Water—lewensbloed van die aarde
WATER, kleurloos, reukloos, smaakloos en kilojoulevry, is onontbeerlik vir alle lewe op aarde. Geen mens, dier of plant kan daarsonder lewe nie. Water is noodsaaklik, vir ’n olifant tot ’n mikrobe; en daar is geen plaasvervanger nie. Elkeen van die meer as vyfmiljard mense op aarde moet elke dag, in die vorm van vloeistof en voedsel, ongeveer 2,5 liter water inneem om gesond te bly. Geen water, geen lewe.
Sonder water is dit onmoontlik om gesaaides te verbou of lewende hawe aan te hou. Geen water, geen voedsel—geen voedsel, geen lewe.
Gelukkig is daar baie water. Wanneer ons pragtige blou planeet vanuit die ruimte afgeneem word, lyk dit of dit Water genoem moet word, nie Aarde nie. Trouens, as die wêreld se water die oppervlak van die planeet eweredig bedek het, sou dit ’n wêreldwye oseaan van 2,5 kilometer diep vorm. Die hele landoppervlak van die aarde kan in die Stille Oseaan inpas, en daar sal nog plek oor wees.
Die meeste van die aarde se water is natuurlik in die seë, en seewater is sout. As ’n persoon net seewater drink, sal hy of sy gou van dors en ontwatering sterf terwyl die liggaam van die oortollige sout probeer ontslae raak. Seewater is ook nie ’n goeie keuse vir gebruik in die landbou of nywerheid nie—dit maak die meeste gesaaides dood en laat die meeste masjinerie vinnig roes. Daarom kan mense seewater gewoonlik net gebruik as hulle die sout uithaal, en dít is ’n duur proses.
’n Skrale 3 persent van die wêreld se water is vars, en nie sout nie. Feitlik al daardie vars water—ongeveer 99 persent daarvan—is vasgevang in gletsers en ysdekke of is diep onder die grond. Slegs 1 persent daarvan is maklik bekombaar vir die mens.
Een persent klink nie na baie nie. Is dit moontlik dat ons vars water ooit sal opraak? Dit is onwaarskynlik. Die tydskrif People & the Planet sê: “Selfs hierdie [1 persent] sal genoeg wees om twee of drie keer die wêreld se huidige bevolking te onderhou, as dit eweredig oor die aarde versprei en rasioneel gebruik word.”
Basies word die totale hoeveelheid water op die aarde nie meer of minder nie. Science World sê: “Die water wat jy vandag gebruik, het dalk eens op ’n tyd ’n dinosourus se dors geles. Dis omdat al die water wat ons nou op aarde het al is wat ons ooit gehad het—of ooit sal hê.”
Dit is omdat die water in en om die aarde aanhoudend sirkuleer—van die oseane na die atmosfeer, na die land, in die riviere in en weer terug na die oseane. Dit is soos die wyse man lank gelede geskryf het: “Al die riviere loop in die see in, maar die see word nooit vol nie. Die riviere hou aan om te loop na die plek toe waarheen hulle altyd geloop het.”—Prediker 1:7, NAV.
Maar ten spyte van die oorvloed vars water op die aarde is baie streke in ’n krisis. Die volgende artikels kyk na die probleme en die moontlikhede om dit op te los.
[Foto-erkenning op bladsy 3]
NASA photo