Landpadda of waterpadda—Is dit die enigste verskil?
PADDAS het eeue lank al ’n slegte reputasie. “Hulle veroorsaak vratte.” “Hekse kan mense in paddas verander.” Wie het nou nog nie die sprokie van die lelike padda gehoor wat in ’n aantreklike prins verander wanneer hy deur ’n prinses gesoen word nie? Maar vandat Kermit die Padda op TV gewild geword het in die kinderprogram “Sesame Street” en in “The Muppet Show” word paddas in ’n gunstiger lig beskou. Wat is die waarheid omtrent waterpaddas en landpaddas? Hoe verskil hulle van mekaar?
Kom ons stel eers sake reg—virusse veroorsaak vratte, nie paddas nie. En sprokies is presies wat dit sê dit is—sprokies, fiksie en mite. En hoewel hekse wel bestaan, kan hulle ’n mens nie in ’n padda verander nie.
Land- en waterpaddas word in die meeste wêrelddele aangetref, maar daar is geen waterpaddas in Antarktika nie, en daar is ook nie landpaddas in Arktika nie. Daar is ongeveer 3 800 spesies land- en waterpaddas, waarvan meer as 300 landpaddas is. Hoe kan jy dus ’n landpadda van ’n waterpadda onderskei? The World Book Encyclopedia gee die antwoord: “Die meeste ware landpaddas het ’n breër, platter liggaam en donkerder, droër vel as die meeste ware waterpaddas. Ware landpaddas word gewoonlik met vratte bedek, maar ware waterpaddas het ’n gladde vel. Anders as die meeste ware waterpaddas lewe die meeste ware landpaddas op land. Die volwasse landpaddas gaan slegs water toe om te paar.” Waterpaddas word gewoonlik naby water aangetref, gereed om in te spring wanneer hulle jou hoor aankom. Die meeste waterpaddas het slegs tande op hulle bokaak. Landpaddas het geen tande nie. Dit is waarom albei hulle prooi heel insluk.
Baie paddas skei gevaarlike gif af. Die rooierige pylgifpadda (Dendrobates pumilio) van Costa Rica is ’n voorbeeld hiervan. Die gif van party paddas kan ’n mens maklik doodmaak. Die boek Biology sê: “Inboorlingstamme in die trope vryf dikwels hulle pylpunte oor hierdie paddas om die gif daarop te kry.” In die Bybelboek Openbaring word “onreine geïnspireerde uitinge” met paddas vergelyk. Waarom is dit so? Omdat paddas volgens die Mosaïese Wet onrein was en nie geëet kon word nie. Landpaddas word nie in die Bybel genoem nie.—Openbaring 16:13; Levitikus 11:12.
[Prente op bladsy 31]
Regs: Landpadda. Onder: Waterpadda