Vroue leef langer maar nie noodwendig beter nie

REGOOR die wêreld trou vroue later in hulle lewe, het hulle minder kinders en leef hulle langer. “Vroue se lewe is besig om te verander”, berig die tydskrif UNESCO Sources. Tussen 1970 en 1990 het vroue se verwagte lewensduur by geboorte met vier jaar toegeneem in die ontwikkelde wêreld en met byna nege jaar in ontwikkelende lande. “Dit beteken dat vroue in die ontwikkelde gebiede vandag gemiddeld 6,5 jaar langer as mans leef. In die ontwikkelende gebiede is die verskil vyf jaar in Latyns-Amerika en die Karibiese See, 3,5 jaar in Afrika en drie jaar in Asië en die Stille Oseaan.”

Maar vir baie vroue beteken ’n langer lewe nie ’n beter lewe nie. Our Planet, ’n tydskrif van die Verenigde Nasies, sê dat basiese menseregte vir die meeste van die wêreld se vroue nog steeds “die versiersel op die koek [is] wat hulle nog nooit geproe het nie. Hulle probeer nog steeds net doodgewone brood en water in die hande kry.” Tog, sê die VN, is selfs basiese menseregte buite die bereik van miljoene omdat die oorweldigende meerderheid van die wêreld se ongeletterdes, vlugtelinge en arm mense steeds vroue is. Ten spyte van ’n bietjie vooruitgang, sluit UNESCO Sources af, “lyk die hele situasie vir vroue . . . maar somber”.