Ons beskou die wêreld
Nie ’n sonde om “in sonde te leef” nie?
Die Anglikaanse Kerk se Raad vir Maatskaplike Verantwoordelikheid het die kerk onlangs daarvan in kennis gestel dat dit nie meer ’n sonde is om “in sonde te leef” nie, het die Guardian Weekly gesê. Die raad het na bewering die kerk ook daarvan in kennis gestel dat “gemeentes by ongetroude paartjies, met inbegrip van homoseksuele en lesbiërs, kan leer en dat hulle die versoeking moet weerstaan om terug te kyk na ’n ‘goue era van die gesin’”. Die Guardian haal geestelike Philip Hacking se antwoord aan: “Dit maak ’n bespotting van die Kerk en veroorsaak groot kommer onder talle getroue Christene.”
Die vermoë om te lees en skryf gaan verlore
Ongeveer driemiljoen mense in Duitsland het die vermoë om goed te lees en skryf verloor omdat hulle dit nie oefen nie. Johannes Ring, sekretaris van die Stigting vir Lees, het verduidelik dat die vooruitgang wat die elektroniese media maak die probleem vererger. By die Wêreldkonferensie oor die Bekamping van Ongeletterdheid het Ring gesê dat die toename in hierdie soort ongeletterdheid deels te wyte is aan die algemene gebruik van televisie, rekenaars en videospeletjies, sê die Frankfurter Allgemeine Zeitung.
Drink om te dink
Sukkel jy om te konsentreer? Miskien moet jy meer water drink, stel Asiaweek voor. Die tydskrif sê dat onderwysers en ouers van sommige Hongkongse skoolkinders onlangs meegedeel is dat dit leerlinge help om lusteloosheid te bekamp as hulle baie water drink. Kinders moet 8 tot 15 glase water per dag drink, is daar vir ouers gesê. Die berig haal die boek The Learning Brain aan en verwys na studies wat toon dat ontwatering tot swak leervermoë kan lei. Dit is beter om suiwer, skoon water te drink as koeldranke, koffie, tee of selfs sappe, wat eintlik die liggaam kan stimuleer om vloeistowwe uit te skei, sê Asiaweek.
Waarskuwing teen plaagdoders
Volgens navorsers aan die Universiteit van Kalifornië in Berkeley word Amerikaners meer aan plaagdoders blootgestel deur huishoudelike produkte as deur vrugte en groente wat daarmee bespuit is. Spuitmiddels vir kakkerlakke, vlieëpapier, vlooiberokingsmiddels, motballetjies en soortgelyke produkte bevat giftige chemikalieë. Behalwe dat dit duisende vergiftigings per jaar veroorsaak, hou dit baie langtermyngesondheidsgevare in. Die UC Berkeley Wellness Letter stel veiliger alternatiewe voor: Herstel of installeer skerms en vul krake in vloere en mure om insekte uit te hou; verseël voedsel en vullis in plastiek; gebruik ’n vlieëplak; vee krummels op; laat matte stoomskoonmaak; maak wolstowwe gereeld skoon en bêre dit in verseëlde plastieksakke. As daar steeds kakkerlakke is, kan jy klewerige lokvalle gebruik of boorsuur agter kaste strooi, maar maak seker dat kinders en troeteldiere nie met hierdie produkte in kontak kan kom nie, stel die Wellness Letter voor.
TV-programme vir kinders —te gewelddadig
’n Studie van Amerikaanse netwerktelevisie het tot die gevolgtrekking gekom dat daar te veel “boosaardige gevegsgeweld” in baie programme is wat op kinders gemik is. Volgens The Wall Street Journal het die studie by die Universiteit van Kalifornië in Los Angeles verskeie gewilde tekenprentreekse uitgesonder omdat dit “geweld ter wille van geweld” bevat. Die programme word gewoonlik op Saterdagoggende vertoon, wanneer kinders nie in die skool is nie en hulle ouers miskien nog nie uit die bed is nie. Hoewel hierdie soort programme nie nuut is nie, het die studie bevind dat “die bose inslag en meedoënlose gevegte in hierdie programme ’n redelik onlangse neiging is wat blykbaar aan die toeneem is”.
Wonderboom
Britse wetenskaplikes het sade ontdek wat drinkwater kan suiwer sonder om duur chemikalieë te gebruik. Die fyngemaakte sade van die Moringa oleifera van noordelike Indië trek bakterieë en virusse aan, wat dan afgeskep of in filtreerlae opgevang kan word, sê The Times van Londen. Die veelsydige sade kan ook gebruik word om kookolie, seep, grimeermiddels, lampolie en ’n salf vir velinfeksies te maak. Die boom is maklik om te kweek, is droogtebestand, kan as ’n windskut dien en voorsien selfs brandhout en pulp om papier te maak. Navorsers stel gevolglik voor dat hierdie bome aangeplant word om sade te produseer wat sal help om elke jaar miljoene sterfgevalle as gevolg van besmette drinkwater te voorkom.
