’n Rooskleurige toekoms vir ons kinders
SEDERT die einde van die Tweede Wêreldoorlog het die wêreld se regerings ’n reeks verdrae opgestel en onderteken om burgerlikes gedurende oorlog te beskerm. Onder hulle is verdrae wat toelaat dat klere tesame met mediese en kosvoorraad kinders bereik. Internasionale ooreenkomste belowe om kinders teen seksuele uitbuiting, marteling en geweld te beskerm. Ooreenkomste verbied ook die werwing van enigiemand onder die ouderdom van 15 vir die gewapende magte.
The State of the World’s Children 1996, ’n verslag deur die Verenigde Nasies-kinderfonds, noem hierdie wette “ware mylpale” en voeg by: “Daar bestaan ’n groter moontlikheid dat politici wat weet dat daar standaarde is waarvolgens hulle later geoordeel kan word daardie standaarde in hulle berekeninge sal oorweeg.”
Politici besef natuurlik ook dat die internasionale gemeenskap dikwels nie die vermoë of die wil het om wette toe te pas nie. Die verslag erken dus dat “dit maklik is om die bestaande liggaam van volkereg te minag met die oog op die mate waarin hierdie beginsels verontagsaam is”.
Dan is daar die kwessie van geld. In 1993 was daar konflikte in 79 lande. Vyf-en-sestig van hulle was arm lande. Waar het hierdie arm lande die wapens gekry om mee te veg? Meestal van ryk lande. En wie is die vyf grootste uitvoerders van wapens na die ontwikkelende wêreld? Die vyf permanente lede van die Verenigde Nasies se Veiligheidsraad!
Diegene wat besorg is
Daar is natuurlik diegene wat diep besorg is oor die benarde toestand van kinders in oorlog. Individue sowel as organisasies bied liefdevolle hulp aan jong slagoffers van oorlog. Jehovah se Getuies, wat nie aan oorlog deelneem nie, het byvoorbeeld dit gedoen. Maar om te keer dat kinders tydens oorlog ly, beteken in werklikheid dat oorlog self uit die weg geruim moet word, ’n vooruitsig wat dalk onwaarskynlik lyk. Weens die mensdom se lang rekord van twis en konflik maak baie die gevolgtrekking dat mense nooit wêreldwye vrede teweeg sal bring nie. Hierdie beskouing is reg.
Mense maak ook die gevolgtrekking dat God nooit in die aangeleenthede van die nasies sal ingryp of blywende vrede op die planeet sal bring nie. Hierdie beskouing is verkeerd.
Ons Skepper, Jehovah God, is diep besorg oor die dinge wat op die aarde plaasvind. In sy Woord, die Bybel, vra Jehovah: “Het Ek dan miskien ’n behae in die dood van die goddelose . . . [en] nie liewer daarin dat hy hom bekeer van sy weë en lewe nie?” God antwoord nadruklik: “Ek het geen behae in die dood van hom wat sterwe nie.”—Esegiël 18:23, 32.
Dink hieroor na: As ons medelydende Skepper wil hê dat selfs goddelose volwassenes hulle moet bekeer en die lewe geniet, wil hy tog sekerlik ook hê dat kinders moet lewe en die lewe geniet! En tog sal ons liefdevolle God nie die goddeloses vir ’n onbepaalde tyd duld nie. “Die kwaaddoeners sal uitgeroei word”, belowe God se Woord. “Nog ’n klein rukkie en die goddelose sal daar nie wees nie.”—Psalm 37:9, 10.
Jesus Christus, wat die persoonlikheid van sy hemelse Vader volmaak weerspieël het, het kinders liefgehad en gesê dat ‘die koninkryk van die hemele aan dié behoort wat soos hulle is’ (Matteus 19:14). Die opoffering van kinders aan die oorlogsgode is vir Jehovah God en vir sy Seun, Jesus Christus, ’n gruwel.—Vergelyk Deuteronomium 18:10, 12.
God se belofte van ’n rooskleurige toekoms
God het oorloë en lyding deur die eeue heen toegelaat sodat die waarheid wat deur die profeet Jeremia gemeld word tot in alle ewigheid bevestig kan word: “Ek weet, o HERE, dat aan die mens sy weg nie toebehoort nie; nie aan ’n man om te loop en sy voetstappe te rig nie” (Jeremia 10:23). Die Bybel belowe dat Jehovah binnekort sy universele soewereiniteit gaan regverdig deur “oorloë [te] laat ophou tot by die einde van die aarde” (Psalm 46:10). Die Bybel voorspel ook die tyd wanneer “[volke] van hul swaarde pikke [sal] smee en van hul spiese snoeimesse; nie meer sal nasie teen nasie die swaard ophef nie, en hulle sal nie meer leer om oorlog te voer nie”.—Jesaja 2:4.
Wat sal van diegene word wat hulle lewe in oorlog verloor het? Is daar enige hoop vir hulle? Jesus het ’n opstanding van die dooies op ’n aarde sonder oorlog belowe en gesê: “Die uur kom waarin almal wat in die gedenkgrafte is . . . , sal uitkom” (Johannes 5:28, 29). Die apostel Paulus het eweneens vol vertroue gesê: ‘Daar gaan ’n opstanding van die regverdiges sowel as die onregverdiges wees.’—Handelinge 24:15.
God se beloftes sal beslis waar word. Hy het die mag sowel as die vasbeslotenheid om alles wat hy hom voorgeneem het uit te voer (Jesaja 55:11). Wanneer Jehovah sê dat hy oorlog uit die weg gaan ruim, bedoel hy dit. Wanneer hy belowe om diegene wat gesterf het op te wek, sal hy dit doen. Soos die engel Gabriël gesê het, “sal geen verklaring [by God] ’n onmoontlikheid wees nie”.—Lukas 1:37.
[Prent op bladsy 10]
Wanneer daar nie meer oorlog is nie, sal alle kinders ’n heilsame lewe geniet