Van ons lesers

Balans Nadat ek die artikel “Die godgegewe gawe van balans” (22 Maart 1996) gelees het, is ek beweeg om vir julle dankie te sê. Ek studeer op die oomblik oudiologie, en nie een van my handboeke bevat inligting wat so omvattend en maklik is om te verstaan soos die Ontwaak!-artikel nie. Die tekening van die oor was ook uitstekend.

J. P. A., Brasilië

Dasse Baie dankie vir die artikel “Wie het die das uitgevind?” (8 Mei 1996). As ’n bedienaar van Jehovah se Getuies het ek al ’n das gedra terwyl dit 30 grade Celsius of warmer was en ek aan die huis-tot-huis-werk deelgeneem het. Ek het al baie keer by myself gedink dat die das seker uitgevind is deur die een of ander wrede 13de-eeuse inkwisiteur wat ’n bekentenis van ’n ketter wou afpers deur hom te dreig met die folterbank, duimskroewe, om in olie gekook te word of om ’n das op ’n somernamiddag te dra.

W. B., Verenigde State

Party meen dalk dat dit, ongeag die weer, ’n marteling is om ’n das te dra. In kulture waar ’n das as gepaste kleredrag beskou word, is dit egter prysenswaardig dat Jehovah se Getuies oor die algemeen die ongerief verduur om ’n das te dra terwyl hulle aan die bediening deelneem en wanneer hulle Christelike vergaderinge bywoon.—RED.

Rooklose tabak In ons gesondheidsleerklas op skool het ons van dwelms geleer. Ek het vir my onderwyser ’n eksemplaar gewys van die Ontwaak! van 22 April 1996 met die artikel “Jongmense vra . . . Rooklose tabak—Is dit onskadelik?” Hy het my 30 afskrifte van die artikel laat maak sodat hy dit kon uitdeel en die artikel tydens sy klasse kon lees. Die kinders in my klas het dit geniet, en ek het selfs ’n paar tydskrifte by hulle gelaat.

M. C., Verenigde State

Seksuele teistering Dankie vir die reeks “Wanneer daar nie meer seksuele teistering sal wees nie!” (22 Mei 1996). Toe ek die tydskrif vir ander aangebied het, het ek gevind dat baie vroue dankbaar was vir die wenke oor hoe om teistering te vermy en wat om te doen wanneer ’n mens geteister word. ’n Paar weke later is ek self by die werk gemolesteer, en ek het dit by die polisie gerapporteer. Ek is geprys vir die manier waarop ek die situasie hanteer het.

Naam weerhou, Duitsland

Ek is werklik dankbaar vir die artikels. Ek is nou in my tweede jaar op hoërskool en ek het al teistering ondervind, hoewel ek nooit vir enigiemand daarvan vertel het nie. Hierdie artikels het my aangespoor om my ouers en my onderwysers in my vertroue te neem. Ek is nou in staat om my standpunt teen teisteraars in te neem.

K. Y., Japan

Ek is ’n 21-jarige sekretaresse, en my werkgewer het my onlangs seksueel geteister. Terwyl ek probeer dink het hoe ek hom kon nader om my gevoelens uit te druk, het ek hierdie nommer van die Ontwaak! ontvang. Ek het vir my werkgewer ’n eksemplaar gegee, wat hy gelees het. Hy het verskoning gevra en beloof om dit nooit weer te doen nie.

D. N. I., Nigerië

Ek waardeer die feit dat julle hierdie belangrike saak aan die lig gebring het, maar volgens julle foto’s is dit net mans wat ander teister. Dit is duidelik dat julle ’n bevooroordeelde beskouing gee.

H. T., Verenigde State

Die meeste navorsers sê dat baie meer vroue as mans slagoffers van seksuele teistering is. Die artikels het nietemin erken dat mans ook geteister kan word en het spesifieke voorbeelde aangehaal.—RED.

Die meeste artikels oor hierdie onderwerp beklemtoon net wat vroue moet doen om hulleself te beskerm, maar dit leer nie mans om vroue te respekteer nie. Daar sou per slot van rekening nie teistering gewees het as daar geen teisteraars was nie. Julle artikel het “Gepaste gedrag vir mans” bespreek. Hiervoor verdien dit lof.

O. C., Taiwan