Van ons lesers
Evolusie versus die skepping Die reeks “Hoe het ons hier gekom? Per toeval of deur ontwerp?” (8 Mei 1997) is duidelik, eenvoudig en heeltemal logies aangebied. Dit was opwindend om bladsye vol wetenskaplike getuienis ten gunste van die skepping te lees. Die illustrasies was oortuigend. Ek het dit veral geniet om weer oor die sel en al sy dele te lees. Ek het dit terdeë geniet om oor die werking van die mitochondrium en Golgi-liggaampies na te dink, iets wat ek op skool laas gedoen het.
J. S., Verenigde State
As ’n biologiestudent en ’n lewenslange agnostikus wil ek julle graag vir die artikels bedank. Hoewel die artikels sekere oorvereenvoudigings . . . bevat het, het dit nogtans die aandag gevestig op ’n werklike probleem met betrekking tot die huidige evolusieteorie: die feit dat bykans die hele wetenskaplike gemeenskap evolusie deur natuurlike teeltkeuse as voortreflik aanvaar, ten spyte van die talle leemtes in die getuienis. Die wetenskap moet voortdurend aan ondersoeke deur skeptici onderwerp word as dit tereg wetenskap genoem wil word. Deurdat julle die aandag op tekortkominge in die Neo-Darwinistiese teorie vestig, voer julle nie net ’n argument aan ten gunste van geloof in Jehovah nie, maar julle bewys ook die toekoms van wetenskaplike navorsing ’n diens. Dankie.
A. S., Verenigde State
Verhuising Ek het die artikel “Bereken die koste van verhuising!” (8 Mei 1997) werklik waardeer. Ek ondervind die meeste van dit waaroor julle geskryf het. Aangesien ek van Afrika na Europa verhuis het, kom ek voortdurend voor onaangename situasies te staan as gevolg van ras, taal, velkleur en veral vooroordeel. Die gewilde media het mense ’n verwronge beeld gegee van Afrikane en van buitelanders oor die algemeen.
P. A., Duitsland
Vermaak Dankie vir die artikel “Wat het met vermaak gebeur?” (22 Mei 1997). Ek is 12 jaar oud en het gedurende skoolvakansies altyd baie TV gekyk. Die artikel het my help besef dat daar ander vermaaklike dinge is wat ek kan doen.
J. L., Engeland
Predikingswerk op die platteland in Afrika Ek wil julle graag bedank vir die artikel “Wat ’n hoender in die reën jaag . . . ” (22 Mei 1997). Ek waardeer die toegewydheid en volharding wat ons broers in Nigerië openbaar. Selfs al moes hulle slange, krokodille en bloedsuiers trotseer, het hulle liefde vir mense hulle aangespoor. Wanneer ek weer in die predikingswerk uitgaan en warm of moeg raak, sal ek aan ons dierbare broers in Nigerië dink.
S. S., Verenigde State
Seksualiteit—veranderende gesindhede Ek wil graag my opregte waardering uitspreek vir die reeks “Seksualiteit—Wat veranderende gesindhede beteken” (8 Junie 1997). Dit het my geloof baie versterk. ’n Man in ons buurt het onlangs vir my [’n vrou] gesê dat ek ‘liggaamlik gestremd’ is omdat ek op 19 nog ’n maagd is. Ek is bly dat ek hom kon laat besef dat ek in Jehovah se oë liggaamlik sowel as geestelik gesond is.
W. M. C. C., Zimbabwe
Julle verwysing na “promiskue gene” op bladsy 10 is onjuis. As ’n vierdejaarstudent in biologiese wetenskappe wil ek julle inlig dat “promiskue gene” verwys na gene in ’n chromosoom wat binne die chromosoom rondbeweeg of na ’n nuwe chromosoom verskuif. Dit het niks met gedrag te doen nie.
L. P., Kanada
Die stelling dat God ons nie met “promiskue gene” geskep het nie, was eintlik ’n verwysing na ’n toespraak wat die Anglikaanse biskop van Edinburg, Skotland, gehou het, waarvan ’n deel op bladsy 4 van daardie nommer van die “Ontwaak!” aangehaal is. Die biskop het gesê dat “God . . . ons promiskue gene gegee” het—klaarblyklik ’n poging om onsedelike gedrag te verskoon. Ons artikel het die dwaasheid van sulke bewerings blootgelê.—RED.