Kan rykdom geluk koop?

KLAARBLYKLIK maak dit mense nie gelukkiger om meer geld as ander te hê nie. Die tydskrif Psychology Today sê: “Wanneer ’n mens eers bo die armoedegrens uitgestyg het, hou ’n toename in ’n mens se inkomste verbasend min met jou geluk verband.”

Hierdie stelling is bevestig in ’n doodsberig in die New York Times van 29 Oktober 1993 met die opskrif: “Doris Duke, 80, erfgenaam wie se groot rykdom nie geluk kon koop nie, is dood.” Die artikel het gesê: “Laat een aand in 1945 in Rome het mej. Duke, wat toe 33 jaar oud was, aan ’n vriend gesê dat haar groot rykdom in sekere opsigte ’n hindernis tot geluk is.”

“Al daardie geld is soms ’n probleem”, het mej. Duke vir ’n vriend gesê. “Wanneer ek eers ’n paar keer met ’n man uitgegaan het, begin hy my vertel hoe lief hy my het. Maar hoe weet ek of hy dit werklik bedoel? Hoe kan ek ooit seker wees?” Die Times het gesê: “Haar woorde daardie aand het getoon dat haar rykdom ’n diepgaande invloed op haar lewe gehad het, dat dit haar lewe selfs benadeel het.”

Op dieselfde trant het Jean Paul Getty, wat eens as die wêreld se rykste man beskou is, gesê: “Geld hou nie noodwendig met geluk verband nie. Miskien met ongelukkigheid.” En Jane Fonda, ’n bekende Hollywood-aktrise, wat gedurende die sewentigerjare ’n halfmiljoen dollar per rolprent ontvang het, het gesê: “Ek het rykdom en al die materiële dinge gesmaak. Dit beteken niks. Daar’s net soveel psigiaters as swembaddens hier rond, om nie eens te praat van egskeidings en kinders wat hulle ouers haat nie.”

Terwyl rykdom alleen nooit geluk sal bring nie, sal volslae armoede ook nie. ’n Wyse man het gevolglik lank gelede gesê: “Gee my nie armoede of rykdom nie” (Spreuke 30:8, 9). ’n Ander Bybelskrywer het getoon dat wat ’n mens nodig het om gelukkig te wees, is “godvrugtige toegewydheid tesame met vergenoegdheid. Want ons het niks in die wêreld ingebring nie, en ook kan ons niks uitdra nie. As ons dus voedsel, klere en onderdak het, sal ons met hierdie dinge tevrede wees.”—1 Timotheüs 6:6-10, NW.