Te maer?
In ’n gemeenskap wat met voorkoms behep is, neem baie aan dat dit feitlik onmoontlik is om te maer te wees. Dit lyk miskien of ’n onlangse studie wat die gesondheidsgevare van gesetheid bevestig hierdie algemene beskouing ondersteun, maar die skrywer van die studie, JoAnn Manson van die Harvard-universiteit, wil hê dat dit bekend moet wees dat dit ook ’n gesondheidsgevaar is om te maer te wees. “Ek glo dat jy te maer kan wees as gevolg van onvoldoende voeding, te veel oefening of rook”, haal The Wall Street Journal haar aan. Terwyl dit ’n aantal dokters aanhaal wat die gevare van oordadige diëte veroordeel, noem die Journal van die gevare daarvan om onnatuurlik maer te wees, miskien 20 persent onder die gemiddelde gewig vir jou lengte. Dit is anoreksie, osteoporose, hormoonversteurings, om te val, beenbreuke en ’n stadiger genesingstempo.
Slangbyte —Wat om nie te doen nie
Wat die behandeling van slagoffers van slangbyte betref, stem deskundiges nie altyd saam nie. Maar volgens die tydskrif FDA Consumer het die meeste Amerikaanse mediese deskundiges “amper ’n eenstemmige mening oor wat om nie te doen nie”. As jy binne 30 tot 40 minute van ’n mediese fasiliteit af is, is die raad: Moenie ys op die bytplek sit nie, moenie klemverbande of elektriese skok gebruik nie en moenie insnydings in die wond maak nie. ’n Algemeen aanvaarde aanbeveling is dat alle slangbyte as mediese noodgevalle behandel moet word, hetsy die slang giftig lyk of nie, en die slagoffer moet onmiddellik na ’n hospitaal toe geneem word. Die beste voorkomingsmaatreël is om “slange met rus te laat. Baie mense word gebyt omdat hulle ’n slang probeer doodmaak of dit van nader probeer bekyk”, sê die FDA Consumer.
’n Waarskuwing vir sokkerspelers
In sokker, die gewildste sport in die wêreld, mag spelers die bal met hulle kop stamp. Maar dit kan breinskade veroorsaak as dit te veel gedoen word, sê die koerant Jornal do Brasil. Volgens ’n onlangse studie kan sokkerspelers geheueverlies en verminderde breinvaardigheid opdoen deur die bal met die kop te stamp. Hoewel dit minder ernstig is, is die aard van die skade soortgelyk aan dié waaraan sommige boksers ly wat gereelde houe teen die kop kry. Neuroloog Paulo Niemeyer Filho stel voor dat spelers dit moet vermy om die bal met hulle kop te stamp wanneer dit hoog uit die lug val of wanneer dit nat is, wat die bal swaarder maak. Party deskundiges glo dat die spelers se gesigsvermoë ook beskadig kan word as hulle die bal te veel met hulle kop stamp.
Opregte glimlagte is aansteeklik
Daar is twee soorte glimlagte, volgens die Finse navorsers dr. Jari Hietanen van die Universiteit van Tampere en dr. Veikko Surakka van die Instituut vir Biogeneeskunde by die Universiteit van Helsinki. Een soort glimlag is by deskundiges bekend as sosiale glimlagte. Dit is bloot na aanleiding van ’n pligsgevoel en behels net die spiere van die wange. Aan die anderkant druk opregte glimlagte regte gevoelens van genot uit en word nie net die spiere van die wange gebruik nie maar ook die spiere om die oë. ’n Onlangse studie uit Finland sê dat opregte glimlagte aansteeklik is. Deur baie klein spierbewegings waar te neem en op te teken, het navorsers bevind dat diegene wat aan hulle eksperiment deelgeneem het, uitgelok is om te glimlag deur net na ’n foto van iemand met ’n opregte glimlag te kyk. Hierdie reaksie is nie waargeneem wanneer hulle na foto’s van mense met sosiale glimlagte gekyk het nie.
Astroloë faal
Volgens die Duitse koerant Die Zeit het 44 astroloë in Nederland onlangs vrywillig ’n toets gedoen wat deur die Hollandse Genootskap vir Skeptici opgestel is. Die astroloë het twee lyste gekry. Een het die geboorteplek en -datum van sewe mense bevat. Die tweede het heelwat persoonlike inligting oor elk van die sewe individue voorsien. Die astroloë is gevra om elke persoon op die eerste lys te verbind met sy ooreenstemmende beskrywing op die tweede lys deur hulle beweerde vaardighede in astrologie te gebruik. Hoe suksesvol was hulle? Die helfte van die astroloë het nie eens een regte antwoord gekry nie, en nie een kon meer as drie reg kry nie. Vorige eksperimente het soortgelyke resultate gelewer, maar die astroloë het beweer dat hulle van verkeerde inligting voorsien is. Maar in hierdie geval het die astroloë self die reëls van die toets vasgestel.