Water en jou gesondheid

“JY KAN nie op jou dors staatmaak om vir jou te sê hoeveel water jy nodig het nie”, sê die tydskrif Health. En tog is ons liggaamlike en emosionele welstand, en selfs ons voorkoms, afhanklik daarvan dat ons baie water drink. Ons liggaam verloor voortdurend water deur sweet, trane en urine sowel as deur ons asemhaling. Hierdie verlore vloeistof moet vervang word. Hoeveel is nodig? Baie deskundiges beveel aan dat ons ten minste agt glase water—twee liter—elke dag moet drink.

Waarom? Water is noodsaaklik om voedingstowwe in ons liggaam te vervoer en van afvalstowwe ontslae te raak. Dit is nodig om ons temperatuur te reguleer en vog aan ons gewrigte te verskaf. “Selfs die geringste tekort kan jou moeg . . . of siek laat voel”, sê Health. “Ontwatering word dikwels oor die hoof gesien as ’n oorsaak van moegheid.” Die tydskrif stel voor: “Moenie mislei word deur die feit dat koffie en tee, kafeïenryke koeldranke en alkohol vloeistowwe is nie; dit dra in werklikheid by tot ontwatering.” Kafeïen en alkohol tree op as urineermiddels en laat die liggaam dus water verloor.

Daarbenewens “het jou vel water nodig om sag en soepel te bly”. Om hiermee te help, kan vogmiddels ook aan die vel gesmeer word. Maar dit verleen nie ekstra vog nie. Dit vorm eerder ’n beskermende laag wat help om die vog te behou wat reeds in die vel is. Hoe ouer ’n mens raak, hoe belangriker word dit om hierdie vog te behou, aangesien ons vel sy vermoë om water terug te hou in sekere mate verloor namate ons ouer word.

Ongelukkig verg dit in groot dele van die wêreld aansienlike inspanning om genoeg skoon, suiwer water in die hande te kry. Maar dit is die moeite werd. Drink gerus baie water, en gebruik hierdie eenvoudige manier om op jou beste te lyk en te voel!