Jongmense vra . . .

Waarom laat God toe dat slegte dinge gebeur?

LIDIJA was maar net ’n tiener toe oorlog uitgebreek het in haar tuisland—die land wat voorheen as Joego-Slawië bekend gestaan het. “Ek het baie dae en nagte in ’n donker skuiling deurgebring”, onthou sy. “Ek was dikwels lus om buitentoe te hardloop, selfs al sou dit my dood beteken! Voor die oorlog het jy alles gehad wat jy wou hê, maar nou was jy bly om net te kon lewe.”

Kort voor lank het die spanning van die oorlog ’n nadelige uitwerking op Lidija se geestelikheid gehad. Sy sê: “Ons kon weke lank nie in die predikingswerk uitgaan of na die vergaderinge gaan nie. Ek het regtig gedink dat Jehovah ons verwaarloos. Ek het my afgevra: ‘Waarom help hy ons nie nou nie?’”

Oorloë, misdaad, geweld, siekte, rampe, ongelukke—sulke slegte dinge kan selfs jongmense oorkom. En wanneer ’n tragedie jou tref, kan jy natuurlik wonder: ‘Waarom laat God toe dat hierdie slegte dinge gebeur?’

Godvresende manne in die verlede het sulke vrae gevra. Toe die profeet Habakuk byvoorbeeld gesien het hoe veragtelik die stand van sake onder God se volk was, het hy gekla: “Hoe lank, o HERE, roep ek om hulp, maar U hoor nie; skreeu ek tot U: Geweld!—maar U help nie? Waarom laat U my onreg sien en aanskou U die moeite!” (Habakuk 1:2, 3). Vandag ervaar party jong Christene soortgelyke emosionele benoudheid.

Let op hoe ’n jong Christen ná die onverwagte dood van haar vader gevoel het. Sy sê: “Ek het rasend geword, by die venster uitgeskreeu, op Jehovah God gegil. . . . Ek het hom vir alles blameer. Hoe kon dit gebeur? My pa was ’n goeie vader en ’n liefdevolle eggenoot, en nou gebeur dit—gee Jehovah nie om nie?” In so ’n situasie is dit doodnormaal om in ’n mate verward, seergemaak of selfs kwaad te voel. Onthou dat die getroue profeet Habakuk ook daaroor verontrus was dat goddeloosheid toegelaat is om voort te gaan. Maar daar bestaan ’n gevaar as iemand bittere gevoelens bly koester. Hy kan ‘vir Jehovah self woedend’ word.—Spreuke 19:3, NW.

Hoe kan jy dan voorkom dat jy voor gevoelens van woede en bitterheid swig? Eerstens moet jy verstaan waar boosheid vandaan kom.

Slegte dinge kom nie van God nie

Die Bybel stel dit duidelik dat dit nooit God se voorneme was dat ons so moet ly nie. Hy het die oorspronklike mensepaar in ’n paradystuiste geplaas wat vry van pyn en lyding was (Genesis 1:28). Jy weet ongetwyfeld goed hoe dinge verkeerd geloop het: ’n Onsigbare geesskepsel, wat later as die Duiwel en Satan bekend geword het, het Adam en Eva oorreed om aan God ongehoorsaam te wees (Genesis, hoofstuk 3; Openbaring 12:9). Adam het deur sy ongehoorsaamheid sonde en die verwoestende gevolge daarvan oor sy hele nageslag gebring.—Romeine 5:12.

Dit is duidelik dat dit nie God was wat boosheid oor die mensdom gebring het nie, maar die mens self (Deuteronomium 32:5, NW; Prediker 7:29). Trouens, al die slegte dinge waaronder mense vandag gebuk gaan—die siekte, die dood, die oorloë, die ongeregtighede—is die gevolg van Adam se opsetlike daad van ongehoorsaamheid. Daarbenewens is ons almal onderhewig aan wat die Bybel “tyd en onvoorsiene gebeurtenis” noem (Prediker 9:11, NW). Fratsongelukke en tragedies kom oor die goddeloses sowel as die regverdiges.

God se toelating van goddeloosheid

Hoewel dit vertroostend is om te weet dat God nie die bron van goddeloosheid is nie, wonder jy dalk steeds: ‘Waarom laat hy toe dat goddeloosheid voortduur?’ Dit kan weer eens teruggevoer word na die geskille wat in Eden geopper is. God het vir Adam gesê dat hy sou sterf as hy ongehoorsaam is (Genesis 2:17). Die Duiwel het egter vir Eva gesê dat sy nie sou sterf as sy van die verbode boom eet nie! (Genesis 3:1-5). Satan het God in werklikheid ’n leuenaar genoem. Wat meer is, Satan het te kenne gegee dat die mens beter daaraan toe sou wees as hy sy eie besluite neem en as God nie vir hom sê wat om te doen nie!

God kon hierdie aantygings nie ignoreer nie. Het jy al ooit gesien hoe ’n klasmaat teen ’n onderwyser se gesag in opstand kom? As die onderwyser hom ongestraf laat bly, begin die ander leerlinge ook opstandig word. Net so kon universele chaos ontstaan het as Jehovah nie Satan se uitdaging regstreeks aanvaar het nie. Jehovah het dit gedoen deur die mens toe te laat om die manier waarop Satan dinge doen te volg. Geniet die mens die Goddelike onafhanklikheid wat Satan beloof het? Nee. Satan se heerskappy het verwoesting en ellende meegebring, wat bewys dat hy ’n boosaardige leuenaar is!

