die idee van reïnkarnasie baie wat in die Westelike Halfrond woon, begin fassineer, waaronder etlike jongmense. Volgens die artikel van ’n rubriekskrywer in Kanada se Sunday Star is die rede vir baie van hierdie belangstelling “die gevolg van die uitwerking wat Oosterse godsdiensopvattings op ons Westerse gemeenskap gehad het, iets wat gedurende die sestigerjare begin het”.
Nog ’n rede vir die belangstelling in reïnkarnasie is dat sekere beroemde persone hulle daaroor uitgespreek en in alle erns beweer het dat hulle een of meer vorige lewens gehad het. Die radio, TV, tydskrifte en ander nuusmedia sowel as verskillende beroepsmense, soos dokters en onderwysers, het ook belangstelling in reïnkarnasie getoon.
Dit alles het baie nuuskierigheid gewek. Volgens sommige meningspeilings het ongeveer ’n kwart van die inwoners van Kanada en die Verenigde State dus erken dat hulle in sekere mate in reïnkarnasie glo.
Bewerings van vorige lewensondervindinge
Die aktrise Shirley MacLaine het tydens ’n onderhoud met Phyllis Battelle in die Ladies’ Home Journal beweer dat sy verskeie “reise” terug in die tydstroom onderneem het. “Ek onthou talle van my vorige lewens—soms was ek ’n man, ander kere ’n vrou”, het sy gesê.
In die boek Coming Back het dr. Raymond Moody die proefnemings beskryf wat hy op sy studente en ander gedoen het. Hy het gesê dat hy hulle deur middel van hipnose na die tyd voor hulle geboorte teruggeneem het, en hulle het beweer dat hulle dinge uit vorige lewens kan onthou. Een persoon het gesê dat hy as ’n Eskimo in ’n Eskimo-gemeenskap gelewe het. ’n Ander een het beweer dat hy gedurende ’n ‘steentydperk’, duisende jare gelede, gelewe het.
Dr. Moody self het beweer dat hy nege vorige lewens gehad het. Dit het gewissel van ’n lewe in die boomtoppe as ’n soort “mens uit die oertyd” tot ’n lewe in die dae van die Romeinse Ryk toe hy, volgens hom, deur ’n leeu in die arena aangeval en doodgemaak is.
Die gebruik van hipnose om nuuskierige mense na ’n vermeende tyd voor hulle geboorte terug te neem, is ook al beskryf as iets wat vir ander voordelig is. Dokters het hipnose al gebruik om mense wat emosionele versteurings het te behandel. Daar word beweer dat vreemde fobieë al verlig is deur die probleem na die een of ander gebeurtenis in ’n vorige lewe terug te voer. Hoe grondig is hierdie opvatting?
Verhale van skyndoodondervindinge
Die skyndoodondervindinge waarvan sommige mense vertel, het die opvatting van reïnkarnasie gewild gemaak. In die boek Life After Life meld dr. Moody sy bevindinge met betrekking tot die skyndoodondervindinge van sowat 50 mense.
Hoewel hulle ondervindinge verskil, meen dr. Moody dat dit ’n patroon vorm. Hierdie mense het die gevoel gehad dat hulle deur ’n lang, donker tonnel reis. Hulle het gevoel asof hulle van hulle liggaam geskei is en dat hulle vrylik gesweef het. Hulle het die gevoel gehad dat hulle baie vinnig deur die tonnel na ’n baie skerp lig beweeg het, en aan die einde van die tonnel het hulle familielede gesien wat lank reeds dood is. Uiteindelik het hulle in hulle eie liggaam wakker geword. Maar nie almal het elkeen van hierdie stadiums ondervind nie.
Na bewering het sulke ondervindinge ’n positiewe uitwerking gehad op diegene wat dit ondervind het. As dit die geval is, moes dit hulle gehelp het om hulle vrees vir die dood te verloor en moes dit hulle die vertroue gegee het dat die lewe wel ’n doel het. Maar dit was nie altyd die geval nie. Baie vrees steeds die dood en glo nie dat die lewe ’n ware doel het nie.
Diegene wat in reïnkarnasie glo, sê dat sulke ondervindinge die opvatting steun dat die mensesiel weer in verskillende lewensvorme gebore word. Maar is hierdie leerstelling enigsins geloofwaardig? Voorsien reïnkarnasie werklik die sleutel tot die geheime van die lewe? Kan ons hoegenaamd enige antwoord op die volgende vrae kry: Het jy voorheen gelewe? Sal jy weer lewe? Het die mens ’n siel wat die liggaam by die dood verlaat? Hierdie vrae sal in die volgende artikels bespreek word.
[Lokteks op bladsy 4]
Hindoe-kringloop van die lewe
[Prent op bladsy 4]
Reïnkarnasie het sy oorsprong in die Oosterse gelowe