Waar geld aan bome bly

GESTEL geld het aan bome gegroei en jy het so ’n boom besit. Verbeel jou nou dat jou boom digby ’n paadjie geplant is waarlangs tientalle van jou bure elke dag loop. Hoe lank dink jy sal die geld aan die boom bly?

As al jou bure Jehovah se Getuies is, sal jou geld veilig wees. Waarom sê ons so? Omdat Jehovah se Getuies die Bybelse opdrag volg om hulle in alles eerlik te gedra (Hebreërs 13:18). ’n Onlangse voorval lig dit toe.

In Nigerië, Wes-Afrika, is ’n vyf-nairanoot in die straat gevind wat honderd meter van die naaste gebou van die Wagtoringgenootskap se takkantoorkompleks is. Die persoon wat dit gevind het, het dit aan ’n nabygeleë kokospalm vasgebind, want hy het gedink die persoon wat die geld verloor het, sal moontlik terugkeer om daarna te soek.

Al was die geld duidelik sigbaar vir die tientalle Getuies van Jehovah wat daagliks daar verbygeloop het, het niemand dit geneem nie. Ná etlike dae is dit verwyder en in die Genootskap se bydraebussie geplaas.