Sal God toelaat dat goddeloosheid vir ewig voortduur? Nee. Om die geskille te besleg wat Satan geopper het, sal God binnekort alle goddeloosheid beëindig (Psalm 37:10). Maar hoe moet ons intussen die mas opkom?

’n Geskil waarby jy betrokke is

Jy moet eerstens besef dat jy betrokke is by hierdie geskil tussen God en Satan! Hoe so? Beskou die Bybelboek wat na die regverdige man Job vernoem is. Toe God na Job as ’n voorbeeld van ’n getroue aanbidder verwys het, het Satan gesê: “Sal Job U dien as hy niks daaruit kry nie?” (Job 1:9, Today’s English Version). Trouens, Satan het aangevoer dat hy enigiemand van God se diens kon afkeer as hy toegelaat word om druk op hulle uit te oefen!—Job 2:4, 5.

Satan het derhalwe alle godvresende mense belaster. Hy het jou belaster. Maar Spreuke 27:11 sê: “Wees wys, my seun, en verbly my hart, sodat ek hom wat my smaad, kan antwoord gee.” Ja, wanneer jy God ten spyte van ernstige probleme dien, help jy in werklikheid om Satan ’n leuenaar te bewys!

Wanneer ’n mens voor slegte dinge te staan kom, is dit beslis nie maklik om aan die betrokke geskille te dink nie. Diane, wat net tien jaar oud was toe haar moeder gesterf het, sê: “Ek was bang dat ek weens beproewings in my lewe verhard of verbitterd sou word.” Maar die feit dat sy weet waarom God goddeloosheid toelaat, het haar gehelp om haar probleme in die regte lig te beskou. Nou sê sy: “Al is daar dinge in my lewe wat moeilik is om te verwerk, was Jehovah se hand nog altyd met my.”

Diane herinner ons aan ’n baie belangrike feit: Jehovah verwag nie dat ons hierdie druk op ons eie moet verduur nie. Psalm 55:23 verseker ons: “Werp jou sorg op die HERE, en Hý sal jou onderhou; Hy sal nooit die regverdige laat wankel nie.” Jong Kotojo het gevind dat dit waar is. Dit was vir haar ’n tragedie toe haar ouers in 1995 gesterf het in die aardbewing wat Kobe, Japan, getref het. Namens haarself en haar jonger broers en susters sê sy: “Aangesien my ma ons geleer het om op Jehovah te vertrou, kan ons dit verduur.”

Wat van Lidija, die jong meisie wat aan die begin genoem is? Sy het mettertyd besef dat Jehovah haar glad nie verlaat het nie. Sy sê nou: “Jehovah was altyd daar vir ons. Hy het ons gelei en ons voetstappe gerig.”

Jehovah—’n Liefdevolle God wat omgee

Jy kan ook hulp van God ontvang wanneer slegte dinge met jou gebeur. Waarom? Omdat Jehovah vir jou omgee! En hoewel hy toelaat dat slegte dinge met goeie mense gebeur, voorsien hy ook liefdevolle vertroosting (2 Korintiërs 1:3, 4). Een manier waarop hy dit doen, is deur die Christengemeente. Daar kan jy ‘vriende vind wat sterker aanhang as ’n broer’, wat jou kan versterk wanneer jy voor ’n krisis te staan kom (Spreuke 18:24). Kotojo sê: “Sedert die eerste dag ná die aardbewing het ons na die plek gegaan waar die broers bymekaargekom het, en ons het aanmoediging en die nodige dinge ontvang. Dit het my veilig laat voel. So lank ons Jehovah en die broers het, dink ek dat ons enigiets kan verduur.”

Aangesien Jehovah jou as ’n persoon ken, kan hy ook na jou behoeftes omsien wanneer slegte dinge gebeur. Daniël dink terug aan hoe hy die verlies van sy vader verwerk het en sê: “Jehovah word ’n vader vir jou, en sy organisasie voorsien geestelike manne as rolmodelle. Jehovah voorsien altyd antwoorde op vrae wat ek gewoonlik met my vader sou bespreek het.” Diane het Jehovah se liefdevolle sorg sedert die dood van haar moeder op soortgelyke wyse ervaar. Sy sê: “Deur middel van ouer, geestelik volwasse persone wat my aanmoediging, leiding en raad gegee het, het hy my gelei en gehelp om enige ontmoediging die hoof te bied.”

Dit is natuurlik nooit aangenaam om slegte dinge te ervaar nie. Maar put troos daaruit dat jy weet waarom God sulke dinge toelaat. Herinner jou gedurig daaraan dat God die probleem binnekort gaan oplos. Ja, alle spore van die slegte dinge wat ons ondervind het, sal uiteindelik uitgewis wees! (Jesaja 65:17; 1 Johannes 3:8). As jy gebruik maak van al die voorsienings wat God maak om ons te help volhard, kan jy jou deel bydra om Satan ’n leuenaar te bewys. En mettertyd ‘sal God elke traan van julle oë afvee’.—Openbaring 21:3, 4.

[Prente op bladsy 19]

Jehovah gaan binnekort alle slegte dinge beëindig