Hooggeregshof van Noorweë handhaaf godsdiensregte

WATTER omstandighede kan ’n ouer onbevoeg maak om ’n kind groot te maak? Hierdie vraag word regoor die wêreld vurig in hofsake oor kindertoesig gedebatteer. Baie faktore word in ag geneem, onder meer elke ouer se gesondheid, lewensomstandighede en verhouding met die kind.

Maar wat van godsdiens? Kan ’n ouer bloot weens sy of haar geloof onbevoeg verklaar word? In Noorweë het hierdie vraag die middelpunt geword van ’n regsgeding rakende kindertoesig waarby een van Jehovah se Getuies betrokke was. Meer as twee jaar het verloop en drie verhore is gehou voordat die geskil in die Noorweegse Hooggeregshof besleg is.

Dit het in 1988 begin. Die ouers is teen Maart 1989 vir goed uitmekaar, en die moeder het toesig oor hulle dogter behou. Die vader het die saak hof toe geneem en beweer dat hy volle ouerlike verantwoordelikheid vir die dogter gegee moet word. Hy het aangevoer dat die moeder nie in staat is om ’n normale, gesonde opvoeding aan die kind te voorsien nie en dus slegs besoekreg gegee moet word. Die rede vir sy bewering? Sy assosieer met Jehovah se Getuies.

Deur die “deskundige” getuienis van teenstanders van Jehovah se Getuies te werf, het die vader die hof probeer oortuig dat die leringe en lewenswyse van Jehovah se Getuies bots met die gesindhede en waardes wat nodig is vir verantwoordelike ouerskap. Die distrikshof het 2 teen 1 beslis dat die kind vir daaglikse toesig by haar moeder moet bly, en besoekreg is aan die vader toegestaan. Die vader het appèl aangeteken by die hoërhof. ’n Beslissing van 2 teen 1 het weer eens die moeder se daaglikse toesig oor die kind gehandhaaf. Maar hierdie keer is groter besoekreg aan die vader toegestaan. Daarbenewens het dit gelyk of selfs die regters wat ten gunste van die moeder beslis het onseker was oor die kind se toekoms. Met hierdie versterkte vastrapplek het die vader appèl by die Hooggeregshof van Noorweë aangeteken.

Die vader het weer eens probeer om die opvattings van Jehovah se Getuies te diskrediteer. Hy het beweer dat dit sy dogter sou benadeel om onder so ’n invloed groot te word.

Die Hooggeregshof het egter ’n ander beskouing van die saak gehad. Ter ondersteuning van ’n uitspraak wat op 26 Augustus 1994 gelewer is, het die hof se presiderende regter verklaar: “Die moeder se lidmaatskap van Jehovah se Getuies verhinder geensins dat die daaglikse toesig oor die kind aan haar toegestaan word nie.” Hy het ook gesê: “Ek vind dat die kind goed vaar en ’n gelukkige meisie is. Dit lyk asof sy die probleme wat sekerlik moet opduik weens haar vader en haar moeder se uiters uiteenlopende lewensbeskouings redelik goed hanteer.” Sy uitspraak is eenparig deur die ander vier regters ondersteun.

Liefhebbers van die waarheid in Noorweë stel dit hoog op prys dat die Hooggeregshof se regters kon sien wat agter die vals aantygings teen Jehovah se Getuies skuil. Met hierdie beslissing het die hof bevestig dat elke individu die vryheid het om God te aanbid en sy of haar kinders ’n liefdevolle opvoeding te gee wat deur Bybelbeginsels gerugsteun word.a

[Voetnoot]